1. Korintarja 10

1- 2Mire phrala, ma bistrenn, har djas mare phurenge, har djan jon an o mulo them. I wolka djas glan lende lauterende un sikras lende, kai o Dewel pash lende his. Un jon halauter djan o Moseste palla mashkral o baro pani ap i wawar rig. Mer nai penams: Har wan jon an i wolka un an o baro pani, wan le ap o Moseskro lab an o pani thodo. 3Un jon halauter chan ko jek chapen, hoi was o Deblestar. 4Un jon pijan lauter ko jek pipen, kai was o Deblestar. Jon pijan ko pani, kai was dran i baro bar win, kai lentsa djas. Ko bar his o Jesus Kristo. 5Ninna te his jaake, nai dikas o Dewel gar latches ap bud lendar. Un jon meran an o mulo them. 6Kowa, hoi kote djas, kamell menge soreles te penell, te djal maro dji gar pal o tchilatcho koowa, jaake har kolengro dji pal o tchilatchepen djas. 7Ma mangenn wawar koowa an har o Debles! Mank kolende an o phuro tsiro his sawe, kai kran kowa. An o Debleskro lab hi tchindlo: Jon beshan tele, te chan le un pijan le un stan pre, te khelenn le glan o sonakaskro ficho. 8Mer te luberas witar gar trujal. Mank kolende his sawe, kai kran kowa, un lendar meran biish-te-triin serja menshe ap jek diwes. 9Ma choirenn o Jesus Kristes, har kolla an o phuro tsiro o Debles choiran, har kran le, har te wals les kek soor. Un i sapa dandran len. Un jon meran. 10Ma penenn, kai kowa gar mishto un doha hi, hoi o Dewel tumen das. Jaake rakran kol wawar pale te pale. Un jon wan mulo dino. 11Kowa lauter, hoi ap lende was, sikrell men, hoi nai wella. Un mer, kai djiwah kau diwes un djinah, te atchell kau tsiro buder gar raha, menge was kowa tchindlo an i lila, te das mer jak ap mende. 12Doleske, koon penella, kai job soreles an o patsepen hi, dell jak, te perell lo gar. 13Della sawo koowa, hoi kamell tumen o Debleskro dromestar tele te anell. Dikenn, sawo koowa was ninna ap wawar menshende. Te well pharo koowa ap tumende, dell o Dewel tumen koi soor, te nai hidjenn kowa. Job hatsell i drom, te wenn pale kote win. 14Doleske, latche mala, denn jak, un mangenn gar wawar koowa an har o Debles! 15Me rakrau tumentsa har menshentsa, kai gosewe hi. Putchenn tumaro dji, te hi kawa lauter tchatcho, hoi me penau! 16Te wah khetne, te pijas dran o Jesuseskro khoro, parkrah men koleske pash o Debleste, un djinah, o Jesus Kristo ratas un meras menge un las mari doosh mendar krik. Te phagah ko maro un chah les, rikrell men kowa o Jesus Kristeha khetne. 17Mer chah jek maro. Doleske hi men jek djipen khetne o Jesuseha, ninna te ham bud patsle. 18Kowa hi jaake, har pash i menshende an Israel. Jon wan khetne un chan kol fichendar, kai anan le o Debleske. Lauter kolla, kai chan, his khetne. Un o Dewel his mank lende. 19Me kamau tumendar te putchell: Hi i figura i tchatcho dewel? Na-a! Hi ko mass, hoi anan le glan late, wawartchandes har wawar mass? Na-a! 20Kowa, hoi i menshe kol deblen dran kasht un bar denna, anenn jon i bengenge, gar o Debleske. Un me kamau gar, te wenn tumer i bengentsa khetne. 21Tumer nai pijenn gar dran o Jesuseskro khoro un dran o bengeskro khoro. Tumer nai chan gar o Jesuseskro chapen un o bengeskro chapen. 22Ma choirenn o Debles! Mer ham gar sorleder har job. 23Tumer penenn: "Lauter nai krah mer." Me penau: Gar lauter hi latcho. Lauter nai krah mer. Gar lauter, hoi mer krah, hi mishto menge un i wawarenge. 24Dikenn gar ap tumende kokres! Pash halauter, hoi tumer krenna, dikenn ninna ap o wawareste, hoi leske mishto hi! 25Tumer nai chana hako mass, hoi bikedo wella. Ma putchenn, konestar ko mass wella, te well tumenge gar phares an o dji! 26Djinenn, i phub un lauter, hoi koi pre hi, hi o Debleskro. 27Te penell tumenge jek, kai gar patslo hi: "Awenn pash mande un chan mantsa," palle djan koi! Un chan pash leste lauter, hoi job tumenge anella! Ma putchenn, kai ginas lo ko chapen, te well tumenge gar phares an o dji! 28Kowa hi wawartchandes, te penell tumenge jek: "Kau chapen was i debleste dran kasht un bar dino." Palle ma chan ko mass, te well koleskro dji gar djungeles, kai kowa tumenge penas. Job nai penals: "Hi mishto, te chap ko chapen." 29Me rakrau gar tumendar, rakrau ko wawarestar, te wals kowa gar mishto leske, te chals job ko mass. Mange nai penell kek wawar, hoi me nai krap un hoi gar. 30Te chau i chapen un parkrau man koleske pash o Debleste, nai praassell man kek, te chau me ko chapen. 31Hoi tumer ninna krenna un chana un pijenna, kowa krenn lauter jaake, te well o Dewel sharedo. 32Djiwenn jaake, te choirell pes kek pral tumende: kol bibolde gar, un kolla, kai kek bibolde hi witar gar, un witar gar kol patsle, kai wenn tumentsa khetne. 33Me krau lauter, te djiwap jaake, har hakeneske mishto hi un rodau gar, hoi mange mishto hi. Me kamau kowa te krell, hoi budenge mishto hi, te djan jon gar nashedo.

will be added

X\