मर्कूस 3

1फेरीसँ येसू तायाखीम्‌पी वँङा, खलो मकपी ऊम्‍हू हसाक ईत्‍ता मीना तूवा। 2सावाभेमाक लेपी येसूवा मक मीनामी हू नोम्‍य ले ग्‍यामीमा मीनाचीवा येसूलाई फक्‍ता तेमालाई चोपूतीतूचीक तूवा। 3खकामा येसूवा मक मीनालाई लू, “नापे भाना।” 4येसूवा खोचीलाई लूची, “सावाभेमाक लेपी यँ मूमा, खान्‍नीक चालँवा ले, खाईसीक चालँवा, लेमेमाले, सेमा, हाक्‍क चालँवा मूमा छी?” मातालो खोची मानेपा तूवायामी। 5ऊम्‍चू छरीक सागूँवा तूःमा खो मारी ऊम्‍कँचाईनाची, खकामा खोचीलाम्‍पे रूपूहँ खाङू मकामा मक मीनालाई लू, “आम्‍हू सतू।” मक मीनावा ऊम्‍हू सतू, खतालो ऊम्‍हू नोखाता। 6मपीका मक फरीसीची लतामीमा खातामी, खकामा येसूलाई यँतामा सेमादूरी ग्‍यामीमा खोलाई सेमाक यायो मूसी फरीसीची हेरोदमी मीनाचीपी खातामी। 7येसूलो ऊम्‍सीच्‍चेची होङ्‍कामाधपी बानामी, खोलो गालीलपीका बानामीक पीपीछूर्छूर् मीनाचीवा येसूलाई तीङूची। 8येसूवा मूक चालँवा ईनूचीमा यहूदीया, यरूसलेम, ईदोमीआ, यर्दनमी मेक्‍कधे खकामा टूरोसलो, सीदोनमी मेक्‍कानापेकालामा मपी मारी पीपीछूर्छूर् मीनाची येसूधपी तामी। 9पीपीछूर्छूर् मीनावा कँलाई हीलँमूङ्‍नने ग्‍यामा येसूवा ऊम्‍सीच्‍चेचीलाई ईत्‍ता नाऊ ठीक्‍का मानूम् लूचीमा आरामीऊची। 10येसूवा साफी मीनाचीलाई नोमीऊक तूवा मातामा सामवा लापूचीक मीनाचीवा खोलाई तोप्‍मालाई तल्‍मोचामोमीक तूवा। 11ईसीक आत्‍माचीवा येसूलाई तूची, खकामा येसूमी लँपी बबामीहँ पाईतो आता ग्‍यामी, “आनानी नीनाबूङ्‍मी छा ह।” 12येसूवा खोचीलाई अँ बारेपी आरूचीलाई खँम्‍यानूम्‌न लूचीमा आरामीऊची। 13मकामा येसू पप्‍चीलाछोपी लता, खकामा खोसावा नतूचीकचीलाई काछूची, खकामा खोची येसूधपी तामी। 14येसूलो साङ्‍गाई तूमा खकामा खान्‍नीक खा हालाब्‍सी खाईमालाई येसूवा ईत्‍हीस् लापालाई छ्‌यातूची, 15खकामा खोचीलाई चाप् लाईमाहँ कल्‍माक रसँ पीऊची। 16ईत्‍हीस् प्रेरीत गेक नकचीङा ह: सीमोन खोलाई येसूवा पत्‍रूस गूँमाक नूङ् वायू, 17खकामा जाब्‍दीमी छा याकूब, याकूबमी नूछ यूहन्‍ना। येसूवा खोचीलाई बोअर्नेगेस गूँमाक नूङ् वायूची, ऊम्‍आर्था गर्जनमी छाची। 18अन्‍द्रीयास, फीलीप, बारथोलोमाई, मत्‍ती, थोमा, अल्‍फयसमी छा याकूब, खकामा थेदीयसलो सीमोन कनानी, 19खकामा यहूदा ईस्‍करीयोत खोसावा येसूलाई धका पीऊक। 20येसू फेरी खीम्‌पी वँङामा तूवालो मपी पीपीछूर्छूर् मीनाची फेरी तामी। खतालो खोचीवा खान्‍नीतो चा चामासँ तूचीन। 21येसूमी झानीचीवा नक खा ईनूची, खकामा खोलाई खाईमालाई खोची मपी तामी, यँमाधँ ऊम्‍सानूवा थीमाकतीकाक तूई ग्‍यामीमा खोचीवा मीनूचीक तूवा। 22यरूसलेमपीका बानामीक ब्‍यबस्‍था चेकाबी तकीचीवा ग्‍यामी, “खोहँपी बालाजीबूल वँङाक तूई, मक चाप्‌चीमी तँबप्‌लामाङा खोसावा चाप्‌ची लात।” 23येसूवा खोचीलाई खोधपी काछूचीहँ आहानाचीपी लूची, “साईतानावा साईतानालाई यँतामा लाईमा दूर? 24हालाखम्‌हँपी खोची तोङीमीनहँ छूटाछीमीधँ मक हालाखम् टीकाछूमा दूरन। 25खीम्‌पी तोङीमीनहँ छूटाछीमीधँ मक खीम् टीकाछूमा दूरन। 26साईतानाङा साईतानामी बीरोधापी पोकीमा खोची तोङीचीनहँ छूटाछीचीधँ खो यँतामा टीकाछूमा दूर, माताधँने ऊम्‍आन्‍ता तीदूरीक छी। 27रलोक मीनामी खीम्‌पी वँङीमीमा, मक रलोक मीनालाई पाईला छूयचीनतो आसासँ ऊम्‍सामाना ङाब्‍माहँ खाईमा दूरन। पाईला खोसावा मक रलोक मीनालाई छूईमाछी खकामा मात्‍ताई खोसावा ऊम्‍सामाना ङाब्‍माहँ खाईमा दूर। 28कँ आनानीलाई ऊम्‍छूङ्‍ङा लोनीनी, मीनाचीमी झारा खँ खकामा नीनाबूङ्‍मी दोधूम् पोमाकीमी खँधाती, 29खताधँसँ पबीत्‍रा आत्‍मामी बीरोधापी नीनाबूङ्‍मी दोधूम् पोकाबीमी हाल्‍लोसँ खँधातीन, खोचीने ऊम्‍छूङ्‍ङा साधाईक लागी खँमी फक्‍तावाला ठराछीमी।” 30येसूवा नक खा आतामा लूचीक तूवा, यँमाधँ खोचीवा “ईसीक आत्‍मा खोपी तूई” ग्‍यामीक तूवा। 31येसूमी मालो ऊम्‍नूछची मपी तामी, खकामा खोची पाखापीङा रीपामीहँ खोलाई काछोसी पसूची। 32पीपीछूर्छूर् मीना येसूमी मेक्‍कानापेका तूवायामीक तूवा, खकामा खोचीवा येसूलाई लूची, “आम्‍नू मामालो आम्‍नू नूछचीवा आनानीलाई पाखापी लामीहँनीक तूई।” 33खतालो येसूवा खोचीलाई लूची, “अँ मालो अँ नूछची आसाचील्‍या?” 34खकामा येसूवा खलो ऊम्‍मेक्‍कानापेका तूकाबीचीलाई खाङूचीमा ग्‍या, “खाङानूम्, अँ मालो अँ नूछची नकचीङा ह। 35आसावा नीनाबूङ्‍मी खा र्‌याबची मोचीङा अँ मालो अँ नूछ नूछमे ह।”

will be added

X\