मत्‍ती 17

1मकमी चूकीबो लेपाछी येसूवा पत्‍रूस, याकूब खकामा याकूबमी नूछ यूहन्‍नालाई खोलो खायूचीमा ईत्‍ता आल्‍घ पप्‍चीलाछोपी एक्‍लासा थाम्‍पूङ्‍पी खातामी। 2खोतोलो मपी ऊम्‍चू लाम्‍लोपीङा येसूमी ङायूवा बाता। खकामा ऊम्‍ङाब नाम्‌तीकाङा छ्‌यालू खकामा ऊम्‍तेचीसँ छतीकाङा अम्‍बलल छाखाता। 3खकामा मपी सीच्‍चेचीवा एलीयालो मोसा येसूलो बाता पूचोचीक तूची। 4खतालो पत्‍रूसवा येसूलाई लू, “प्रभू, काए नापी तूयेक खान्‍नी। आतामा आनानीवा नतूनूम्‌धँ कँ नापी सूम्‍छी तूमाक खम् बानाम, ईत्‍ता आनानीलाई, ईत्‍ता मोसालाई, ईत्‍ता एलीयालाई।” 5खो नीनाहँतोङा चाम्‍कील ममूलावा खोचीलाई खबूखायूची, खकामा मक ममूलाहँपीका आताक ईत्‍ता सँलँवा लता, “नक अँ लालूखालोक यायाछा ह, कँ खोलो मारी दीम्‍दीम्‍ध छँक तूई, आनानीवा नकमी खा ईनानूम्।” 6सीच्‍चेची आतीकाक खा ईनूचीलो मारी कीसामीहँ भूईपी बबामी। 7खताधँसँ येसू खोचीधपी भानामा खोचीलाई तोपूचीमा लूची, “पोकानी, कीननी।” 8खकामा खोचीवा ऊम्‍चू मू हतूचीमा खाङूचीलो खोचीवा येसूलाई मात्‍ताई मपी तूची आरूची आसासँ मपी तूवामीन। 9खोची पप्‍चीलापीका धाताहँमीक तूवा, येसूवा खोचीलाई आग्‍या पीऊची, “मीनामी छा ऊसीमा पोकीनतो, आनानीवा नक दर्सनामी खा आसालाईसँ लनूम्‌न।” 10खकामा ऊम्‍सीच्‍चेचीवा खोलाई आता लूचीमा ततूची, “ब्‍यबस्‍था चेकाबी तकीचीवा यँमा पाईला एलीया तामाछी गीमीकल्‍या?” 11खोसावा खोचीलाई लूची, “ऊम्‍छूङ्‍ङा एलीया ती, खकामा झारा थोका फेरी बानामी। 12खताधँसँ कँ आनानीलाई लोनीनी, एलीया पाईलाङा तादूराक तूई, खतालोने मीनाचीवा खोलाई छ्‌यातूचीन, खकामा खोचीवा खोलाई यँता मूमा नतूची माताङा मूची। मातामाङा मीनामी छावासँ ऊम्‍चूहूपीका मारी दूखा ची।” 13खकामा ऊम्‍सीच्‍चेचीवा येसूवा काएलाई बप्‍तीस्‍मा पीकाबी यूहन्‍नामी बारेपी लेहँक राछ ग्‍यामीमा तूम्‍तूची। 14खकामा खोची पीपीछूर्छूर् मीनाची तूवामीक खम्‌धपी ताभानामीलो ईत्‍ता मीना येसूधपी भानामा ऊम्‍लाम्‍लोपी बबाहँ ग्‍या, 15“प्रभू, अँ वाच्‍छाछालाई सम् तूयानूम्‌या, यँमाधँ खोलाई छारे सामवा लापूक तूई खकामा मारी कास्‍टा तयीक तूई। खो कोईबेला मीपी वँङी खकामा कोईबेला काँवापी वँङी। 16कँङावा खोलाई आम्‍नू सीच्‍चेचीपी बायूङ् खतालोने खोचीवा खोलाई नोमेमा दूरूचीन।” 17खकामा येसूवा खोचीलाई लूची, “आनानी अल्‍पबीस्‍वसीची खकामा भ्रस्‍टा सूनाम्, कँ आनानीलो हाल्‍लोतो तूङ? खकामा कँ आनानीलाई धाई अमाल्‍या? खोलाई कँधपी बायानूम्।” 18येसूवा मक ईसीक आत्‍मालाई पायू खकामा मक आत्‍मा मक वाच्‍छाछापीका लतामा खाता। खकामा मक वाच्‍छाछा खोतोलोङा नोखाता। 19खकामा सीच्‍चेची आसावासँ तूम्‍तोमाम्‍पा येसूधपी तामीमा खोलाई ततूची, “काएकावा मकलाई यँमा लाईमा दूरूम्‌कानक?” 20खकामा येसूवा खोचीलाई लूची, “आम्‍नू अल्‍पबीस्‍वसामी गार्नावा ह। कँ आनानीलाई ऊम्‍छूङ्‍ङा लोनीनी, आनानीलो रायोमी दानातोक मात्‍ताई आम्‍नू बीस्‍वसा तूईधँसँ ‘नक पप्‍चीलालाई नापीका सयाखाता’ लूनूम्‌लो मक सयीखाती। खकामा आम्‍नूमी लागी छूमादूरनक यँ थोकासँ छीन। 21[खताधँसँ आतीकाक आत्‍माबो नीनाबूङ् दब्‍मालो ङोयाङ्‍माम्‍पा लतीन।]” 22खकामा खोची गालीलपी ङायूवा तूपूचीलो येसूवा खोचीलाई लूची, “मीनामी छालाई मीनाचीमी हूपी प्‍यतीङची। 23खकामा खोचीवा खोलाई सीतची, खताधँसँ खो सूम्‍छी लेपी ऊसीमा पोकी।” खतालो सीच्‍चेचीमी मारी ऊम्‍चू सानूवा चाईसा। 24खकामा खोची कफर्नहूम ताभानामी, खतालो नीनाबूङ् दब्‍माक खीम्‌पी तीराऊ लाप्‍काबीची पत्‍रूसधपी भानामीहँ खोलाई लूची, “यँ आम्‍नू तँबप्‌वा तीराऊ छोरहँल्‍या?” 25खतालो पत्‍रूसवा खोचीलाई लूची, “अँ खोसावा छोर।” खकामा पत्‍रूस खीम वँङालो येसूवा खोलाई ततू, “सीमोन यँता दाब्‍नीचीना? साप्‍तेमूलूङ्‍क हँचीवा तीराऊ आसापीका पोकची? ऊम्‍चू नाम्‍दक मीनाचीपीका ले बीदेसीचीपीका?” 26खतालो पत्‍रूसवा ग्‍या, “बीदेसीचीपीका” खकामा येसूवा खोलाई लू, “खताधँ ऊम्‍चूनाम्‍दक मीनाचीवाबो छँमा छानक राछ। 27खताधँसँ खोची काएचीपीका रूपूचीनने गूँमाकसावा, हने होङ्‍कामापी खातामा ङा दयू खकामा पाईला सीतनाक ङा बायू। आनावा मक ङामी ङो हतनालो ऊम्‍ङोपी छँमीमी बूलू छीपना। खकामा आना खातामा मक आम्‍मीलो अँमी लागी खोचीलाई तीराऊ छोरू।”

will be added

X\