1. Timoteo 5

1Ma tchinge ap i phureste! Tu te peneh o phuro mursheske, kai kowa gar mishto hi, hoi job kras, palle rake leha, har te wals job tiro dad! Un i tarne murshentsa rake, har te wans le tire phrala! 2Rake i phuri djuwjaha, har te wals li tiri dai! Rake i tarne djuwjentsa, har te wans le tire phenja, un kre kowa i djudjo djijeha! 3Kanna rakrau pral kol djuwjende, kolengre romma buder gar djiwenna. De jak, te well kolen doha djipaske, kai hi len tchatchepaha kek menshe, kai lenge koi hi. 4Te hi kol djuwjen tchawe, tchawengre tchawe, hunte wenn kolla lenge koi. Jaake sikrenn jon, te patsenn le ap o Debleste. Un jon parkrenn pen pash pengri dai un pengri mami, hoi kolla lenge lauter kran. Kowa hi mishto glan o Debleskre jaka. 5I patsli djuwel, kai hi lat buder kek rom, witar kek wawar menshe, kolake hunte wenn tumer koi. Koja dikell ap o Debleste kokres un mangell lestar, te dell lo lat doha djipaske. Joi mangell les i tselo djijestar o diwes un i rati, un mukell gar tele. 6Hi wawartchandes pash i djuwjate, kolakro rom buder gar djiwella, un kai dikell ap peste kokres, te well lat i shukar djipen. Kolakro patsepen hi mulo. 7Pen i patslenge, te djiwenn le pal kal laba, te hatsell kek i doosh ap lende! 8Koon gar peskre menshenge koi hi, un kolenge, kai pash leste an o kheer djiwenna, kowa nashras peskro patsepen, un hi har jek, kai patsell gar ap o Jesus Kristeste. 9Kanna rakrau pral ko liil, kai i laba kol djuwjendar dre tchindlo wenna, kolakro rom buder gar djiwella. Te hi jek lendar tarneder har shob-deesh bersh (60), ma tchin lakro lab pre! Koja, kai well dre tchindlo, kolat hunte his jek rom. 10Wawar menshe hunte dikenn ap late, te kras li latcho koowa, un te tsardas li peskre tchawen mishto pre. Jon hunte dikan, te las li menshen pash peste pre, un te thowas li i patslenge i herja. Jon hunte dikan, te his li kolenge koi, kolen i pharo djipen hi, un te kras li hako latcho koowa. 11Kanna rakrau i tarne djuwjendar kolengre romma buder gar djiwenna. Ma tchin kolengre laba an ko liil! Jon nai kamans budeder pale i romes te lell, har te wenn le o Jesus Kristeske koi. 12Jaake rikrenn le gar pengro lab, hoi jon o Jesus Kristeste dan. Un doleske anenn le doosh ap pende. 13Kal tarne djuwja kamenn buder gar te budrell, un jon djan dran jek kheer an o wawar, un tchamrenn bud. Jon kamenn lauter feteder te djinell, un rakrenn jaake, hoi gar mishto hi. 14Doleske kamau, te romedinerenn kol tarne djuwja pale, te lenn jon tchawen, un te budrenn jon an pengro kheer, jaake te nai penell kek djungelo koowa pral i patslende. 15Djinau sawendar, kolla mukan o tchatcho drom, un djan o bengeske palla. 16Te hi i patsli djuwjat wawar djuwja an lakri familja, kolengro rom buder gar djiwella, hunte dikell joi ap lende, te hi len doha djipaske. Kai budi hi gar i budi i tsele patslendar. I patsle hunte wenn kol djuwjenge koi, kai len kek menshe hi. 17Kanna rakrau pral kolende, kai hi kol phureder mank i patslende, un krenn pengri budi mishto. I patsle hunte dikenn pre ap lende un shunenn ap lende. Ninna hunte denn le len lowe. Kowa penau budeder kolendar, kai penenn i menshenge o Debleskro lab, un sikrenn lende o Debleskro drom. 18An o Debleskro lab hi tchindlo: Te budrell i ficho tuke, palle pande gar leskro mui, te kamell lo te chal! Ninna hi tchindlo: O budepaskro hi moldo, te well lo plaissedo. 19Ma shun ap jekeste, kai anell i doosh ap i phureder pre, te hi gar dui, triin patsle koi, kai penenn kowa nai ninna, hoi job kras. 20Kolla, kai kran tchilatcho koowa, kolen dess trad glan lauterende, te well kol wawaren daar. 21Me penau tuke soreles glan o Debleste, un glan o Jesus Kristeste, un glan kol Debleskre bolepangre, te rikress tut ap ko koowa, hoi me tuke kanna penom! Pash hakeneste dja pal o tchatchepen! Ma tsarde jekes glan o wawareste! 22Ma tchip sik tire wasta ap jekeste pre! De jak, te well i doosh i wawarestar gar ap tute! Rike tiro dji djudjo! 23Tu te pijeh pani, palle tchore ninna mool dre! Kowa hi mishto tiro pereske. Tu hal jaake bud nasselo. 24Denna menshe, kai lengri doosh diklo wella i wawar menshendar. Pash wawar menshende hi lengri doosh khatedo. O diwes wella, kai lengri doosh diklo wella. 25Jaake hi ninna pash i menshende, kai krenn latcho koowa. Pash jekeste nai dikell kowa hakeno. Pash i wawareste hi kowa khatedo. Well i diwes, kai well o latcho koowa diklo.

will be added

X\