प्रकास 17

1मक सावाबो खोँ लप्‍काबी सावाबो स्‍वर्गादूतचीहँपीक ईत्‍ता कँपी भानामा कँलाई लँ, “नापे कँलो भाना कँ आनालाई मक मारी काँवाछोपी तूवाक साफी कलवा मूकाबी मीमाछालाई प्‍याक दान्‍डा खँमेनी। 2खोलो खँदीमाक हँचीवा कलवा मूची, मकामा खँदीमापी तूकाबीचीवा ऊम्‍कलवामी खमवा दूङूचीमा सीतूचीक तूई।” 3खकामा कँलाई स्‍वर्गादूतवा आत्‍मापी खरोमा थाम्‍पूङ्‍पी खूरँखायँ। मकामा कँङा मपी हालाला ङीसीक पसूछोपी तूवायाक ईत्‍ता मीमाछा तू‍ङ्, मक पसूछोपी नीनाबूङ्‍मी दोधूम् पोमाक खा छाबाक तूवा, मक पसूमीबो सावाबो तखललो ईत्‍होप् सँ तूवा। 4मक मीमाछावा बाईजानी खकामा हालालाक ते हूप्‍सूक तूवा, खकामा खो ऊम्‍रीराम्‌पी रीमामी ललवालो मारी म़ङ्‍ग मूगा मोतीवा चनाचीक तूवा। खकामा चीमालीक थोकाचीलो, ऊम्‍कलवाक ईसीक थोकावा प्‍याबूक रीमामी खोँ खोसावा ऊम्‍हूपी लापूक तूवा। 5ऊम्‍तँबूछूपी आर्था तेमा दूरीनक ईत्‍ता नूङ् छाबाक तूवा, खँदीमाक कलवा मूकाबीचीमी मकामा चीमालीक थोकामी मा मक ढ्‍याप्‍पा बेबीलोन! 6खकामा पबीत्‍रा मीनाचीमी हीवा, येसूमी साँछी पीऊचीकमी गार्नावा सीतूचीकमी हीवा मक मीमाछा सीतूक कँङा तूङ्। कँ खोलाई तूङ्‍लो मारी अतलल छँखातँ। 7मप्‍का पाछी स्‍वर्गादूतवा कँलाई लँ, “आना धँमा अतलल छीनाक? कँ आनालाई मक मीमाछालाई खूर्माकी सावाबो तखल खकामा ईत्‍होप् सँ तूईक पसूमी रहस्‍सेमी खा लोनी। 8आनावा तूनाक मक पसू ईखेपा तूवा खताधँसँ हने मक मान्‍तू, हने मक साधाईलाई नास्‍टा छूसी खाईमालाई सी:मीक मीनाची छीमीक खम्‌पीका पाखा लईमा गीहँक तूई। साप्‍तेमूलूङ् लीसाकपीका नापे पोसूङ्‍वामी कीतापापी नूङ् छाबाक मान्‍तूक खँदीमापी तूकाबी झारा मीनाची मक पसूलाई तचीलो अतलल छीखातीमी, यँमाधँ मक ऊलेपी तूवा खताधँसँ होतोलो खो मान्‍तू। खकामा खो फेरी ती। 9“नकलाईङा नूवामीमी नूवा लम्: मक सावाबो तखलची सावाबो पप्‍चीलाची ह, मकछोपी मक मीमाछा तूवाक तूई। 10नक सावाबो तखलची, सावाबो हँचीसँ ह। मकामा खोचीहँपीक स्‍यादूरामीक नँकाबो छादूराक तूई, ईत्‍ता हँबो होतोलोसँ तूईहँ। बँकी ईत्‍ताबो आझाईसँ तीहँन। यँ बेला ती खोस चसी दँमा मात्‍ताई सासाना मी। 11मक पसू, पाईला तूवा, खतालोने खो होतोलो मान्‍तू। खोबो रेकाकबो हँ ह। खकामा खो आरू सावाबोहँपीकङा ह मकमीसँ ऊम्‍सार्बनासा छी। 12खकामा आनावा तूनाक मक ईत्‍होप् सँबो ईत्‍होप् हँची ह। खोचीवा होतोलोसाम्‍म सासाना मूमा थालामीहँचीन। खताधँसँ खोचीवा मक पसूलोङा हँतीका सासाना मूमाक आधीकारा चसी दँमातो मात्‍ताई तची। 13नकची झारामी ईत्‍ताङा सानूवा तूई, खकामा खोचीवा ऊम्‍चू र, आधीकारा मक पसूलाई प्‍यची। 14खकामा थूमा खोचीलो म़ीमा खोचीछोपी जीताछी, यँमाधँ थूमा प्रभूचीमीसँ प्रभू मकामा हँचीमीसँ हँ ह। थूमालाई तीङ्‍काबीचीबो काछामीक, छ्‌यातामीक, बीस्‍वसयोग्‍या मीनाची ह।” 15खकामा स्‍वर्गादूतवा कँलाई लँ, “आनावा तूनाक मक कलवामे तूवाक काँवाचीबो मीनाची, मारी पीपीछूर्छूर् मीनाची, जाईची खकामा गूँची ह। 16आनावा तूनाक मक ईत्‍होप् सँचीवा खकामा मक पसूवा मक कलवामेलाई छीङची। खकामा खोलाई ऊम्‍हँपा मकामा नाङ्‍गाई म्‍यची, मकामा ऊम्‍सा चीची खकामा खोलाई मीपी हूयचीहँ नास्‍टा म्‍यची। 17नीनाबूङ्‍मी ऊम्‍खा तालीनतो खोचीवा तोङ्‍मामा ऊम्‍चू सासाना मूमाक र मक पसूलाई प्‍यची। आतामा ऊम्‍सानूवातीकाक खा ताल्‍मेमालाई नीनाबूङ्‍वा मातीकाक सानूवा ऊम्‍चू सागूँवापी तेपीऊची। 18आनावा तूनाक मक मीमाछाबो खँदीमाक झारा हँचीछोपी सासाना मूकाबी मक ढ्‍याप्‍पा साप्‍सेमा ह।”

will be added

X\