रोमी 11

1खकामा कँ प्रास्‍ना ततँ: नीनाबूङ्‍वा ऊम्‍मीनाचीलाई छीङूतीङूचीक तूईहँल्‍या? खोसावाने छीङहँचीन। कँ अँ हँपासँ अब्राहाममी चाचायोछाहँपीक बेन्‍यामीनमी कूलाक ईस्राएली ह। 2नीनाबूङ्‍वा पाईलापीकाङा छ्‌यातूचीक ऊम्‍मीनाचीलाई छीङहँचीन। एलीयामी बारेपी धार्मसास्‍तारावा ग्‍याक खा आनानीवा ङीसूनूम्‌न? एलीयावा ईस्राएलीचीमी बीरोधापी नीनाबूङ्‍लो आतामा बीन्‍ती मी, 3“प्रभू, नक ईस्राएलीचीवा आम्‍नू अगम्‍बक्‍तालाई सीतूचीक तूई, खोचीवा आम्‍नू बेदीची होतूतीङूचीक तूई, खकामा कँ मात्‍ताई लीतँक तूई, मकामा खोचीवा कँलाई सेमा लामेहँमी।” 4खतालो नीनाबूङ्‍वा खोलाई यँ जूवापा पीऊ? “बाल लूचीक भागूवानामी ततूम्‍बामी लाम्‍लोपी मन्‍बब्‍काबी सावाहोतोङ् मीनाची कँ अँमी लागी योयाङ् मूङ्‍मा यूसूङ्‍क तूई।” 5आतामाङा नक दँमापीसँ ममारूङ्‍लामा छ्‌यातामीक अतूछे बँकी मीनाची तूईमी। 6नीनाबूङ्‍वा खोचीलाई छ्‌यातूचीक, ऊम्‍चू चालँवामी गार्नावा मन, ऊम्‍ममारूङ्‍लामाबो ह। खकामा मीनाचीलाई ऊम्‍चू चालँवामी गार्नावा छ्‌यातूचीकधँने, ऊम्‍ममारूङ् यँनायँक छाखाताक। 7हने यँ त? ईस्राएलीचीवा मारी लामूचीक थोका तूचीन। खताधँसँ छ्‌यातामीक अतूछे मीनाचीवा मात्‍ताई नीनाबूङ्‍मी सम् तोमादूरूची। खकामा आरूचीबो ऊम्‍चू सागूँवा काठोरा मूची। 8धार्मसास्‍तारापी आतामा छाबाक तूई, “नीनाबूङ्‍वा मीनाचीलाई ङीमा मन्‍दूर्माक नूवालो सागूँवा पीऊचीक तूई, खकामा तोमा दूरचीनक मू मकामा ईन्‍मा दूरचीनक नाब पीऊचीक तूई, आतामा खोची ईसेक लेसाम्‍म आताकाकङा छामीमा तूवामीक तूई।” 9खकामा दाऊदवा आता गी, “ऊम्‍चू भोजा साल्‌लो चीप्‍लँ छूने मकामा ऊम्‍चू पतन छूनेमा खोचीवा दान्‍डा तूचीने। 10खोची मूसीपा छूमीनेमा तूचीनने, खकामा ऊम्‍चू बूलूम् हाल्‍लोसँ सोझ छीनतो पाल्‍नेखाईने।” 11आतामा कँ ततँचूङ्: “यहूदीची पोमाङा दूरचीनतो धीसामीकहँल्‍या?” माताने मन! खोचीवा खँ मूचीकसावा माच्‍छे आर्क जाईचीवा तूचीक तूई, मातामा खोची आर्क जाईचीलो झाली मूकाबी छूमीने। 12नीनाबूङ्‍वा पीऊचीक माच्‍छेलाई यहूदीचीवा छीङूचीकसावा साप्‍तेमूलूङ्‍पीक आर्क जाईचीवा माच्‍छे तोमाक साखा तूचीक तूई, खतालोने झान यहूदीचीवा नीनाबूङ्‍वा पेःक माच्‍छेछोपी बीस्‍वसा मीचीधँने धाई मारी साखा तीलँ! 13हने कँ आर्क जाईचीलाई लँचूङ्, कँ आर्क जाईचीमी लागी ख्रीस्‍टमी प्रेरीत छँकसावा कँङावा मूमाङा छीक चालँवा मूमालाई मारी धूँराकँ। 14आतामा कँ अँ जाई यहूदीचीलाई झाली मूकाबी मूमा दूरूङ्‍चूङ्‍ने मकामा खोचीहँपीक कोई कसाईलाई लेमेमा दूरूङ्‍ने। 15नीनाबूङ्‍वा यहूदीचीलाई छीङूचीकसावा साप्‍तेमूलूङ्‍क मीनाचीलाई खोलो तोङ्‍मीऊची, खतालोने नीनाबूङ्‍वा यहूदीचीलाई फेरी ग्राहाना म्‍यचीधँने नक खोचीमी लागी स्‍यामीकपीका पोसूङ्‍वा तचीतोकङा छी। 16आतामा चोकीक खबूल्‌पीका नीनाबूङ्‍लाई पाईला चारामाकबो पबीत्‍रा तूईधँ चोकाक झारा खबूल् पबीत्‍रा छी। खकामा पोमी ऊम्‍साम् पबीत्‍रा तूईधँ झारा ऊम्‍रम्‌ची पबीत्‍रा छी। 17खतालो कोई कोई रम्‌ची ओतातीङाक तूई। खकामा आना वलीखाक जाईतूनबो मक ल्‍याक जाईतूनमी पोपीका लतीक पोसील ऊम्‍वामी भागा तोमालाई कलामी छूयानाक तूई, मक वलीखाक जाईतूनबो आनानी आर्क जाईचीङा ह। 18आतामा आनानी आर्क जाईचीवा मक ओताक रम्‌चीलाई छीङ्‍मा ईसी। आनानी याक्‍तँङा खूरीनीधँ नक खा मीनानूम्, आनानीने रम् मात्‍ताई ह। आनानीवा साम्‌लाई थामामीनूम्‌न, साम्‌वाबो आनानीलाई थामामीयीनी। 19खतालोने आनानीवा गीःनी, “कँ कलामी छूईमालाईबो मक रम्‌ची ओताखातामीक ह।” 20ऊम्‍चू अबीस्‍वसामी गार्नावा ओताकने ऊम्‍छूङ्‍ङा ह। आनानीबो आम्‍नू बीस्‍वसामी गार्नावा मपी तूईहँनी। हने याक्‍तँ खूर्ननी, कीमा मूतोबो तूवानी। 21नीनाबूङ्‍वा साक्‍काली जाईतूनमी रम्‌चीलाई कीबूतीङूक तूई, खोची यहूदीची ह। मातामाङा आनालाईसँ खोसावा कीब्‍मालाई बँकी यूसीनाहँल्‍या? 22आतामा आनानीवा नीनाबूङ्‍मी सम्‌लो ऊम्‍कारा ब्‍याभारालाई मीनायानूम्। पतन छामीहँ खातामीकचीलो नीनाबूङ्‍वा कारा ब्‍याभारा मी, खतालोने आनानी ऊम्‍सम्‌पीङा छीनीमा तूईयीनीधँ नीनाबूङ्‍वा आनानीलाई सम् तूयीनी। खकामा आनानी ऊम्‍सम्‌पी छीयीनीनधँ आनानीलाईसँ कीबीनीहँ कात्‍तीनी। 23यहूदीचीसँ ऊम्‍चू अबीस्‍वसा छीतचीहँ बीस्‍वसा मीचीधँने नीनाबूङ्‍वा फेरी खोचीलाई कलामी छूयची। यँमाधँ नीनाबूङ्‍लो खोचीलाई फेरी कलामी छूईमा दूर्माक र तूई। 24खकामा आनानी आर्क जाईची वलीखाक जाईतूनमी कीबाक रम्‌तीकाक तूवानी। खकामा ल्‍याक जाईतूनलो तोङीनीनतीकाक तूवानीधँसँ आनानी मक ल्‍याक जाईतूनमी पोपी कलामी छूयानीक तूई। यहूदीचीने ल्‍याक जाईतूनमी पोतीकाकची ह, खतालोने झान्‍सार मक ओताखातामीक रम्‌चीलाई ऊम्‍चू पाईलाक पोपी कलामी छूईमा नीनाबूङ्‍लाई झान मारी साजील छी। 25रूमीपामीचेऊ, कँ आनानीलाई नक रहस्‍सेमी खा लोनीनी, नकसावा आनानीलाई आम्‍नूहँपा नूवामी तूयेका गूँमाक याक्‍तँ खापीका मेथाम् यूसीनी। ईस्राएलीचीहँपीक चसीवा ऊम्‍चू सागूँवा छरीक मूचीक तूईधँसँ साधाईङा छरीक मीयीचीन। खताधँसँ यहूदीची आर्क जाईचीवा बीस्‍वसा मीदूरचीतो मात्‍ताई ऊम्‍चू सागूँवा छरीक मीचीक ह। 26आतामा झारा ईस्रालीचीवा माच्‍छे तची। धार्मसास्‍तारापी आतामा छाबाक तूई, “माच्‍छे पीकाबी सीयोनलामा ती, खकामा खोसावा याकूबपीका झारा खँसापी थोका कात्‍त।” 27“खकामा कँङा ऊम्‍चू खँधाईप्‍यँचूङ्‍हँ खोचीलोक अँ करार पूरा म।” 28यहूदीचीवा खान्‍नीक खा छीङूचीकसावा नीनाबूङ्‍मी सातूरा ठराछामी। नकने आनानी आर्क जाईचीमी भलाईमी लागीङा छाक ह। खताधँसँ नीनाबूङ्‍वा छ्‌यातूचीकपी ऊम्‍चू फूपापाचीमी गार्नावा यहूदीची नीनाबूङ्‍मी लालूखालोकची ह। 29यँमाधँ नीनाबूङ्‍वा प्‍यचीक ममासूङ्‍लो खोसावा मीनाचीलाई काछचीक खापीका ऊम्‍सानूवा हाल्‍लोसँ लासन। 30यँमाधँ पाईला आनानी आर्क जाईचीसँ नीनाबूङ्‍मी आग्‍या मन्‍र्‌याब्‍काबीची तूवानी, खतालोने यहूदीचीवा नीनाबूङ्‍मी आग्‍या र्‌याबूचीनकसावा आनानीवाबो नीनाबूङ्‍मी सम् तनूम्‌क तूई। 31आतामाङा आनानीलाई नीनाबूङ्‍पीका सम् तूयानीकसावा यहूदीची सम् तूईलोमालाई होतो नीनाबूङ्‍मी आग्‍या मन्‍र्‌याब्‍काबी छामीक तूई। 32यँमाधँ नीनाबूङ्‍वा झारा मीनाचीवा सम् तोमा दूरूचीने ग्‍यामा खोची झारालाई आग्‍या मन्‍र्‌याब्‍माक बान्‍धानापी यूसूचीक तूई। 33नीनाबूङ्‍मी साया पोमाक छाम् नीनाबूङ् बूलूमी तूई खकामा खो मारी नूवामी तायामी तूई, खोसावा मीक ऊम्‍नीर्नायामी बारेपी आसावासँ ङीमा दूरचीन मकामा खोसावा मीक खाचीसँ आसावासँ तूम्‍तोमा दूरचीन। 34“यँमाधँ प्रभूमी सानूवा आसावा तूम्‍तोमा दूरूक तूई। मकामा ऊम्‍यायोमी आसा छाक तूई?” 35“खकामा आसावा नीनाबूङ्‍लाई हाल्‍लोची ऊपाहारा पीऊक तूई, मकामा नीनाबूङ्‍वा खोलाई लामा पीमाछी?” 36झारा थोका खोसावाङा लीसूक ह। झारा थोका ऊम्‍रलामा मकामा ऊम्‍माहीमामी लागीङा छाक ह। खोलाईङा हाल्‍लोसँ माहीमा छूनेयाने। आमेन।

will be added

X\