लूका 5

1खलो ऊले येसू गनेसरेत होङ्‍कामाधपी रीपायाक तूवा, खकामा पीपीछूर्छूर् मीनाची नीनाबूङ्‍मी खा ईन्‍मालाई ऊम्‍मेक्‍कानापेका तल्‍मोचामोमीक तूवा। 2येसूवा हीसाबो नाऊ तीम्‍मामी कीनारापी तू, खलो खप्‍यँपाचीबो नाऊपीका पाखा लतामीमा ऊम्‍चू खप्‍यँ सीऊचोचीक तूवा। 3खकामा येसू ईत्‍ता नाऊपी वँङा मक नाऊबो सीमोनमी तूवा, खकामा खोसा सीमोनलाई नाऊ असी भेपा खायू लू, खकामा येसू नाऊपी तूवामा पीपीछूर्छूर् मीनाचीलाई च्‍यातूची। 4येसू नीनादूरामा, खोसा सीमोनलाई लू, “गाईरलाम्‍पे खायूमा ङा लाप्‍मालाई खप्‍यँ झाकू।” 5मातालो सीमोनवा ग्‍या, “तकी, काएकावा रातभोरीसँ खूपेकाहँ खप्‍यँ झाकूम्‌का खन्‍धँसँ काएकावा यँसँ लाप्‍मा दूरूम्‌कान, माताधँसँ आम्‍नू खातीका कँ खप्‍यँ झाकँ।” 6खकामा खोचीवा खप्‍यँ झाकूची, खतालो खोचीवा ऊम्‍चू खप्‍यँपी साफी ङा सायूचीकसावा ऊम्‍चू खप्‍यँ झान्‍झानाई पीता। 7खकामा खोचीवा आर्क नाऊपी तूवामीक ऊम्‍चू बूमीचीलाई भानानीमा काएकालाई भाएकानूम्‌या लूचीमा छ्‌याम् मीऊची। खकामा खोची भानामीहँ हीसा नाऊ ङावा प्‍याबूतो ङा लापूची मातामा नाऊ लीसाहँ झान्‍झानाई काँवापी होपावँङा। 8नक छाक तूःमा सीमोन पत्‍रूस येसूमी लँपी बबामा ग्‍या, “प्रभू कँपीका खाल्‍तानी, यँमाधँ कँ खँवाला मीना ह।” 9यँमाधँ खोचीवा लापूचीक ङामी भूम् तूचीलो पत्‍रूस खकामा खोलो छूकाबीची झारा अतलल छाखातामीक तूवा। 10मातामाङा जब्‍दीमी वाच्‍छाछाची, याकूबलो यूहन्‍नासँ अतलल छाखाताची। खोची सीमोनलो साझेदारी तूवाची। येसूवा सीमोनलाई लू, “कीन, हने नाप्‍कानापे आना मीनाची लापचीना।” 11खोचीवा ऊम्‍चू नाऊची पाखा लातूची, खकामा खोचीलो तूवाक झारा थोका कातूसोचीमा येसूलाई तीङूची। 12ऊले येसू ईत्‍ता साप्‍सेमापी तूवालो छवायँ सामवा लापूक ईत्‍ता मीना मपी ता, खकामा खोसा येसूलाई तूहँ बबामा बीन्‍ती मीऊ, “प्रभू, आनानीवा नोमेमाक सानूवा मीनूम्‌धँ कँलाई नोमेमा दूरेनी।” 13खकामा येसूवा ऊम्‍हू खोछोपी यूतो लू, “आना नोखाता गूँमाक अँ सानूवा तूई, खतालो खोपीक ऊम्‍छवायँ साम नोखाता।” 14खकामा खोसा “नक खा आसालाईसँ लूनवो” लूमा खोलाई कारा आग्‍या पीऊ, “खन्‍धँसँ हने आना खाताहँ पूजारीलाई आम्‍हँपालाई खँमेनाची, खकामा मोसामी आग्‍यातीका आना नीक छानाक खामी मीनाचीलाई प्रामानाक लागी बली चारामू।” 15खतालोने ऊम्‍बीसायापी छाक खा झारालाम्‍पे फीःसा, खकामा पीपीछूर्छूर् मीनाची मपी ऊम्‍खा ईन्‍सीलो ऊम्‍चू सामपीका नोसी खोपी तामी। 16खन्‍धँसँ येसूबो खरोमा थाम्‍पूङ्‍चीलाम्‍पे खाईतो नीनाबूङ् दबू। 17ऊले येसूवा सीक्‍छे पीऊचोचीलो, गालीललो यहूदीयामी झारा तेपीका खकामा यरूसलेमपीका तामीक फरीसीची, ब्‍यबस्‍था चेकाबीची खोधपी तूवायामीक तूवा। खोलो परमप्रभूमी नोमेमाक र तूवा। 18मीनाचीवा ईत्‍ता ऊम्‍लँ हू तसानक मीनालाई खप्‍तँसूङ्‍लोङा खूरूचीमा तातूची खकामा खीम गन्‍माहँ येसूधपी यूमा लामूची। 19मातालो पीपीछूर्छूर् मीनाचीमी गार्नावा खोचीवा मकलाई खीम गन्‍माक लाम् तूचीन, खकामा खोची खीम्‌मी धूरीछोपी वँङामीहँ खीम्‌मी धूरी होकूचीमा ऊम्‍खप्‍तँसूङ्‍लोङा येसूमी लाम्‍लोपी मक मीनाचीमी म़झापी धातूची। 20येसूवा नक मीनाचीमी बीस्‍वसा तूहँ ग्‍या, “ए मीना, आम्‍खँ धाताक तूई।” 21खकामा ब्‍यबस्‍था चेकाबी तकीचीलो फरीसीचीवा येसूलाई प्रस्‍ना मूची, “नीनाबूङ्‍मी दोधूम् पोकाबी नक आसा? खँने नीनाबूङ्‍वा मात्‍ताई धाईमा दूर त।” 22येसूवा ऊम्‍चू प्रस्‍ना तूम्‍तूमा खोचीलाई लूची, “आनानी आम्‍नू सागूँवापी यँमा प्रस्‍ना मीनूहँनूम्‌क?” 23यँ लोमा खान्‍नी त, ‘आम्‍खँधाताक तूई’ लोमा ले, ‘पोकामा लाम्‍दूमा लोमा’? 24“खन्‍धँसँ आनानीवा नक ङीसानूम् मीनामी छालाई साप्‍तेमूलूङ्‍पी मीनामी खँधाईमापीमाक आधीकारा तूई।” खोसावा मक ऊम्‍लँ हू तसानक मीनालाई लू, “कँ आनालाई लोनी, पोका, खकामा आम्‍खप्‍तँसूङ् खूरूहँ आम्‍खीम् खाता।” 25खकामा खोतोलोङा ऊम्‍चू लाम्‍लोपीङा पोकाहँ, खो ईम्‍साक ऊम्‍खप्‍तँसूङ् खूरूहँ, नीनाबूङ्‍मी माहीमा मूतो ऊम्‍खीम् खाता। 26खकामा मपी तूकाबी झारा अतलल छाखातामीहँ नीनाबूङ्‍मी माहीमा मूची, खोची कीसामीमा आता ग्‍यामी, “काएका ईसे अतलल छेक चालँवा तूम्‌का।” 27नक खा छामा खो पाखा लता, खकामा खोसा लेबी नूङ् तूवाक ईत्‍ता तीराऊ पोकाबी मीना तीराऊ लाप्‍माक खम्‌पी तूवायाक तू, खकामा खोलाई लू, “कँलाई तीङ।” 28खतालो खोसा ऊम्‍झारा थोका कातूसोमा पोकाहँ खोलाई तीङू। 29खकामा लेबीवा ऊम्‍खीम्‌पी येसूमी लागी साफी ढ्‍याप्‍पा भोजा भत्‍तेरा तीऊ। मपी तीराऊ लाप्‍काबीचीलो आरू पीपीछूर्छूर् मीनाची खोचीलो भोजा चोहँचीक तूवा। 30खकामा फरीसीलो ऊम्‍चू ब्‍यबस्‍था चेकाबी तकीची येसूमी सीच्‍चेचीमी बीरोधापी आता गूँतो रूपामी, “यँमा आनानीवा तीराऊ लाप्‍काबीची खकामा खँवालाचीलो ची दूङूनूम्‌क?” 31खतालो येसूवा खोचीलाई लूची, “सान्‍च मीनालाई बाईधेमी खँच छीन, सामवा लापूचीकचीलाई मात्‍ताई खँच छी। 32कँ धार्मीलाई मन खँवालाचीलाई सानूवा लामेसीलो काछोसी तँक।” 33खकामा खोचीवा येसूलाई लूची, “यूहन्‍नामी सीच्‍चेची दाफे दाफे ङोयाङ्‍तो नीनाबूङ् दबची, फरीसीचीमी सीच्‍चेचीसँ माताङा मीची, मातालोने आम्‍नू सीच्‍चेची चीची दूङची।” 34खकामा येसूवा खोचीलाई लूची, “नाम्‍तँपा खोचीलो तूईतो, आनानीवा जान्‍तीचीलाई मन्‍चाङा तूमेमा दूरूनूम्? 35मातामा आतीकाक ले ती, नाम्‍तँपालाई खोचीपीका खायीलती खलो खोची ङोयाङचीमा तूईमी।” 36खकामा खोसावा खोचीलाई ईत्‍ता आहानासँ लूची, “आसावासँ नयाँ ते पीतमा पूरान तेपी टालामीन, माता मीधँने खोसावा नयाँ तेलाई पीतक छी, खकामा नयाँ टालो पूरान तेलो तोङीनसँ। 37आसासँ नयाँ आङ्‍गूरामी खँमवा पूरान साहवामी खोँपी यूसन, माता मीधँने नयाँ आङ्‍गूरामी खँमवावा साहवामी खोँलाई पीत, खकामा आङ्‍गूरामी खँमवासँ थोकी खकामा साहवामी खोँसँ नास्‍टा छी। 38मातामाङा नयाँ आङ्‍गूरामी खँमवा नयाँ साहवामी खोँपीङा यूङ्‍माछी। 39आसासँ पूरान आङ्‍गूरामी खँमवा दूङमा नयाँ दूङ्‍मा लामन यँमाधँ खोसा गी ‘पूरानङा खान्‍नी’।”

will be added

X\