1. Korintarja 16

1Kanna kamau te rakrell pral i lowe, hoi tumer khetne tchiwenn i patslenge. Krenn kowa jaake, har me les ninna penom kol patslenge an o them Galatia. 2Hako kurko tchiwell hakeno tumendar jaake bud lowe ap i rig, har leske djala. Jaake hunte tchiwenn kol lowe gar khetne ap ko diwes, kai wau me pash tumende. 3Te wom me pash tumende, rodenn tumenge murshen win, kai hi mishto an tumare jaka. Un me bitchrau len kol lowentsa an o foro Jerusalem, un dau len lila peha, hoi dre tchindlo hi, koneske kol lowe hi un konestar. 4Te wals mishto, te djap me ninna koi, palle nai djan le mantsa. 5Miro drom pash tumende djal pral o them Macedonia. Kote atchau gar, wau jaake sik har djala pash tumende. 6Kamau i tsiro pash tumende te atchell. Te djala, ninna pral o wend. Te djau me dureder, palle wals shukar, te wenn tumer mantsa i tikno kotar drom. 7Kau kopo kamau gar te wap pash tumende i tikno tsireske. Me kamoms te atchap i raha tsiro pash tumende, te kamell o Dewel kowa ninna. 8Kate an o foro Efesus atchau, bis te well ko baro diwes, hoi kharella Pfingsta. 9Kate nai budrau me mishto o Debleske, ninna te hi kate bud menshe, kai krenn mange miri budi phares. 10- 11Te well o Timoteo pash tumende, palle len les jaake mishto pre, te well les kek traash. Un te dikell kek ap leste tele! Job budrell ninna o Debleske har me. Te well lo pale pash mande, djan i kotar drom leha! Me un i phrala, kai pash mande hi, atchah kate jaake raha, bis te was lo pash mende pale. 12Bud kope penom me ap maro phraleste Apollo, te well job kol wawar phralentsa pash tumende. Job kamell kowa kanna gar. Te well i mishto tsiro, well lo pash tumende. 13Denn garda, te atchenn an o patsepen! Ma trashenn! Atchenn soreles! 14Lauter, hoi tumer krenna, krenn dran o kamlepen o tselo djijestar! 15Mire phrala, tumer prindjrenn o Stefano un kolla, kai an leskro kheer djiwenna. Jon hi kol patsle, kai glan i tsele wawarende an o them Achaja ap o Jesuseste patsan. Jon budrenna pengri tseli sorjaha i patslenge. Mangau tumen, 16shunenn ap kolende un ap sawende har jon, kai budrenn o Debleske pengri tseli sorjaha! 17Me hom bachtelo, kai was o Stefano, un o Fortunato, un o Achaiko pash mande. Tumer nai wan gar. Doleske hom bachtelo, te nai wan jon pash mande. 18Jon kran miro dji soreles, jaake har jon ninna tumare djia soreles kran. Rikrenn tumen ap sawe menshende! 19I tsele patsle an o them Achaja penenn tumenge latche laba. Ninna kol dui, o Akwila un i Priska, un kol wawar patsle, kai khetne wenna an lengro kheer, penenn bud latche laba ap tumende, kai han lengre phrala un phenja an o patsepen. 20I tsele patsle penenn tumenge latche laba. Penenn tumenge latche laba, un taprenn tumen trujal, un denn tumen i tchum. Koleha sikrenn tumer, te han phrala un phenja an o patsepen. 21Atchenn o Debleha! Kowa tchinau me, o Paulo, miro wasteha. 22Koon o Jesuses, maro rajes, gar kamella, ap koleste well i bibacht! Maranatha! 23O latchepen maro rajestar, o Jesusestar, djal tumentsa! 24Me kamau tumen lauteren o djijestar. Mer ham jek an o Jesus Kristeste.

will be added

X\