यूहन्‍ना 8

1[खतालो येसू जाईतून पप्‍चीलाछोपी खाता। 2खकामा मकमी स्‍याल्‍मा भ्‍यानी खो नीनाबूङ् दब्‍माक खीम्‌पी फेरी खाता खतालो मपी मारी मीनाची येसूपी तामी खकामा खोसावा खोचीलाई च्‍यातूची। 3खतालो ब्‍यबस्‍था चेकाबी तकीलो फरीसीचीवा कलवा मूहँलो लापूचीक ईत्‍ता मीमाछालाई बायूचीहँ झारा मीनाचीमी म़झापी यूसूची। 4खकामा खोचीवा येसूलाई लूची, “तकी, नक मीमाछालाई कलवा मूहँलो लापाक ह। 5मोसामी ब्‍यबस्‍थापी कलवा मूकाबीलाई लूङ्‍वा घोर्माहँ सेमाछी ग्‍यामा काएकालाई आग्‍या पेकाक तूई। आतामा आनानीवाबो यँ गीनी त?” 6माताधँसँ खोचीवा येसूलाई ऊम्‍बीरोधापी फक्‍ता तेमा दूरीले ग्‍यामीमा ऊम्‍जँचा मूमालाई आता ग्‍यामीक तूवा। खतालो येसू बबामा भापी ऊम्‍छसीमावा छाबू। 7खतालो खोचीवा येसूलाई मक खा ततूचोचीङा। खकामा येसू पोकाहँ खोचीलाई लूची, “आनानीहँपी आसा खँ मान्‍दूङ्‍क तूईनी। खोसावाबो पाईला खोलाई लूङ्‍वा झाकानूम्।” 8खकामा फेरीसँ येसूवा बबाहँ ऊम्‍छसीमावा भापी छाब्‍माथालामू। 9आतामा खोची ऊम्‍खा ईनूचीमत्‍तो येसूलो मक मीमाछालाई कातूसोचीमा ढ्‍याप्‍पापीका स्‍यान झारा ईत्‍ता मान्‍दूङ्‍ङा पालाई पालो खाल्‍तामी। मातालो मक मीमाछा येसूमी लाम्‍लोपी रीपायाकङा तूवा। 10खकामा येसूवा मक मीमाछालाई खाङूहँ ततू, “ए छ्‌याकूमा, खोची हापी खातामी? आसासँ आनालाई फक्‍ता त्‍यानाना?” 11मातालो मक मीमाछावा ग्‍या, “प्रभू, कँलाई आसावासँ फक्‍ता त्‍यँमूङ्‍न।” खकामा येसूवा खोलाई लू, “कँसँ आनालाई फक्‍ता तेनीन, हने आना खाता, खकामा फेरी हाल्‍लोसँ खँ मून।”] 12येसूवा फेरी खोचीलाई लूची, “कँ साप्‍तेमूलूङ्‍क छ ह। मातामा आसासा कँलाई तीङेमी कँ खोचीलाई पोसूङ्वा पीमाक छ प्‍यँचूङ्, आतामा खोची माकाचूचूपी लाम्‍दूम्‍मा छीन।” 13खकामा फरीसीचीवा खोलाई लूची, “होतोलो आनावा आम्‍हँपामी गाभाई पीनीहँनीचीना, खताधँसँ आनावा गीनाक खाची ऊम्‍छूङ् मन।” 14मातालो येसूवा खोचीलाई लूची, “कँ अँ हँपा अँ गाभाई पीनचूङ्‍धँसँ, अँ गाभाईची ऊम्‍छूङ् तूई, यँमाधँ कँ हापीका तँक, हापी खातँहँ मक कँ ङीसँ। मातालोने कँ हापीका तँक, हापी खातँहँ मक आनानीवा ङीसूनूम्‌न। 15आनानीवा न्‍याया मीनूम्‌लो मीनाचीतीका मीनूम् कँङाने आसामीसँ न्‍याया मन। 16कँङा न्‍याया मखातँधँसँ अँ न्‍याया ऊम्‍छूङ् छी। यँमाधँ कँ न्‍याया मलो अँ हँपा छँन कँलाई पकाबी अँ पासँ कँलो छी। 17आम्‍नू ब्‍यबस्‍थापीसँ हीसा मीनामी गाभाई ऊम्‍छूङ् छी गूँमाक छाबाक तूई। 18कँ अँ बारेपी अँ हँपा गाभाई पीनचूङ्, खकामा कँलाई पकाबी अँ पावासँ अँ बारेपी गाभाई प्‍य।” 19खकामा खोचीवा खोलाई ततूची, “आम्‍नू पा हापी तूई?” मातालो येसूवा खोचीलाई लूची, “आनानीवा कँलाईसँ छ्‌यातेनीन खकामा अँ पालाईसँ छ्‌यातूनूम्‌न। मातालोने आनानीवा कँलाई छ्‌यातँनूम्‌कधँने अँ पालाईसँ छ्‌यातानूम्‌क।” 20नक खाची येसूवा मीनाचीलाई नीनाबूङ् दब्‍माक खीम्‌क बूलूदाम् तेमाक खम्‌धँपी तूवाहँ लूचीक तूवा। मातालोसँ खोलाई आसावासँ लापूचीन यँमाधँ ऊम्‍दँमा असी ताक मान्‍तूवा। 21फेरीसँ येसूवा खोचीलाई लूची, “हने कँ खाल्‍तँ मकामा आनानीवा कँलाई लामेनी, खकामा आनानी आम्‍नू खँपी सीनी। कँ हापी खातँ मपी आनानी खाईमा दूरूनूम्‌न।” 22खतालो यहूदीचीवा ग्‍यामी, “नकसावाने ऊम्‍हँपालाईल्‍या सेमा गीहँले यँल्‍या? यँमाधँ नकसावाने ‘कँ हापी खातँहँ मपी आनानी खाईमा दूरूनूम्‌नल्‍या’ गीहँ त।” 23खकामा येसूवा खोचीलाई लूची, “आनानी मूईनीक ह। कँ मूतूनीक ह। आनानी नक साप्‍तेमूलूङ्‍क ह। कँ साप्‍तेमूलूङ्‍क मन। 24कँ आनानीलाई लोनानी, ‘आनानी आम्‍नू खँचीपी सीनी,’ यँमाधँ कँ खोङा ह गीनीमा बीस्‍वसा मीनूम्‌नधँ आनानी आम्‍नू खँचीपी सीनी।” 25खकामा खोचीवा येसूलाई ततूची, “माताधँ आना आसाल्‍या त?” येसूवा खोचीलाई लूची, “कँ खोङा ह, मक खा कँङा पाईलापीकाङा लोनीहँनीनीक तूई। 26कँ आम्‍नू न्‍यायामी बारेपी साफी खाची पोमा छाक तूई। खन्‍धँसँ कँलाई पकाबी ऊम्‍छूङ् तूई। आतामा खोपीका कँङा ईनक झारा खा साप्‍तेमूलूङ्‍कचीलाई लँचूङ्।” 27मातालो येसूवा ऊम्‍पामी बारेपी लहँचीक गूँमा खोचीवा ङीसूचीन। 28खकामा येसूवा खोचीलाई लूची, “यँ बेला आनानीवा मीनामी छालाई थँपा थ्‍यातीक तूनूम्, मातालो आनानीवा कँ खोङा ह गूँमा ङीसूनूम्। खकामा कँ अँ सानूवातीका यँसँ मःन, खतालोने कँङा पापावा च्‍यातेक थोका मात्‍ताई नीन गूँमाक खा आनानीवा तूम्‍तूनूम्। 29आतामा कँलाई पकाबी कँलोङा तूई, खोसावा कँलाई अँ हँपा मेहँन यँमाधँ कँङा हाल्‍लोसँ खोसावा नतक चालँवा मयँ।” 30खोसावा नक खाची ग्‍यालो मारी मीनाचीवा खोछोपी बीस्‍वसा मूची। 31खकामा येसूवा खोछोपी बीस्‍वसा मूकाबी यहूदीचीलाई लूची, “आनानी कँङावा चेनानीक अँ सीक्‍छेपी साधाई छीयीनीधँ, आनानी ऊम्‍छूङ्‍ङा अँ सीच्‍चेची छीनी। 32खकामा आनानीवा ऊम्‍छूङ् खा यँ राछा मक तूम्‍तूनूम्, मकामा मक ऊम्‍छूङ् खावा आनानीलाई स्‍वतन्‍तारा मीःनी।” 33खकामा खोचीवा येसूलाई लूची, “काएकाने आम्‍का फूपापा अब्राहाममी सासीवन्‍ती ह, आतामा काएका होतोलोतो, आसामीसँ चापँवाछाची छेकाक मान्‍तू। आतामा आनावा, ‘आनानी स्‍वतन्‍तारा छीनी’ गीनाहँ यँ गीनाकल्‍या?” 34येसूवा खोचीलाई लूची, “कँ आनानीलाई ऊम्‍छूङ्‍ङा लोनीनी, आसासावा खँ मीची खोची झाराङा खँमी चापँवाछाची ह। 35चापँवाछाबो खो चापँवाछा छीक खीम्‌पी ऊम्‍आधीकारा यँसँ छीन, माताधँसँ मक खीम्‌क छामीने हाल्‍लोसँ मपी ऊम्‍आधीकारा छीची। 36आतामा छावा आनानीलाई स्‍वतन्‍तारा मीनीधँ ऊम्‍छूङ्‍ङा आनानी स्‍वतन्‍तारा छीनी। 37कँङा ङीसँ आनानी अब्राहाममी चाचायोछाचीधँसँ, आनानीवा कँलाई सेमा चँरीचूबानीक तूई, यँमाधँ कँङा आनानीलाई चेनीनीक खा ग्राहाना मानूम्‌क मान्‍तू। 38अँ पावा कँलाई खँम्‍यँक खाचीङा कँ लोनीनी, खताधँसँ आनानीवा आम्‍नू पापीका यँ ईनानूम्‌क तूई मोङा मीनूम्।” 39खकामा खोचीवा येसूलाई लूची, “आम्‍का पाने अब्राहाम ह” येसूवा खोचीलाई लूची, “आनानी अब्राहाममी छाचीधँने अब्राहामवा मूक झारा थोका आनानीवा मानूम्‌क। 40खतालोने होतोलो नीनाबूङ्‍पीका ईनूङ्‍क ऊम्‍छूङ् खा लोकाबी कँलाई आनानीवा सेमा लामूहँनूम्। अब्राहामवाने आतीकाक चालँवा मूक तूवान। 41आनानीवाने आम्‍नू पावा मूक चालँवाङा मीहँनूम्।” खतालो खोचीवा येसूलाई लूची, “काएका कलवालामा मूनेकाक मन, आम्‍कामीने ईत्‍ता मात्‍ताई पापा तूई, खो नीनाबूङ् ह।” 42येसूवा खोचीलाई लूची, “नीनाबूङ् आम्‍नू पाधँने आनानीवा कँलाई लालूखा म्‍यँनूम्‌क, यँमाधँ कँ नापी नीनाबूङ्‍लामा तँक तूई। कँ नापी अँ सानूवातीका तँक मान्‍तू, बर्जू अँ पावा कँलाई नापी पँसँक ह। 43आनानी यँमा कँङा ग्‍यँक खा ङीमादूरूनूम्‌नक? यँमाधँ आनानीवा कँङावा ग्‍यँक खा ईन्‍मा दूरूनूम्‌न। 44आनानी, आम्‍नू पा साईतानालामाक ह। मातामा आनानीवा आम्‍नू पामी सानूवातीका मूमा लामानूम्। खोने पाईलापीकाङा सेमाखँ मूकाबी ह, खकामा खो ऊम्‍छूङ्‍लाम्‍पे छीमा लाम्‍दूमीन, यँमाधँ खोलो ऊम्‍छूङ् मान्‍तू। खो ऊम्‍बानीतीकाङा वालँ नीःनी, यँमाधँ मक वालँ ह खकामा खो वालँमी पा ह। 45कँ ऊम्‍छूङ् नीन माताधँसँ आनानीवा कँलाई बीस्‍वसा मेनीन। 46आनानीहँपीक आसावा कँलाई खँमी फक्‍ता तेमा दूरेनी? आतामाङा कँ आनानीलाई ऊम्‍छूङ् खाङा लोनीहँनीनीकधँ, यँमा आनानीवा कँलाई बीस्‍वसा मेनीनक? 47आतामा आसासा नीनाबूङ्‍मी ह, खोचीवा नीनाबूङ्‍वा गीक खा ईनची। मातामा आनानीवा अँ खा ईनूनूम्‌नकबो, आनानी नीनाबूङ्‍लामाक मनकसावा ह।” 48खकामा यहूदीचीवा येसूलाई लूची, “काएकावा आना सामरी खकामा आनालाई चाप्‌वा लापानाक तूई गेकाकने ऊम्‍छूङ्‍ङा राछ।” 49खताधँसँ येसूवा खोचीलाई लूची, “कँलाई चाप्‌वा लापेहँन, कँ अँ पामी सायासम्‍दूङ् म खतालोने आनानीवा कँलाई सायासम्‍दूङ् मेनीन। 50कँ अँ माहीमा मूलामन, माताधँसँ ईजाना तूई खोसावा ऊम्‍माहीमा मूलामी खकामा खोसावा न्‍यायासँ मी। 51कँ आनानीलाई ऊम्‍छूङ्‍ङा लोनीनी, आसावा अँ खापी बीस्‍वसा मी खो हाल्‍लोसँ सीन।” 52खकामा यहूदीचीवा खोलाई लूची, “होतोलो काएकावा ऊम्‍छूङ्‍ङा तूम्‍तूम्‌का, आनालाई चाप्‌वा लापानाकङा तूई। यँमाधँ अब्राहाम स्‍या खकामा अगम्‍बक्‍ताचीसँ स्‍यामी, खतालोने आनावा गीना, ‘आसाचीवा अँ खापी बीस्‍वसा मीचीधँ खोची हाल्‍लोसँ सीःमीन।’ 53आनाबो आम्‍का पा अब्राहामकासँ ढ्‍याप्‍पाहँल्‍या? खो स्‍या खकामा अगम्‍बक्‍ताचीसँ स्‍यामी। आतामा आम्‍हँपालाई यँ लोनीचीना?” 54येसूवा खोचीलाई लूची, “कँ अँ माहीमा अँहँपाङा मूनचूङ्‍धँ, अँ माहीमा यँनायँक छी। मातामा कँलाई माहीमा पीकाबी अँ पा तूई खोलाईङा आनानीवा आम्‍का नीनाबूङ् गीनी। 55खोलाई आनानीवा हाल्‍लोसँ छ्‌यातूहँनूम्‌न खताधँसँ कँ खोलाई छ्‌यातँ। कँ खोलाई छ्‌यातँन ग्‍यँधँने कँसँ आनानीतीकाङा वालँ ठराछँ। खन्‍धँसँ कँ खोलाई छ्‌यातँ खकामा ऊम्‍खा र्‌याबँ। 56आम्‍नू पा अब्राहाम कँ तामाक ले तोमालाई हँसहँलँ छाक तूवा, खकामा खोसावा मक ले तूहँ दीम्‍दीम्‍ध छा।” 57खकामा यहूदीचीवा खोलाई लूची, “आनाबो नँक्‍होप् दँ तीलीहँनाना, मातालोने यँतामा आनावा अब्राहामलाई तूनाहँल्‍या?” 58खतालो येसूवा खोचीलाई लूची, कँ आनानीलाई ऊम्‍छूङ्‍ङा लोनीनी, “कँ अब्राहाम छूमापीका पाईलापीकाङा तूङहँ।” 59मातालो खोचीवा येसूलाई लूङ्‍वा झमालाई लूङ् कोपूचीलो, येसू खोचीपीका कूमाहँ नीनाबूङ् दब्‍माक खीम्‌पीका लताहँ खाल्‍ता।

will be added

X\