मर्कूस 11

1खोची यरूसलेमधपीक जाईतून पप्‍चीलामी छेऊ बेथफागेलो बेथानीया लूचीक खम्‌पी ताभानामी खकामा येसूवा ऊम्‍सीच्‍चेचीहँपीक हीसालाई आता लूचीमा पसूची, 2“आम्‍चू लाम्‍लोपीक तेपी खाताची, खकामा आनाची मक तेपी वँङीहँचीनालो होबेमासाम्‍म आसासँ कूदामीहँचीनक गधामी छा छीपूचूना, मकलाई लीताचूहँ नापी बायाचू। 3आसाचीवा आनाची नक ‘यँ मीचूनाक’ गीमीहँ ततीचीनाधँ? नक प्रभूलाई चाहाछाक तूई, खोसावा नक चँरङा लापीःनी लचू।” 4आतामा खोची खाताचीमा गधामी छा लाम्‌धपीक ईत्‍ता खीम्‌मी दूवारेखूधपी छूयाक खोचीवा छीपाचू, खकामा मक गधामी छा खोचीवा लीताचू। 5मकधपी रीपायामीक मीनाचीवा खोचीलाई ततूची, “आनाचीवा नक गधामी छा लीतूचूनामा यँ मीहँचूनाक?” 6मातालो खोचीवा येसूवा खोचीलाई लूचीतीकाङा मक मीनाचीलाई लची, खकामा खोचीवा गधामी छा खाईमा पीऊची। 7खकामा खोचीवा गधामी छा येसूधपी ताताचू, खकामा ऊम्‍चू तेची फूतूचीमा गधामी छीमारूछोपी येसूलाई यूसूची, मातामा येसू मक गधाछोपी वँङामा कूदामूतो खाता। 8साफी मीनाचीवा ऊम्‍चू तेची खकामा कोईवा लापीक पोमी रम्‌ची कीबूचीमा लाम्‌पी धूङ्‍मूची। 9खकामा येसूमी लाम्‍लोलो दँसूपीका लाम्‍दूम्‍काबीची आता गूँतो पाईमा थालामूची, “होसान्‍ना!” “अलने छूने खो परमप्रभूमी नूङ्‍पी ताकाबी!” 10“अलने एपा दाऊदमी तीःक हालाखम्!” “परमधामापी होसन्‍ना!” 11येसू खोचीलो यरूसलेम तातामा नीनाबूङ् दब्‍माक खीम्‌पी वँङा। मकामा भेपानापे मपी तूवाक थोकापी खाङू खकामा आबेला छाकसा ईत्‍हीस् ऊम्‍सीच्‍चेचीलो खो बेथानीया खाता। 12स्‍याल्‍मा खोची बेथानीयापीका लासाहँमीलो खो साकास्‍या। 13खकामा खोसावा चसी मेनी ऊम्‍सूम्‍बवा खबूखायूक आन्‍जीरापो तू खकामा मक कसाक तूईले ग्‍यामा येसू मपी खाता, खो मपी तालामा खाङूलो आन्‍जीरामी सूम्‍ब मात्‍ताई तूवा, कसाकने मान्‍तूवा यँमाधँ खलो आन्‍जीरापो कमाक दँमा छाहँन। 14येसूवा मक आन्‍जीरापोलाई लू, “हने नाप्‍कानापे आसावासँ आनापीका कसीक चासी चोचीनेन।” खोसावा आता ग्‍याक ऊम्‍सीच्‍चेचीवा ईनूतीकूचीक तूवा। 15खकामा खोची यरूसलेम ताभानामी खकामा येसू नीनाबूङ् दब्‍माक खीम्‌पी वँङा खतालो नीनाबूङ् दब्‍माक खीम्‌पी बलीदानाक लागी लँपेर्‌वा हूपेर्‌वाची ईन्‍काबीलो खेकाबीचीलाई येसूवा पाखा कलूची, खकामा बूलू बाईकाबीचीमी टेबलाचीलो पेर्‌मावा ईन्‍काबीचीमी तूमाक खम्‌ची फात्‍तूतीङू। 16खकामा येसूवा मीनाचीलाई नीनाबूङ् दब्‍माक खीम्‌पीका यँसँ खाईमा पीऊचीन। 17खकामा येसूवा खोचीलाई चेतो लूची, “आनानीवा ङीसूनूम्‌न धार्मसास्‍तारापी आतामा छाबाक तूई, ‘अँ खीम् झारा जाईचीमी नीनाबूङ् दब्‍माक खीम् छी।’ मातालोने आनानीवाने खूचीपाचीमी लूङ्‍बू मानूम्‌क तूई।” 18येसूवा माता ग्‍याक ईनूचीमा तूम्‍साबू पूजारीचीलो ब्‍यबस्‍था चेकाबी तकीचीवा खोलाई यँतामा सेमा ग्‍यामीमा खान्‍नीक लाम् खँमा थालामूची। यँमाधँ खोची कीसामीक तूवा खकामा पीपीछूर्छूर् मीनाची खोसावा च्‍यातूचीलो ऊम्‍खा ईनूचीमा अतलल छामीक तूवा। 19खकामा नाम्‌कूराखातालो खोची साप्‍सेमापीका लतामी खकामा बेथानीपी खातामी। 20खोची हालाकूनाम्‌पी मक लाम्‌लामा खाताहँमीलो खोचीवा मक आन्‍जीरापो ऊम्‍साम्‌पीका ऊम्‍चम्‌साम्‍मङा हसाखाताक तूची। 21पत्‍रूसवा येसूवा मक पोलाई लूक खा मीनूतातूहँ गूँमा थालामू, “तकी! खाङानूम्‌या, आनानीवा दाङ्‍खँ प्‍यानूम्‌क आन्‍जीरापोने हसाखाता राछ।” 22येसूवा खोचीलाई जूवापा पीऊचीहँ लूची, “आनानीवा नीनाबूङ्‍पी बीस्‍वसा मानूम्। 23ऊम्‍छूङ्‍ङा कँ आनानीलाई लोनीनी, आसावा ऊम्‍सागूँवापी साङ्‍का मूमाम्‍पा खोसावा मीक खा यँतामाधँसँ छी गीमा बीस्‍वसा मीहँ पप्‍चीलालाईसँ, ‘आना दीलामा होङ्‍कामापी वँङा’ लँधँ मक खोमी लागी माताङा छीखाती। 24आतामा कँ आनानीलाई लोनीनी, आनानीवा नीनाबूङ् दबूनूम्‌लो यँ ङाकूनूम्‌धँसँ मक कँ ऊम्‍छूङ्‍ङा तँ ग्‍यानीमा बीस्‍वसा मानूम्, खतालो मक आनानीवा तूनूम्। 25आनानीवा नीनाबूङ् दबूनूम्‌लो, आम्‍नू सानूवा आरूचीलो चाईसाक तूईधँ आनानीवा पाईला ऊम्‍खँधाईप्‍यानूम्, मातामाङा नीनाम्‍खम्‌पीक पापा नीनाबूङ्‍वासँ आनानीलाई आम्‍नू झारा काचूवाकोईची धाईपीःनी। 26[आनानीवा खँधाईपीऊनूम्‌नधँ, नीनाम्‍खम्‌क आम्‍नू पावासँ आनानीलाई खँधाईपीःनीन।”] 27फेरी खोची यरूसलेमपी भानामी। खकामा येसू नीनाबूङ् दब्‍माक खीम्‌मी भेपानापे कोलाहँलो तूम्‍साबू पूजारी, ब्‍यबस्‍था चेकाबी तकीची खकामा धार्म तकीची खोधपी तामी। 28खकामा खोचीवा येसूलाई ततूची, “आना आतीकाक चालँवाची हाक्‍क आधीकारावा मीना? नक चालँवाची मूमा आसा आनालाई आधीकारा प्‍यानाक तूई?” 29येसूवा खोचीलाई लूची, “कँ आनानीलाई ईत्‍ता खा तईनीनी, आनानीवा मकमी जूवापा प्‍यँनूङ् खकामा कँसँ हाक्‍क आधीकारावा नक चालँवाची महँ आनानीलाई लोनीनी। 30यूहन्‍नामी बप्‍तीस्‍मा हापीका छाक, नीनाबूङ्‍लामाले मीनालामा कँलाई लँनूङ्।” 31खकामा खोचीवा आता गूँतो खोची खोचीङा तईमोमी, “ ‘नीनाबूङ्‍लामा’ गेधँ, ‘आनानीवा यँमा यूहन्‍नावा लानीक खापी बीस्‍वसा मानूम्‌न गी।’ 32‘मीनालामा’ गेले....” आता गूँमासँ खोची मीनाचीलो कीसामी। यँमाधँ मीनाचीवा यूहन्‍नालाई ऊम्‍छूङ् अगम्‍बक्‍ता गूँमा ङीसूचीक तूवा। 33खकामा खोचीवा येसूलाई जूवापा पीऊचीहँ लूची, “काएका ङीसाम्‌कान” खकामा येसूवा खोचीलाई लूची, “कँसँ आनानीलाई हाक्‍क आधीकारावा नक चालँवाची मँहँ मक लोनीनीन।”

will be added

X\