प्रकास 18

1खकामा कँङा ईत्‍ता आर्क ढ्‍याप्‍पा र तूवाक स्‍वर्गादूत नीनाम्‍‌खम्‌पीका खँदीमापी धातायाक तूङ्। मातालो ऊम्‍माहीमावा खँदीमाङा ऊजेल छा। 2मकामा खो ढ्‍याप्‍पा सँलँवापी पातामा ग्‍या, “मक ढ्‍याप्‍पा बेबीलोनमी पतन छाक तूई! नक चाप्‌ची तूमाक खम् छाक तूई। खकामा झारा ईसीक आत्‍मा, ईसीक छँवाची खकामा झारा ईसीकलो चीमालीक लँपेर्‌वाचीमी लूङ्‍बू छाक तूई। 3यँमाधँ झारा जाईचीवा मकमी ईसीक कलवामी खमवा दूङूचीक तूई। खकामा खँदीमाक हँचीवा खोलो कलवा मूचीक तूई। मकामा खँदीमापी ब्‍यापारा मूकाबीची मक बेबीलोनमी सूखाचाईनामी गार्नावा बूलूमी छामीक तूई।” 4खकामा कँङा फेरी नीनाम्‍‌खम्‌पीका आता ग्‍यायाक आर्क सँलँवा ईनू‍ङ्, “खोपीक अँ मीनाचीतो, लतानीमा भानानी, खन्‍धँने आनानीसँ ऊम्‍खँपी होलीनीक छी, मकामा खोसावा तक दान्‍डा आनानीवासँ तोमाछी। 5ऊम्‍खँची नीनाम्‍‌खम्‌पी पूरीचूम्‍चूम् छाक तूई। मकामा नीनाबूङ्‍वा ऊम्‍खँसापी चालँवालाई मीनयीक तूई। 6खोसावा यँ मूक तूई मोङा आनानीवा खोलाई प्‍यानूम्, ऊम्‍चालँवापीकासँ दब्‍बर खोलाई प्‍यानूम्, मकामा खोसावा ऊम्‍खोँ प्‍याब्‍मेनाचीकपी आझाई मारी प्‍याबतो खोलाई प्‍यानूम्। 7खोसावा धाई मारी हँसहँलँ मूमा ऊम्‍हँपालाई दीम्‍दीम्‍ध मूनाची, मूतोङा खोलाई कास्‍टा प्‍यानूम्, मकामा खो बीलापा मूकाबी छूने। यँमाधँ खोसावा याक्‍तँ खूर्तो लोनीची, ‘कँ ढ्‍याप्‍पा हँमा छँमा तूङक तूई, कँने तँपा स्‍याक मीमाछा मन खकामा कँ हाल्‍लोसँ बीलापा मूमा छीन।’ 8आतामा ईलेपीङा खोछोपी सीमारी, बीलापा मूमाकलो सूसँवामी बीपतीची ती। खकामा खोलाई मीवा हूयी, यँमाधँ ऊम्‍न्‍याया मूकाबी परमप्रभू नीनाबूङ् झारापीका ढ्‍याप्‍पा ऊम्‍रलोक तूई।” 9खतालो खोलो कलवा मूकाबीची, हँसहँलँ मूकाबी खँदीमाक हँची, मक साप्‍सेमालाई मीवा हूयीक मीकूमा तचीलो, मक साप्‍सेमामी लागी मारी बीलापा मूतो खापीमी। 10मकसावा तूक दान्‍डामी कीमावा खोची मेथाम्‌ङा रीपीमीमा गीमी, “धाई कीमालीकल्‍या! धाई कीमालीकल्‍या! आना ढ्‍याप्‍पा साप्‍सेमा, ढ्‍याप्‍पा रलोक बेबीलोन! ऊछीनाङा आनावा तोमाक दान्‍डा आनापी ता।” 11खँदीमापी ब्‍यापारा मूकाबीची मक बेबीलोनवा कास्‍टा तक तचीलो मारी खापीमीहँ बीलापा मीची, यँमाधँ हने नाप्‍कानापे ऊम्‍चू ब्‍यापारामी सामाना आसासँ हाल्‍लोसँ खीतचीन। 12मक सामानाचीबो नकची ह: रीमा, छँमी, मारी म़ङ्‍ग पत्‍थारा, मोती खकामा मलमलमी तेची, बाईजानी राङ्‍क ते, रेसममी खकामा हालालाक तेची मकामा झारा खाले चानीतो नामीक सू‍ङ्, हातीमी कँवा बानामाक झारा मालसामानाची खकामा म़ङ्‍ग सूङ्‍मी सामानाची, मकामा काँसामी, मीकामी, सीङ्‍गर्ममर्‌मी सामानाची, 13खकामा दाल्‍चीनी, मासाला, मारी चानीतो नामीक धूपा, मूर्रा, अम्‍बललक धूपा, आङ्‍गूरामी खमवा, क्‍याप्‍ला, मसीन खबूल्, दँच्‍यार्, पीची-मेसीची, लूक्‍साची, चसूपाची, रथची, चापँवाछा-चापँवामेची, खकामा आरू मीनाची ह। 14खोचीवा गीमी, “बेबीलोन, आम्‍सानूवावा नतूक खान्‍नोक झारा थोका आनापीका खाल्‍ताक तूई। खकामा चानीक चामाक थोका, मारी म़ङ्‍ग आम्‍झारा सामानाची आनावा मासूनाक तूई। हने मक आनावा हाल्‍लोसँ तनाना।” 15नक सामानाचीमी ब्‍यापारा मूकाबीचीवा, मक साप्‍सेमापी ब्‍यापारा मूचीमा मारी बूलूमी छामीक तूवा, खोची मकछोपी तीःक कास्‍टामी कीमावा मेथाम्‌ङा रीपीमीहँ ढ्‍याप्‍पा सँलँवापी खापीमीमा बीलापा मीची, 16“धाई कीमालीकल्‍या! धाई कीमालीकल्‍या! मक ढ्‍याप्‍पा साप्‍सेमा, खो मलमलमी ते, बाईजनी खकामा हालालाक ते हूप्‍सूमा, रीमा, मारी म़ङ्‍ग पत्‍थरावा खकामा मोतीवा चँनाचीक तूवा। 17यँमाधँ ऊच्‍छीनाङा ऊत्‍तोसार मारी बूलूदँची नास्‍टा छाक तूई।” खकामा झारा पानी जाहाजक काप्‍तानाची, मकामा पानी जाहाजपीका लाम्‍दूम्‍काबीची, मकामा पानी जाहाज कूदामूकाबीची, होङ्‍कामापीङा ब्‍यापारा मूकाबीची मेथाम्‌पीङा रीपामी, 18खकामा मक ढ्‍याप्‍पा साप्‍सेमा मीवा हूयामा लताक मीकूमा तूचीलो पातामीमा ग्‍यामी, “मक ढ्‍याप्‍पा साप्‍सेमातोक हाक्‍क आरू ढ्‍याप्‍पा साप्‍सेमा तूवा?” 19मकामा खोचीवा ऊम्‍चू ऊम्‍चू तखलपी भा तीऊचीमा खाप्‍तो बीलाऊना मूतो आता ग्‍यामीमा पातामी, “धाई कीमालीकल्‍या! धाई कीमालीकल्‍या! होङ्‍कामापी पानी जाहाजापी छूकाबी झारा मक ढ्‍याप्‍पा साप्‍सेमामी ऊम्‍बूलूलामा बूलूमी छामीक तूवा। मक साप्‍सेमा ऊछीनाङा नास्‍टा छाखाता। 20नीनाम्‍खम् मक साप्‍सेमावा दान्‍डा तू:कपी आना दीम्‍दीम्‍ध छा! मकामा पबीत्‍रा मीनाची, प्रेरीतची, खकामा अगम्‍बक्‍ताची आनानीसँ दीम्‍दीम्‍ध छानी, यँमाधँ आनानीलाई यँता म्‍यानी मातामाङा नीनाबूङ्‍वा ऊम्‍न्‍याया मूमा दान्‍डा पीऊक तूई।” 21खकामा ईत्‍ता ऊम्‍रलोक स्‍वर्गादूतवा, ईत्‍ता बूम्‍लीमातीका ङीसाक ढ्‍याप्‍पा लूङ् थ्‍यातूमा होङ्‍कामाहँपी आता गूँतो झाकूधातू, “आतामा कीमालोतो मक ढ्‍याप्‍पा साप्‍सेमा बेबीलोनसँ झाकीतीकी खकामा खोलाई हाल्‍लोसँ छीपीन। 22बीना धूब्‍काबीचीमी, छाम् पोकाबीचीमी, मूरोली धूप्‍काबीचीमी खकामा धूधूमा धूप्‍काबीचीमी सँलँवा आनापी हाल्‍लोसँ ईनीन। खकामा आनापी हने हाल्‍लोसँ सीकीया परीयामी चालँवा मूकाबीची छीपीमीन। आनापी बूम्‍लीमामी सँलँवासँ हाल्‍लोसँ ईनीन। 23मीकूछूमी छ फेरी हने आनापी हाल्‍लोसँ छ्‌यालन। खकामा नाम्‍तँपा नाम्‍तँमामी सँलँवासँ आनापी फेरी हाल्‍लोसँ ईनीन। आम्‍ब्‍यापारीची खँदीमापीक ढ्‍याप्‍पा ढ्‍याप्‍पा मीनाची तूवामी, मकामा आम्‍मान्‍तारावा झारा जाईची वालँ छामीक तूवा। 24मक बेबीलोन साप्‍सेमापीङा अगम्‍बक्‍ताचीमी, पबीत्‍रा मीनाचीमी खकामा खँदीमापी सीताकची झारामी ही छीपाक तूई।”

will be added

X\