मर्कूस 4

1येसूवा फेरीसँ मीनाचीलाई होङ्‍कामाधपी च्‍यातूहँचीलो पीपीछूर्छूर् मीनाची छामीकसावा खोसावा तूमाक खम् छीपून, मातामा येसू नाऊपी वँङामा तूवा, खलो झारा मीनाची होङ्‍कामाधपीक पाखापी तूवामीक तूवा। 2खकामा येसूवा मीनाचीलाई आहानाचीपीका साफी खाची च्‍यातूची। खोसावा खोचीलाई ऊम्‍सीक्‍छेपी आता लूची, 3“नापी ईनानूम्! ईत्‍ता मीना चाल्‍यवा न्‍याब्‍सी लता। 4खोसावा चाल्‍यवा न्‍याबूलो कोई लाम्‌पी धा, मक चाल्‍यवा छँवाची तामीमा कोपू चोखायूची। 5कोई लूङ्‍कँलापी धा, मकपी साफी भा मान्‍तूवाकसा चँरङा लीमालाता। यँमाधँ मपी गाईर भा तूवान। 6खकामा ऊम्‍साम् साफी मान्‍तूवाकसावा नाम् नोलोने हसाहँ योमाधाता। 7कोई चाल्‍यवा तीतूङ्‍लापी धा खकामा तीतूङ्‍मी पो लीमाहँ चाल्‍यवालाई नीऊखायू मकामा पोर्माहँ खान्‍नीतो कमा पीऊन। 8माताधँसँ कोई चाल्‍यवा खान्‍नीक भा तूवाक खम्‌पी धा मकामा लीमाहँ सूम्‍होप् गूना, चूक्‍होप् गूना, खकामा ईत्‍तोङ् गूना कसा।” 9खकामा येसूवा मीनाचीलाई लूची, “नाब तूईक झारावा नापी ईनानूम्।” 10येसू ऊम्‍हँपा तूवालो, ईत्‍हीस् ऊम्‍सीच्‍चेचीलो ऊम्‍मेक्‍कानापेका तूकाबीची खोधपी तामी खकामा खोचीवा आहानामी आर्था यँल्‍या ग्‍यामीमा खोलाई ततूची। 11येसूवा खोचीलाई लूची, “नीनाबूङ्‍मी हालाखम्‌मी रहस्‍से आनानीलाई प्‍यानीक तूई, खन्‍धँसँ आरूचीलाईबो आहानाचीपी लीःमी 12खताधँसँ, ‘खोचीवा खँमाने खाङची, खतालोने तचीन, ईन्‍माने ईनची खोचीवा ङीसचीन, खोचीवा तूचीमा ङीसूचीकधँने खँ मूमा छीतूचीहँ ऊम्‍चू सानूवा नीनाबूङ्‍लाम्‍पे लासूचीक, खकामा ऊम्‍चू खँधाताक’!” 13येसूवा खोचीलाई लूची, “यँ आनानीवा नक आहाना ङीसूनूम्‌न? नक आहाना ङीसूनूम्‌नधँ आरू आहाना यँतामा ङीसूनूम्। 14चाल्‍यवा न्‍याब्‍काबीवा नीनाबूङ्‍मी खा न्‍याब। 15लाम्‌पी न्‍याबीक चाल्‍यवा नकतीकाङा ह, खोचीवा नीनाबूङ्‍मी खा ईन्‍माने ईनची खतालोने साईताना तीःमा खोचीहँपी न्‍याबाक नीनाबूङ्‍मी खा खोतोलोङा खायलात। 16मातामाङा लूङ्‍कँलापी न्‍याबीक चाल्‍यवा नकची ह, खोचीवा नीनाबूङ्‍मी खा ईनचीमत्‍तो हँसहँलँ छूतो बीस्‍वसा मीची। 17खतालोने ऊम्‍चू साम् गाईर छीनकसावा खोची ऊच्‍छीना मात्‍ताई बीस्‍वसा मीची, आतामा नीनाबूङ्‍मी खामी खातीरापी खोचीवा सतावट तचीलो खोची धीसीमी। 18तीतूङ्‍लापी न्‍याबीक चाल्‍यवा नकची ह, खोचीवा नीनाबूङ्‍मी खा इनची, 19खकामा ऊम्‍चू सानूवा साप्‍तेमूलूङ्‍लाम्‍पेक खापी, बूलूपी, बूलूदँपी आनेकओलामी झालीपी छी, मातामा खोचीवा नीनाबूङ्‍मी खा मातसीची खकामा नीनाबूङ्‍मी खा कमा दूरन। 20खान्‍नीक भापी न्‍याबीक चाल्‍यवा नकची ह, खोचीवा पाईला नीनाबूङ्‍मी खा ईनचीहँ लापची खकामा कमाथालामी खकामा सूम्‍होप् गूना, चूक्‍होप् गूना, ईत्‍तोङ् गूना कसी।” 21खकामा येसूवा खोचीलाई ततूची, “मीनाचीवा मीकूछू दयचीमा पाथीहँपीलो खँप्‍तँसूङ्‍खीलीपी यूसचीले, हापी यूसची? यँ खोचीवा बाकालाछोपी यूङ्‍मालाई मीकूछू दयचीक मन? 22मीनाचीवा तूम्‍तचीनतो सूलामा यूसाक यँथोकासँ मान्‍तू, खकामा मीनाचीवा ङीसचीनतो यूसाक गोप्‍या थोका यँसँ मान्‍तू। 23मीनामी ईन्‍माक नाब तूईधँ खोसावा ईनूने।” 24खोसावा फेरीसँ मीनाचीलाई लूची, “आनानीवा यँ ईनूनूम्, मपी आम्‍नू सानूवा त्‍यानूम्। यँतामा आनानीवा थाबूनूम्‍मा पीऊनूम् मातामाङा आनानीलाईसँ थाबीमाङा पीःनी मपीकासँ मारीङा आनानीलाई पीःनी। 25यँमाधँ आसालो तूई खोसावा आझाई मारी त, आसालो मान्‍तू खोलो चसी तूईकसँ ङाबी।” 26येसूवा ग्‍या, “नीनाबूङ्‍मी हालाखम् आतीकाक तूई, मक कोई ईत्‍ता मीनावा लापी चाल्‍यवा नेबतीकाङा ह, 27खकामा खो ईम्‍सीधँसँ ईम्‍सीनधँसँ मक चाल्‍यवा लेपा सेपा लीमीमा पोरी, न्‍याब्‍काबी मीनावा मक यँतामा पोरी गूँमा ङीसन। 28चाल्‍यवा ऊम्‍हँपा भापी लीमी खकामा पाईला टूसा त्‍य, खकामा पोरीहँ बाला त्‍यमा कसी। 29खकामा चासूम् तूमीमत्‍तो खो बछू खायमा खातीहँ चासूम् बीत यँमाधँ नक चासूम् बीमाक दँमा ह।” 30येसूवा फेरीसँ ग्‍या, “नीनाबूङ्‍मी हालाखम् यँतीकाक तूई गूँमाल्‍या? कँ हाक्‍क आहानापीका नकमी बारेपी खान्‍नीतो गूँमाल्‍या? 31नकने रायोमी चाल्‍यवातीकाक तूई, नक लापी न्‍याबी, नक खँदीमापी झारा चाल्‍यवाहँपी स्‍यान छीधँसँ, 32नक न्‍याबीमा लीमीहँ पोरी, खकामा झारापीका ढ्‍याप्‍पा छीहँ ल़ाम रम् त्‍य, खकामा पीरीक छँवाचीवा ऊम्‍रम्‌पी वयँ त्‍यची।” 33खोचीवा ङीमादूरूचीतो येसूवा आतीकाक साफी आहानापीका खोचीलाई नीनाबूङ्‍मी खा लूची। 34आहाना मान्‍दूङ् येसू खोचीलो नीनान, माताधँसँ येसूवा ऊम्‍सीच्‍चेचीलाई आहानामी आर्था यँल्‍या झारा आसावासँ तूम्‍तोमाम्‍पा लूची। 35खोले नाम्‌कूरामा येसूवा ऊम्‍सीच्‍चेचीलाई लूची, “बानानी, हने काए मेक्‍कधे खाते।” 36खकामा पीपीछूर्छूर् मीनाचीलो हासामीमा, येसू तूवाक नाऊपीकाङा ऊम्‍सीच्‍चेचीवा खोलाई खायूची। खलो आरू नाऊचीसँ मकपी तूवा। 37खलो मपी ढ्‍याप्‍पा हूवा ता, खकामा होङ्‍कामामी छाल्‍क छाल्‍काछामा नाऊपी ठकाछूतो काँवा वँङामा प्‍याब्‍मा थालामू। 38खतालो येसूबो नाऊमी दँसूपी सीरानी तीऊमा चानीतो ईप्‍साचाक तूवा। मातालो खोचीवा येसूलाई आता लोतो पोकूची, “तकी! काए सेधँसँ यँ आनानीवा फूम् मीनूम्‌न?” 39येसू पोका खकामा ढ्‍याप्‍पा हूवालो होङ्‍कामालाई आता लूमा पायू, “नोखाता तान!” खोतोलोङा हूवा तामा छीतूखातू खकामा मपी चाकामान्‍या छाखाता। 40खतालो येसूवा खोचीलाई लूची, “यँमा आनानी मातासार कीसीनीक? यँ आनानीलो बीस्‍वसा मान्‍तू?” 41खोची मारी कीसामीहँ ऊम्‍चूहँपा हँपावाङा गूँमा थालामूची, “नक यँतीकाक मीना? हूवालो होङ्‍कामासँ ऊम्‍खा र्‌याब।”

will be added

X\