मत्‍ती 7

1“आरूचीमी न्‍याया मानूम्‌न, खकामा आम्‍नूमीसँ न्‍याया छूनने। 2यँमाधँ यँतामा आनानीवा आरूचीमी न्‍याया मीनूम्, मातामाङा आम्‍नूमीसँ न्‍याया छी। खकामा हाक्‍क तूङ्‍वा आनानीवा आरूलाई तूसूनूम् मक तूङ्‍वाङा आनानीलाईसँ तूसीनी। 3“यँमा आनावा आम्‍नूछमी मूपी वँङाक बसीप् तना, खन्‍धँसँ आनावा आम्‍मूपीक तूप्‍सूङ्‍बो फूम् मीनाना? 4आम्‍मूपीङा तूप्‍सूङ् तूईधँ, यँतामा आम्‍नूछलाई आनावा लोमा दूरना, ‘आम्‍मूपीका मक बसीप् लाईमा प्‍यँ।’ 5ए कूमेटी, पाईला आम्‍मूपीका तूप्‍सूङ् लातू, खकामा आम्‍नूछमी मूपीका बसीप् लाईमा खान्‍नीतो तना। 6“खकामा आनानी नीक थोका होगालाई प्‍यानूम्‌न, खकामा आम्‍नू मोतीची भमी लाम्‍लोपी यूसानूम्‌न। माता मीनाधँने मकसावा ऊम्‍लँवा हील खकामा लासीहँ आनालाई खसी भूत्‍तीना। 7“ङाकानूम्, आनानीवा तूनूम्, लामूनूम्‌धँ छीपूनूम्, खकामा दूवारेखू हईलामीनीधँ आम्‍नूमी लागी हती। 8यँमाधँ आसावा ङाक, खोसावा त, आसावा लाम, खोसावा छीप, खकामा आसावा दूवारेखू हईलामी, खोमी लागी हती। 9“ऊम्‍छावा सोफ ङाकलो लूङ् पीकाबी आनानीहँपी आसा आतीकाक पा तूईनी? 10खकामा झीकूसा ङाकलो आसावा ऊम्‍छालाई पू प्‍य? 11आतामा आनानी खँसापी छीनीमासँ, आम्‍नू छाछाचीलाई खान्‍नीक थोका पीमा ङीसूनूम्‌धँ, नीनाम्‍खम्‌पी तूकाबी आम्‍नू पावा खोलो ङकाबीचीलाई धाई मारी खान्‍नीक थोका प्‍यची। 12आरूचीलामा आना यँता मूलामीना खोचीलाईसँ आनावा माताङा मीऊची, यँमाधँ मोसामी ब्‍यबस्‍थालो अगम्‍बक्‍ताचीवा च्‍यातेमीक नूवाताया नकङा ह। 13“स्‍यान दूवारेखूलामा खीम वँङानी, यँमाधँ बीनासापी खाईमाक लाम् ढ्‍याप्‍पालो साजील तूई, खकामा नकलामा वँकाबीची साफी तूईमी। 14यँमाधँ हाल्‍लोसँ सीनक पोसूङ्‍वा तोमाक दूवारेखू स्‍यान खकामा गार तूई, खताधँसँ मकसावा लीतेयेक पोसूङ्‍वापी छसे। खकामा मक छीब्‍काबीची चसी मात्‍ताई छीमी। 15“वालँ अगम्‍बक्‍ताचीपीका नूवा याकानी, यँमाधँ खोची आनानीहँपी लूक्‍साचीतीका छीमीमा तीमी, खताधँसँ ऊम्‍छूङ्‍ङा खोची ऊम्‍चू सानूवाहँपी वलीखाक हूक्‍साचीतीकाक छीमी। 16आनानीवा खोचीलाई ऊम्‍चू चालँवालामा छेमा दूरानूम्। यँमाधँ तीतूङ्‍मी पोपी आङ्‍गूरा खकामा सीऊडीपी आन्‍जीरा कसीहँ बीताम्‌हँल्‍या? 17आतामा खान्‍नीक पो खान्‍नीकङा कसी। मातामाङा खाईसीक पो खाईसीकङा कसी। 18यँतामा खान्‍नीक पोवा खाईसीक चासी कमेमा दूरन, मातामाङा खाईसीक पोवा खान्‍नीक चासी कमेमा दूरन। 19खान्‍नीक चासी मन्‍कमाकी झारा पो कीबीमा धीसीहँ मीपी हूयी। 20आतामा मातीकाक वालँ अगम्‍बक्‍ताचीलाई ऊम्‍चू चालँवापीका आनानी छ्‌यातानूम्। 21“कँलाई ‘प्रभू, प्रभू’ लोकाबीची झारा नीनाबूङ्‍मी हालाखम्‌पी वँमा तचीन। नीनाम्‍खम्‌पी तूकाबी अँ पामी सानूवातीका मूकाबी मात्‍ताई नीनाम्‍खम्‌पी वँमा तची। 22मक लेपी साफीवा कँलाई लेमी, ‘प्रभू, प्रभू, काएका आम्‍नू नूङ्‍पी अगम्‍बानी नीनेकाक तूई, खकामा आम्‍नू नूङ्‍पी चाप्‌ची कलूम्‌काक तूई, खकामा आम्‍नू नूङ्‍पी साफी रमी चालँवा मूम्‌काक तूई।’ 23खतालो कँ खोचीलाई खान्‍नीतो लँचूङ्, ‘कँ आनानीलाई हाल्‍लोसँ छेनीहँनीनीन। काचूवाकोईमी चालँवा मूकाबीचेऊ, कँपीका मेथाम् खातानी।’ 24“आतामा आसावा नक अँ खाची ईन खकामा अँ खावा गीतीका पीकी, कँ मकलाई चाट्‍टानाछोपी खीम् थोकाबी नूवामीतीकाक लँ। 25वासोरा, भला ता खकामा हूवा मूमा मक खीम्‌पी ठकाछालोसँ मक खीम् होतान। यँमाधँ मक चाट्‍टानाछोपी थक तूवा। 26खकामा आसावा नक अँ खाची ईनमासँ, अँ खावा गीतीका पीकीन, कँ मकलाई बालूवाछोपी खीम् थोकाबी अतँतीकाक लँ। 27वासोरा, भला ता खकामा हूवा मूमा मक खीम्‌पी ठकाछा, खतालोने मक खीम् होतातीङा, खकामा मक खीम्‌मी साफी खाईसीतो नासा छा।” 28येसूवा नक खा ग्‍यादूरामा पीपीछूर्छूर् मीनाची येसूमी नूवाताया ईनूचीहँ अतलल छाखातामी। 29यँमाधँ खोसावा ब्‍यबस्‍था चेकाबी ऊम्‍चू तकीचीतीका मन, खताधँसँ आधीकारा तूईक मीनाचीतीका च्‍यातूचीक तूवा।

will be added

X\