लूका 8

1मपीका पाछी खो साप्‍सेमाचीपीलो ते तेचीपी हालाब्‍तो नीनाबूङ्‍मी हालाखम्‌मी खान्‍नीक खा मीनाचीलाई लोतो लाम्‍दूमा, खतालो ईत्‍हीस् ऊम्‍सीच्‍चेची खोलो तूवामी, 2खतालो खँसापी आत्‍मालो ऊम्‍चू सामपीका नोमीक कोई कोई मीमाछाचीसँ तूवामी, मकचीबो मग्‍दलीनी लूचीक मरीयम, खोपीका सावाबो चाप् लताहँ खाताक तूवा। 3हेरोदमी चालँवा मूकाबी खूजासमी तँमा योअन्‍ना, खकामा सूसन्‍ना खोचीलो आरू साफी मीमाछाचीवा ऊम्‍चू बूलूदँवा येसूमी स्‍यावा मूची। 4हने मारी पीपीछूर्छूर् मीनाची ङायूवा तूपूची, खकामा साप्‍सेमा साप्‍सेमापीक मीनाची खोपी तामीलो, येसूवा खोचीलाई ईत्‍ता आहाना लूची। 5“ईत्‍ता चाल्‍यवा न्‍याब्‍काबी चाल्‍यवा न्‍याब्‍सी लता, चाल्‍यवा न्‍याबूलो कोई चाल्‍यवा लाम्‌पी धा खतालो कोई लँवा हीला, खकामा नाम्‌छूरीक छँवाचीवा मक चोखायूची। 6खकामा आरू चाल्‍यवा लूङ्‍कँलापी धा, खकामा लीमामत्‍तो स्‍याखाता यँमाधँ मपी चीसेनी तूवान। 7मातामाङा कोई तीतूङ्‍लापी धा, खकामा चाल्‍यवा लीमालो तीतूङ्‍ची पोराहँ नीऊखायूकसावा पोर्मा पीऊन। 8खकामा कोईबो खान्‍नीक भापी धा, खकामा लीमाहँ ईत्‍तोङ् गूना कसा।” नक खा ग्‍यादूरामा येसू ढ्‍याप्‍पा सँलँवापी ग्‍या, “आसामी ईन्‍माक नाब तूई, खोसा ईनूने।” 9खकामा ऊम्‍सीच्‍चेचीवा नक आहानामी आर्था यँल्‍या ग्‍यामीमा येसूलाई ततूची। 10खतालो येसूवा ग्‍या, “आनानीवा नीनाबूङ्‍मी हालाखम्‌मी रहस्‍से ङीमाक नूवा तनूम्‌क तूई, खतालोने आरूलोबो आहानापी मात्‍ताई नीन, यँमाधँ ‘खोचीवा खाङूचीनेमासँ तूचीनेन खकामा ईनूचीनेमासँ ङीसूचीनेन।’ 11हने आहानामी आर्था नक ह, चाल्‍यवाबो नीनाबूङ्‍मी खा ह। 12लाम्‌पी धाक चाल्‍यवा आतीकाकची ह, खोचीवा बीस्‍वसा मूचीनेनमा लेमीनने गीहँ साईताना ती खकामा खोचीवा ईनूचीक ऊम्‍चू सागूँवापीक मक नीनाबूङ्‍मी खा खायलीत। 13लूङ्‍कँलापी धाक चाल्‍यवाबो नक ह, मक नीनाबूङ्‍मी खा ईनची खकामा हँसहँलँ छीमीमा बीस्‍वसा मीची, मातालोने बीस्‍वसापीक ऊम्‍चू साम् मान्‍तूकसावा ऊच्‍छीना बीस्‍वसा मीची खकामा ऊम्‍चू जँचा छीलो ऊम्‍चू पतन छीखाती। 14तीतूङ्‍मी म़झापी धाक चाल्‍यवामी आर्था नक ह, खोचीवा नीनाबूङ्‍मी खा ईनची खन्‍धँसँ पाछी चूलाईलीमी, खकामा बूलूदँलो सूखा चाईनापी छीमीहँ नीसासाछीमी, खकामा खोचीपीका कसीमा तूम्‍मा तन। 15मातामाङा खान्‍नीक भापी धाक चाल्‍यवाबो नक ह, नीनाबूङ्‍मी खा ईन्‍काबीवा खान्‍नीकलो सम्‌नीक सागूँवापी योयाङ् मीहँ यूस खकामा धाईरे मीहँ मारी कसी। 16“आसासँ मीकूछू दयाचीहँ खोँवा खबचीमा यूसचीन, खकामा खप्‍तँसूङ्‍खीलीपी यूसचीन, खीम वँकाबीवा खान्‍नीतो तोमा दूरूचीने गीमीहँ बाकालाछोपीबो यूसची। 17दातीनतो सूलाक यँसँ मान्‍तू खकामा छपी दातीनतो, ङीसाम्‌नक गोप्‍यापी यूसाक यँसँ मान्‍तू। 18आतामा आनानी नूवा याकानी, आनानीवा ईनानूम्‌कङा तूई, यँमाधँ आसालो तूई खोलाई पी, खकामा आसालो मान्‍तू खोसा तूई गीमा मीनकसँ खोपीका ङाबी।” 19खकामा येसूमी ऊम्‍मालो ऊम्‍नूछची खोपी तामी खतालोने पीपीछूर्छूर् मीनामी गार्नावा खोची खोधपी खाईमा दूरूचीन। 20खकामा खोलाई कोईवा लूची, “आम्‍नू मालो नूछची आनानीलाई तूप्‍माक ऊम्‍चू सानूवालो पाखापी रीपीयीमीक तूई।” 21खतालो येसूवा खोचीलाई लूची, “अँ मालो अँ नूछची खोचीङा ह, आसा नीनाबूङ्‍मी खा ईन खकामा मकतीका मी।” 22ईले खो ऊम्‍सीच्‍चेचीलो नाऊपी वँङामा, खोचीलाई लूची, “हने काए होङ्‍कामामी मेक्‍कधे खाते” खकामा खोची खातामी। 23नाऊपीका खाताहँमीलो येसू ईम्‍साचा। खतालो होङ्‍कामापी ढ्‍याप्‍पा हूवा ताहँ, नाऊ काँवावा प्‍याब्‍मा थालामू, खकामा खोची यँ पूमापूमा छामी। 24खकामा खोची खातामीमा खोलाई आता लोतो पोकूची, “तकी, तकी, काए नास्‍टा छूमा गेहँ।” खकामा खो पोकाहँ हूवालो काँवामी मारी छल्‍काछाक छालालाई पायू, खकामा मक थामाछामा चाकामान्‍या छाखाता। 25खकामा येसूवा खोचीलाई लूची, “आम्‍नू बीस्‍वसा हापी खाता?” खतालो खोची कीसामीहँ अतलल छाखातामी खकामा खोची खोची गूँमा थालामूची, “नक आसाल्‍या, खोसा हूवालो काँवालाई आग्‍या प्‍यलोसँ, ऊम्‍खा र्‌याबची?” 26खोची गेरासेनस लूचीक थाम्‍पूङ्‍पी तातामी, मक गालीलमी मेक्‍कधेपी तूई। 27येसू नाऊपीका पाखापी लतालो खोसावा साप्‍सेमाक ईत्‍ता मीनालाई छीपू, खोलाई चाप्‌चीवा लापूक तूवा। ल़ाम दँमापीका खोसावा ते, हूम्‍सूक तूवान, खकामा खीम्‌पी तूमाम्‍पा सूलूम्‌धचीपी तूवातीताक तूवा। 28खोसावा येसूलाई तूःमा पाताहँ ऊम्‍लाम्‍लोपी खातामा बबामा ढ्‍याप्‍पा सँलँवापी ग्‍या, “ए परमप्रधाना नीनाबूङ्‍मी छा येसू, आम्‍नूमी कँलो यँ सम्‍बन्‍धा, कँ आनानीलाई बीन्‍ती मूनीनी, कँलाई दूखा प्‍यँनूङ्‍न।” 29यँमाधँ येसूवा ईसीक आत्‍मालाई मक मीनापीका लता लूमा आग्‍या मूक तूवा। यँमाधँ खोलाई साफी खेपा चाप्‌वा लापूक तूवा, मीनाचीवा खोलाई साङ्‍लोवा छूयूचीमा नेला तीऊचीहँ सान्‍टारीलो यूसूचीलोसँ खोसा साङ्‍लोची थायूखातूमा नेलासँ ओतूमा चाप्‌वा खोलाई एक्‍लासा थाम्‍पूङ्‍लाम्‍पे खायूतीतूक तूवा। 30“आम्‍नूङ् यँल्‍या?” लूमा येसूवा खोलाई ततू, मातालो खोसा ग्‍या, “फाऊजा।” यँमाधँ साफी चाप्‌ची खोहँपी वँङामीक तूवा। 31खकामा खोचीवा “काएकालाई आघाध कून्‍डापी पसेकानूम्‌नवो” ग्‍यामीमा येसूलो बीन्‍ती मूची। 32मपी पप्‍चीलामीधपी ई बागाला भची चायायामीक तूवा। खतालो खोचीवा भहँपी वँमा पेकानूम् ग्‍यामीमा येसूलो बीन्‍ती मूची, मातालो येसूवा खोचीलाई भचीपी वँमा पीऊची। 33आतामा मक चाप्‌ची मक मीनापीका लतामीमा मक भहँपी वँङामी, खकामा मक भमी बागाला धाम्‍रलामा भूस्‍सामीलो तीम्‍मापी धामीमा होपामीहँ स्‍यामी। 34खलो मपी छाक चालँवा तूचीमा चलाकूची फूसामीहँ खातामीमा साप्‍सेमालो तेपीक मीनाचीलाई नक झारा खा लूची। 35मपी छाक चालँवा खँमालाई मीनाची लतामीमा बानामी, खकामा खोची येसूधपी बानामीलो, चाप्‌वा लापूक मीनापीका चाप् लतामा खातामासँ खोसावा ते हूप्‍सूमा ऊम्‍छूङ् नूवालोक छामा येसूमी लँधपी तूवायाक तूचीलो खोची कीसामी। 36मक चालँवा तोकाबीचीवा चाप्‌वा लापूक मीना यँतामा नो मक खा खोचीलाई लूची। 37खकामा गेरासेनसमी छेऊछाऊक थाम्‍पूङ्‍क झारा मीनाचीवा येसूलाई खोचीपीका खाल्‍तानी लूचीमा बीन्‍ती मीऊची। यँमाधँ खोची ऊम्‍छूङ्‍ङा साफी कीसामीक तूवा।खकामा येसू नाऊपी वँङामा लासा। 38मक चाप्‌ची लताक मीनावा, ‘कँलाई आनानीलो छूमा प्‍यँनूम्’ ग्‍यामा येसूलो बीन्‍ती मू। मातालो येसूवा खोलाई आता लूमा बीदा पीऊ, 39“आना आम्‍खीम् खाता, खकामा नीनाबूङ्‍वा आम्‍मी लागी धाई ढ्‍याप्‍पा चालँवा मूक तूई, मक खा लूची।” मातालो खोसा ऊम्‍लाम् तीङू, खकामा येसूवा खोमी लागी धाई ढ्‍याप्‍पा चालँवा मूपीऊक तूवा मक झारा साप्‍सेमाचीपी हालाब्‍मा थालामू। 40येसू लासालो पीपीछूर्छूर् मीनाचीवा खोलाई लाम्‌तूपा मीऊची, यँमाधँ खोची झारावा खोलाई हूङूयोचीक तूवा। 41खलो याईरस नूङ् तूवाक ईत्‍ता तायाखीम्‌पीक हाकीम तामा येसूमी लँपी बबाहँ अँ खीम् बानानी लूमा बीन्‍ती मीऊ। 42यँमाधँ मक हाकीममी ईत्‍हीस् दँ तालाक ईत्‍ता मात्‍ताई मीमाछाछा तूवा। खो सीमाङा ग्‍याहँक तूवा। खकामा येसू खाताहँलो पीपीछूर्छूर् मीनाचीवा खोलाई तोलूचोचीक तूवा। 43ईत्‍हीस् दँतो ही खाईमाक सामवा लापूक ईत्‍ता मीमाछा तूवा, खोसावा ऊम्‍झारा बूलू लूकूलोसँ खोलाई आसावासँ नोमेमा दूरूहँचीन, 44खो दँसूलामा बानामा खोसा येसूमी तेमी छेऊ तोपू, मातालोने खोतोलोङा ऊम्‍ही खाईमाक साम नोखाता। 45खकामा येसूवा ग्‍या, “कँलाई आसावा तोपनूम्‌क?” झारा मीनाचीवा ऊम्‍खा छीङूची, मातामा पत्‍रूसवा ग्‍या, “तकी, पीपीछूर्छूर् मीनाची आम्‍नू मेक्‍कानापेका तूईमी खकामा आनानीलाई तोलीहँनी।” 46मातालो येसूवा ग्‍या, “कँलाई कोईवा तोपँमूङ्‍कङा ह, यँमाधँ कँपीका र लतामा खाताक तूम्‍तूङ्‍क तूई।” 47खकामा कँ हने कूम्‍माहँ तूमा दूरँन राछ गूँमा तूम्‍तूहँ मक मीमाछा यतो बानामा ऊम्‍लाम्‍लोपी बबामा, यँमा खोसा येसूलाई तोपूक राछ खकामा खो नोक खा झारा मीनाचीमी लाम्‍लोपीङा ग्‍या। 48येसूवा खोलाई लू, “अँ छा, आम्‍बीस्‍वसावा आनालाई नोम्‍यानाक तूई, साङलो खाता।” 49खो नीनाहँतोङा तायाखीम्‌पीक मीनामी खीम्‌पीका ईत्‍ता मीना ताभानाहँ ग्‍या, “आम्‍नू मीमाछाछाने स्‍या, हने तकीलाई दूखा प्‍यानूम्‌न।” 50येसूवा नक खा ईनूमा खोलाई लू, “कीन, बीस्‍वसा मात्‍ताई मू मकामा खो नी।” 51येसू खीम्‌पी तालामा, खोसा पत्‍रूस, याकूब, यूहन्‍ना खकामा मक स्‍यान मीमाछाछामी ऊम्‍मालो ऊम्‍पा बाहेका आरू आसालाईसँ खोलो खीमँ वँमा पीऊचीन। 52झाराङा खोमी लागी सूदूम्‍पा हूदूम्‍पा मूतो खापाचामीक तूवा, खतालो येसूवा खोचीलाई लूची, “खाप्‍ननी, खो स्‍याक मान्‍तू, ईम्‍साक मात्‍ताई तूई।” 53खो स्‍यादूरा गूँमा खोचीवा ङीसूचीक तूवा, मातामा खोचीवा येसूलाई घीऊची। 54मातालो खोसावा मक मीमाछाछामी हूपी लापूमा लू, “ए अँ छा पोका।” 55खकामा ऊम्‍स्‍वँमा लासातामा खो खोतोलोङा पोका, खकामा येसूवा खोलाई चामाक थोका प्‍यानूम् लूचीमा आरामीऊची। 56खतालो ऊम्‍मापाची अतलल छाखाताची, माताधँसँ नक आसालाईसँ लनूम्‌नवो लूचीमा येसूवा खोचीलाई कारा आग्‍या पीऊची।

will be added

X\