लूका 12

1आताछाहँलो साफी होतोङ् पीपीछूर्छूर् मीनाची ङायूवा तूपूची खतालो खोची ईत्‍ता आर्कलाई हील्‍मोचामोमीतो छामीक तूवा, खकामा येसूवा झारापीका पाईला ऊम्‍सीच्‍चेचीलाई आता लोमा थालामूची, “आनानी फरीसीचीमी खमीरपीका नूवा याकानी, मक ऊम्‍चू खचू चालचालाना ह। 2दातीनतो खबामा यूसाक यँसँ मान्‍तू ङीसीनतो सूलाक यँसँ मान्‍तू। 3आतामा आनानीवा माकाचूचूपी यँ गीनी मक झारा ऊजेलपी ईनी, मातामा आसावासँ तूम्‍तोमाम्‍पा खीमपी नीनीक खीम्‌मी धूरीपीका हालाबी। 4“आतामा कँ आनानीलाई लोनीनी, अँ बूमीचेऊ, आसावा रीराम् सीतची खकामा आरू यँसँ मूमा दूरचीन खोचीलो कीननी। 5माताधँसँ आसालो कीमाछी, कँ आनानीलाई लोनीनी, खोलोङा कीमाछी, आसालो सीतेमासँ नरकापी तेमाक र तूई। कँ आनानीलाई लोनीनी, खोलोङा कीसानी। 6यँ हीसा चीबीसीपी नकाबो थतङ्‍गीवा ईन्‍मादूरीनहँल्‍या? खोचीहँपीक ईत्‍तालाईसँ नीनाबूङ्‍वा मातसीचीन। 7आनानी कीननी यँमाधँ आम्‍नू तखलपीक तँसँ ङराक तूई, आतामा आनानी थतङ्‍गीवापीका साफी म़ङ्‍ग तूईनी। 8“कँ आनानीलाई लोनीनी, आतामा झारा आसावा, कँलाई मीनाचीमी लाम्‍लोपी सूईकारा मेमी, खोचीलाईसँ मीनामी छावा नीनाबूङ्‍मी स्‍वर्गादूतचीमी लाम्‍लोपी सूईकारा म्‍यची। 9मातामा आसावा कँलाई मीनाचीमी लाम्‍लोपी छीङेमी कँसँ खोचीलाई नीनाबूङ्‍मी स्‍वर्गादूतचीमी लाम्‍लोपी छीङचूङ्। 10खकामा झारा आसा मीनामी छामी बीरोधापी नीनीमी मकचीमी खँधाती खन्‍धँसँ पबीत्‍रा आत्‍मामी बीरोधापी दोदूम् पोकाबीमी हाल्‍लोसँ खँधातीन। 11“खकामा खोचीवा आनानीलाई तायाखीम्‌चीपी, सासाकाची खकामा आधीकारीचीमी लाम्‍लोपी बायीनी खतालो आनानी लेनाचीमालाई यँ मूमाल्‍या खकामा यँ जूवापा पीमाल्‍या ग्‍यानीमा कीननी। 12यँमाधँ पबीत्‍रा आत्‍मावा खोतोलोङा आनानी यँ नेमा छी आनानीलाई च्‍यातीनी।” 13खकामा पीपीछूर्छूर् मीनाहँपीका ईत्‍ता मीना पातामा ग्‍या, “तँबप् अँमी लागी आङ्‍सा तेप्‍यँने लनूम्‌मा अँ बूलाई लोप्‍यँनूम्‌या।” 14खतालो येसूवा खोचीलाई लूची, “ए मीना कँलाई आनानीछोपी न्‍याया मूकाबीलो आङ्‍सा तेमा पीकाबी आसावा म्‍यँ?” 15खकामा येसूवा खोचीलाई लूची, “नूवा याकानी खकामा झारा खाले झाली मूमाक खापीका आम्‍नू हँपालाई मेथाम् यूनाचीनी, यँमाधँ मीनालो छीक झारा थोकावा मीनामी ऊम्‍पोसूङ्‍वा बानाछाक मन।” 16खकामा खोसावा खोचीलाई आता लूचीमा ईत्‍ता आहाना लूची, “ईत्‍ता बूलूमीमी लापी मारी चासूम् कसा। 17खकामा खोसा आता ग्‍यामा ऊम्‍सानूवापी मीन्‍मा थालामू, ‘कँलो अँ चासूम् यूमाक खम् मान्‍तू कँ यँ मूमा?’ 18खतालो खोसावा ऊम्‍सानूवापी आता ग्‍यामा मीनू, कँ आता म, ‘अँ भाकारीची होतँमा ढ्‍याप्‍पा ढ्‍याप्‍पा म, खकामा अँ झारा चासूम्‌लो मालसामानाची मपी यूसँ। 19खकामा अँ प्रानालाई लँ, “ए प्राना! साफी दँतो लायीनाक साफी बूलूदँ आम्‍मी लागी रासाछाक तूई। सान्‍चलो तूवा, चो, दूङू खकामा दीम्‍दीम्‍ध छा”।’ 20खतालो नीनाबूङ्‍वा खोलाई लू, ‘ए अतँ ईसे सेपाङा आनापीका आम्‍प्राना लामाछी, खकामा मक आनावा त्‍यारी मूनाक थोका आसामी छी?’ 21“नीनाबूङ्‍पी बूलूमी छूमाम्‍पा ऊम्‍चूहँपामी लागी मात्‍ताई बूलूमी छूकाबी मीनाचीमी हालाता आताङा छी।” 22खकामा खोसावा ऊम्‍सीच्‍चेचीलाई लूची, आतामाङा कँ आनानीलाई लोनीनी, अँ प्रानामी लागी यँ चामा खकामा रीराम्‌पीयँ हूम्‍मा ग्‍यानीमा चूलाईलोननी। 23यँमाधँ प्राना चामक थोकापीकासँ ढ्‍याप्‍पा ह खकामा रीराम् हूम्‍माक तेपीकासँ ढ्‍याप्‍पा ह। 24आनानीवा अवाचीलाई खाङानूम्‌खँ, ना खोचीवा नेबची ना खोचीवा कीबची खकामा ना ऊम्‍चू यूङ्‍माक खम्‌लो भाकारी तूई खोचीलाई नीनाबूङ्‍वाङा यची। आनानी छँवाचीपीका धाई म़ग तूईनी। 25आनानीहँपी आसावा चूलाईलीनीमा ईबीत्‍ता आम्‍नू आयू पर्मेमा दूरूनूम्? 26आतामा आनानीवा आतीकाक स्‍यान चालँवासँ मूमा दूरूनूम्‌नधँ यँमा आरू चालँवापी चूलाईलीनी? 27लीली बूङाचीलाई खाङानूम्, मकची यँतामा पोरीमी ना खोचीवा चालँवा मीची ना दफूली बानचीहँ ते बीची, माताधँसँ कँ आनानीलाई लोनीनी, सूलेमान हँसँ ऊम्‍झारा माहीमापी नकचीलो ईत्‍ता तोकसँ चनाचीक तूवान। 28आतामा ईसे छी सेल्‍माङा मीपी कात्‍तीक घँसालाईसँ नीनाबूङ्‍वा पाईराम्‍यधँ अल्‍पबीस्‍वसीचेऊ, आनानीलाई झान धाई मारी पाईरामीनी। 29खकामा काएकावा यँ चामा, यँ दूङ्‍माल्‍या ग्‍यानीमा चूलाईलोननी खकामा लामानूम्‌नसँ। 30यँमाधँ साप्‍तेमूलूङ्‍क झारा मीनाचीवा नक झारा थोका लामची, आतामा आतीकाक झारा थोका आनानीलाई चाहाछी गूँमा आम्‍नू पावा ङीस। 31माताधँसँ ऊम्‍हालाखम् लामानूम्, खकामा नक झारा थोका खोसावा आनानीलाई पीःनी। 32“स्‍यान बागाला कीननी, यँमाधँ पापावा ऊम्‍हालाखम् आनानीलाई पीमाक सानूवा मूक तूई। 33आम्‍नू झारा बूलूदँची ईनानूम्‌मा झाराकसावा रँरीऊचीकचीलाई प्‍यानूम् आम्‍नूमी लागी पीतीनक थाईली बानामानूम्, हाल्‍लोसँ लूकीनक बूलूदँ नीनाम्‍खम्‌पी खप्‍सानूम्‌हँ यूसानूम्, मपी खूचीपासँ तीन खकामा पूछवासँ यँसँ मी:न। 34यँमाधँ हापी आम्‍बूलूदँ छी मपीङा आम्‍सानूवासँ छी। 35“आम्‍नू छीप्‍तँरी छूईनाचीनी खकामा आम्‍नू मीकूछू दयानूम्‌हँ तूवानी। 36आनानी भ्‍यामी भोजापीका तँबप् लासीमा तीहँ दूवारेखू ढक्‍ढकामीमत्‍तो दूवारेखू हईकाबी चापँवाछाचीतीका चँरीचूबानीहँ तूवानी। 37मक चापँवाछाचीलाई अलने, यँमाधँ ऊम्‍चू तँबप् तीलो खोचीलाई चूङ्‍चूङ्‍धक छीपची। कँ आनानीलाई ऊम्‍छूङ्‍ङा लोनीनी, खोसावा ऊम्‍थपारी छूयमा खोचीलाई चासी यूसचीहँ ऊम्‍चू स्‍यावा म्‍यची। 38खो सेप्‍पाहँपी खकामा आझाई छूसीमा तीलोसँ खोसावा खोचीलाई ईम्‍माम्‍पा तूईमीक छीपचीधँ मक चापँवाछाचीलाई अलने। 39माताधँसँ आनानीवा नक ङीसानूम्, खूचीपा यँबेला ती गीमा खीम्‌पीक तँबप्‌वा ङीसधँने खोसावा ऊम्‍खीम् हईमामा खोचीलाई खीम वँमा प्‍यचीन। 40मातामाङा आनानीसँ चँरीचूबानीहँ तूवानी, यँमाधँ मीनामी छा आनानीवा मीनूहँनूम्‌नलो ती।” 41खकामा पत्‍रूसवा येसूलाई ततू, “प्रभू आनानीवा नक आहाना काएकालाई मात्‍ताई लेकानूम्‌कले, आरू झारालाईसँ लनूम्‌कल्‍या?” 42खतालो प्रभूवा ग्‍या, “मक हँरेप्‍पालो नूवालोक भन्‍डारे आसा? खोलाई ऊम्‍तँबप्‌वा ऊम्‍चापँवाछाचीलाई ठीक्‍का दँमापी ऊम्‍चू चामाक थोका पीमालाई आरामीऊक तूई। 43मक चापँवाछालाई अलने, यँमाधँ ऊम्‍तँबप् तीलो खोसावा माताङा मीचीक छीप। 44कँ ऊम्‍छूङ्‍ङा लोनीनी, खोसावा खोलाई ऊम्‍झारा बूलूदँछोपी आधीकारा प्‍य। 45खन्‍धसँ मक चापँवाछावा ऊम्‍सानूवापी अँ तँबप् तामा छूसी गीहँ आरू चापँवाछाचीलो चापँवामेचीलाई याप्‍सचीमा खोसावाबो चातो दूङ्‍तो मीमा सीतधँ, 46खोसावा मीनहँनक लेपी ऊम्‍तँबप् ती:ती, खकामा खोलाई मारी सजाया प्‍य खकामा मक चापँवाछामी दसा अबीस्‍वसीचीमीतीका छी। 47ऊम्‍तँबप्‌मी सानूवा तूम्‍तमासँ चँरी मन्‍चूब्‍काबी खकामा तँबप्‌मी सानूवातीका चालँवा मन्‍मूकाबी चापँवाछाबो साफी कीःरी। 48मातामाङा तँबप्‌मी सानूवा ङीसनहँ कीर्लोमाक चालँवा मूकाबी अतूछे मात्‍ताई कीःरी। खकामा साफी तोकाबी झारापीका साफीङा लापी खकामा साफी प्‍याकपीका साफीङा ङाकी। 49“कँ खँदीमापी मी तेसी तँक ह, खतालोने पाईलाङा साल्‍काछाकधँ छाक। 50कँ बप्‍तीस्‍मा छूमाक ईत्‍ता बप्‍तीस्‍मा तूई, मक छँनतो कँ साफी ब्‍याकूल छँक तूई। 51यँ आनानीवा कँ खँदीमापी साङ पीसी तँक गीनीमा मीनूनूम्? माता मन, कँ आनानीलाई लोनीनी, बर्जू फाट मूसी तँक ह। 52यँमाधँ हने नाप्‍कानापे ईत्‍ता खीम्‌क झानीपी नँकाबो जना तूईमीधँ खोची खोचीपी फाट छीमी, मातामाङा हीसा जनामी बीरोधापी सूम्‍छी जना छीमी खकामा सूम्‍छी जनामी बीरोधापी हीसा जना छीमी। 53खोचीपी फाट छी ऊम्‍वाच्‍छाछामी बीरोधापी पापा, पापामी बीरोधापी ऊम्‍वाच्‍छाछा, खकामा ऊम्‍मीमाछाछामी बीरोधापी मामा, मामामी बीरोधापी मीमाछाछा छीमी, नाम्‍मेमी बीरोधापी छूमे खकामा छूमेमी बीरोधापी नाम्‍मे छीमी।” 54खकामा खोसावा पीपीछूर्छूर् मीनाचीलाई लूची, “नाम्‌कूर्सालामा ममूला बानीहँक तूनूम्‌लो खोतोलोङा आनानी गीनी, ‘वासोरी’ खकामा माताङा छी। 55आनानी यदूम्‌लामा हू तीलो गीनी, ‘मारी हलूमा छी’, खतालो माताङा छी। 56खचूचेऊ आनानीवा खँदीमालो नाम्‌छूरी खाङूनूम्‌मा यँ छूमा गीहँ मक गीनी, मातामा होतोलो छीहँक मक खाङूनूम्‌मा यँमा आर्था तेमा दूरूनूम्‌न। 57“खकामा आनानी यँमा आम्‍नू हँपावा हाक ऊम्‍छूङ् राछ गीनीमा छूटामूमा दूरूनूम्‌न? 58आम्‍झागारेलो आना हाकीममी लाम्‍लो खातीचीनालो लाम्‌पीङा तोङाखाताची, खन्‍धँने खोसावा आनालाई थूतीनामा न्‍याया मूकाबीपी खायीना खकामा न्‍याया मूकाबीवा तीलीङ्‍गेमी तँबप्‌मी हूपी पीःना खकामा खोसा आनालाई छेमाखीम्‌पी तीना। 59कँ आनालाई लोनी, आनावा झारा बूलू छोरनानातो छेमाखीम्‌पीका यँतामासँ लतीनाना।”

will be added

X\