मत्‍ती 8

1खो पप्‍चीलाछोपीका धातामा पीपीछूर्छूर् मीनाचीवा खोलाई तीङूची। 2ईत्‍ता छवायँ सामवा लापूक मीना येसूधपी ता खकामा ऊम्‍लाम्‍लोपी बबाहँ आता ग्‍या, “प्रभू, आनानीवा कँलाई नोमेमाक सानूवा मीनूम्‌धँ कँलाई नोमेमा दूरेनी।” 3खकामा येसूवा ऊम्‍हू सतूमा खोलाई तोपूहँ लू, “आना नो गूँमाक अँ सानूवा तूई।” खोतोलोङा छवायँ सामवा लापूक मीना नोखाता। 4खकामा येसूवा खोलाई लू, “नापी ईनू, नक खा आसालाईसँ लून। खन्‍धँसँ पूजारीपी खाताहँ खोलो खँमेनाची, खकामा मोसामी आग्‍यातीका मीनाचीमी प्रामानाक लागी आना नोनाकपी नीनाबूङ् दब्‍माक खीम्‌पी बूलूदाम् तीऊ।” 5येसू कफर्नहूमपी वँङामा ईत्‍ता रोमी तीलीङ्‍गेमी तँबप् खोधपी ताहँ आतामा बीन्‍ती मूतो ग्‍या, 6“प्रभू, अँ चापँवाछा ऊम्‍लँ हू तमा दूरनक सामवा लापूमा मारी दूखा तूहँ खीम्‌पी ठङ्‍पी सतीयीक तूई।” 7खकामा येसूवा खोलाई लू, “कँ आम्‍खीम्‌पी खातँमा खोलाई नोम्‍यँ।” 8खतालो मक तीलीङ्‍गेमी तँबप्‌वा येसूलाई लू, “प्रभू, कँ आनानीलाई अँ खीम्‌पी लाम्‌तूपा मूमासँ खात्‍तेन। आनानीवा नी मात्‍ताई ग्‍यानी खतालो अँ चापँवाछा नीखाती। 9यँमाधँ कँसँ आधीकारीचीमी हूपी तूङ, खकामा तीलीङ्‍गेचीसँ अँ हूपी तूईमी। खकामा कँङावा ईत्‍तालाई ‘खाता’ लँ, खकामा खो खाती, आर्कलाई ‘नापे भाना’ लँ, खतालो खो बानी। अँ चापँवाछालाई ‘आता मू’ लँ, खकामा खोसावा मी।” 10नक मीनामी खा ईनूलो येसू अतलल छाखाता, खकामा खोलाई तीङ्‍काबीचीलाई खोसावा लूची, “कँ ऊम्‍छूङ्‍ङा, आनानीलाई लोनीनी, ईस्राएलपीसँ कँङावा ऊत्‍तोक बीस्‍वसा तूङ्‍क तूवान। 11कँ आनानीलाई लोनीनी, नाम्‌ओप्‍सालो नाम्‌कूर्सालामा मारी मीनाची तीमी खकामा अब्राहाम, ईसहाक खकामा याकूबलो नीनाम्‍खम्‌मी हालाखम्‌क भोजापी तूईमी। 12खतालोने नीनाबूङ्‍मी हालाखम्‌पी छूमा छाक मीनाची मपीका पाखाक माकाचूचूक खम्‌पी कात्‍तीमी। मपी मीनाचीवा खाप्‍तो खाईसीतो ऊम्‍चू कँ खची।” 13खकामा येसूवा मक तीलीङ्‍गेमी तँबप्‌लाई लू, “हने आना खाता, खकामा आनावा बीस्‍वसा मूनातीकाङा आनालाई छूने।” खतालोने मक चापँवाछा खोतोलोङा नोखाता। 14येसू पत्‍रूसमी खीम्‌पी खाता खतालो पत्‍रूसमी छूमे धीतूहँ ठङ्‍पी ईम्‍सायाक खोसावा तू। 15खकामा येसूवा खोलाई ऊम्‍हूपी तोपू, खतालो खो धीतूक नोखाता। खकामा खो पोकाहँ, येसूमी स्‍यावा मू। 16खकामा नाम्‌कूरामा मीनाचीवा चाप्‌वा लापूचीक साफी मीनाचीलाई येसूधपी तातूची। खकामा खोसावा चाप्‌चीलाई बचानालामाङा लातूची, खकामा सामवा लापूचीकतो झारालाईङा खोसावा नोमीऊची। 17यसाईया अगम्‍बक्‍तावा ग्‍याक खा ताल्‍माक लागी खोसावा नक चालँवा मूक ह, “खो ऊम्‍हँपावाङा एझारा दूर्बलताची खायू, खकामा एसामची खूरू खायू।” 18खकामा येसूवा ऊम्‍मेक्‍कानापेका पीपीछूर्छूर् मीनाचीलाई तूचीमा ऊम्‍सीच्‍चेचीलाई होङ्‍कामामी मेक्‍कधे खाईमाक आग्‍या पीऊची। 19ईत्‍ता ब्‍यबस्‍था चेकाबी तकी येसूधपी बानामा खोलाई लू, “तँबप्, आनानी हापी हापी खातीनी, कँसँ आनानीलोङा खातँ।” 20खकामा येसूवा खोलाई लू, “स्‍यालाचीमी खदूङ्‍ची छी खकामा पीरीक छँवाचीमी वयँची तूई, खतालोने मीनामी छामीने ऊम्‍तखल यूमाक खम्‌सँ मान्‍तू।” 21खकामा ऊम्‍सीच्‍चेचीहँपीक आर्क ईत्‍तावा ग्‍या, “प्रभू, कँलाई खाईमामा पाईला अँ पालाई खूम्‍माक अनूमती प्‍यँनूम्।” 22खकामा येसूवा खोलाई लू, “कँलाई तीङ, मूर्दाचीवाङा ऊम्‍चू मूर्दाची खूमूचीने।” 23येसू नाऊपी वँङा खकामा ऊम्‍सीच्‍चेचीसँ खोलोङा वँङामीहँ खातामी। 24खकामा मक होङ्‍कामापी ढ्‍याप्‍पा हूवा ता, खकामा काँवामी छाल्‍कवा नाऊ प्‍याबूहँ होप्‍मा थालामू। खतालो येसू ईम्‍साचाक तूवा। 25खलो सीच्‍चेची तामीमा येसूलाई आता लोतो पोकूची, “काए सीमा गेहँ प्रभू! लेमेकानूम्।” 26खकामा येसूवा खोचीलाई लूची, “अबीस्‍वसीचेऊ, यँमा आनानी कीसीनीक?” खकामा खो पोकामा हूवालो होङ्‍कामालाई पायू, खकामा मक हूवा नोखाता। 27खोची नक चालँवा तूचीलो अतलल छाखातामीहँ ग्‍यामी, “नक मीनाने यँतीकाकल्‍या, हूवालो होङ्‍कामावासँ खोसावा गीक खा र्‌याबची।” 28खकामा खोची मेक्‍कधे गदरीनीचीमी थाम्‍पूङ्‍पी तालामी, खतालो चाप्‌वा लापूचीक हीसा मीनाची सूलूम्‌पीका ताहँचीलो येसूलाई तूपाचू। खोची साफी कीमालीक तूवाचीकसावा मक लाम्‌लामा आसासँ खाईमा बाईमा दूरूचीक तूवान। 29खकामा खोची साङ्‍गाई पाताचीमा ग्‍याची, “नीनाबूङ्‍मी छा, काएकालो आम्‍नूमी यँ चालँवाल्‍या? आम्‍का दँमा ताल्‍माम्‍पा आनानी काएकालाई दान्‍डा पीसी तानीक ह?” 30खोचीपीका चसी भेपा ईहूला भची चायाचामीक तूवा। 31चाप्‌चीवा येसूलो आता ग्‍यामीमा बीन्‍ती मूची, “आनानीवा काएकालाई लातेकानूम्‌धँ, काएकालाई भमी हूलापी पसेकानूम्।” 32खकामा खोसावा खोचीलाई, “खातानी” लूची। खकामा खोची लतामीमा खातामीहँ भचीहँपी वँङामी, खकामा झारा भमी हूला भूल्‍तो खातामीहँ धाम्‍रपीका हूलामीमा होङ्‍कामापी होपामीहँ स्‍यामी। 33खकामा मक भ चाईकाबीची झारा फूसामीमा साप्‍सेमापी खातामी खकामा मक चाप्‌वा लापूचीक मीनाचीलाई यँ यँ छाक तूवा मक झारा खोचीलाई लूची। 34खकामा झारा साप्‍सेमापीक मीनाची येसूलाई तूप्‍सी तामी, खकामा खोचीवा येसूलाई तूचीमा आम्‍का थाम्‍पूङ्‍पीका खाल्‍तानी लूचीमा बीन्‍ती मीऊची।

will be added

X\