यूहन्‍ना 18

1येसूवा नीनाबूङ् दबूलो नक खा ग्‍यादूरामा कीद्रोन लूचीक खल्‍सामी मेक्‍कधेपी ऊम्‍सीच्‍चेचीलो खातामी। मपी ईत्‍ता चारीखू तूवा। येसू मपी ऊम्‍सीच्‍चेचीलो वँङामी। 2येसूलाई लाप्‍मापीकाबी यहूदावासँ मक चारीखू तूःक तूवा, यँमाधँ ऊम्‍सीच्‍चेचीलो येसू मपी साफी खेपा ङायूवा तूपूचीक तूवा। 3खकामा यहूदावा ईहूला रोमी तीलीङ्‍गेची खायूचीमा चारीखूपी खाता, खतालो तूम्‍साबू पूजारीचीलो फरीसीचीवा नीनाबूङ् दब्‍माक खीम्‌पी सान्‍टारी तूकाबी तीलीङ्‍गेचीलाईसँ खोचीलो पसूचीक तूवा। खोची तोरीबँ, मीकूछू खकामा बछूलो खातामीक तूवा। 4खकामा येसूवा खोछोपी छीहँक झारा खा तूम्‍तूमा, ऊम्‍चूलाम्‍लोपी भानामा खोचीलाई लूची, “आनानीवा आसालाई लामूनूम्‌कल्‍या?” 5खोचीवा ग्‍यामी, “नासरतक येसूलाई।” खकामा येसूवा खोचीलाई लूची, “कँ खोङा ह।” खतालो खोलाई लाप्‍मापीकाबी यहूदा खोचीलोङा रीपायाक तूवा। 6येसूवा “कँ खोङा ह” लूचीलो, खोची चसी दँसूलाम्‍पे सयामीमा भापी धीसामी। 7खकामा फेरीङा येसूवा खोचीलाई लूची, “आनानीवा आसालाई लामूनूम्‌क?” मातालो खोचीवा ग्‍यामी, “नासरतक येसूलाई।” 8खकामा येसूवा खोचीलाई लूची, “कँ आनानीलाई लोनाखाईनानी, कँ खोङा ह। आतामा आनानीवा कँलाई लामेहँनीकधँ नक मीनाचीलाई खाईमा प्‍यानूम्।” 9“आनानीवा कँलाई प्‍यँनूम्‌कहँपी आसालाईसँ कँ मासूङ्‍चूङ्‍न” गूँमाक खा ताल्‍मालाई नक छाक ह। 10मातालो सीमोन पत्‍रूसवा खोसावा खूरूक ऊम्‍लाम्‍छाप् लातूमा ढ्‍याप्‍पा तूम्‍साबू पूजारीमी माल्‍खस लूचीक चापँवाछामी खारूलाम्‍पेक नाब छामूतीङू। 11खकामा येसूवा पत्‍रूसलाई आता लूमा आरामू, “आम्‍लाम्‍छाप् ऊम्‍दाबापी तीऊ। यँमाधँ अँपावा कँलाई दूङ्‍मा प्‍यँक नक कास्‍टामी खोँ कँ मन्‍दूङ्‍माहँल्‍या?” 12खकामा रोमी तीलीङ्‍गेची खकामा ऊम्‍चू तँबप्, नीनाबूङ् दब्‍माक खीम्‌पी सान्‍टारी तूकाबीचीवा येसूलाई लापूचीहँ छूयूचीमा खायूची। 13खकामा खोचीवा येसूलाई झारापीका पाईला मक दँक ढ्‍याप्‍पा तूम्‍साबू पूजारी काईयाफामी छूमी हन्‍नासपी खायूची। 14झारा मीनाचीमी लागी ईत्‍ता मीना सीमाङा धूङ्‍ली गूँमाहँ यहूदीचीलाई यायो पीकाबी नक काईयाफाङा तूवा। 15सीमोन पत्‍रूसलो येसूमी आर्क सीच्‍चेवा येसूलाई तीङ्‍मा थालामाचू। मक आर्क सीच्‍चेबो ढ्‍याप्‍पा तूम्‍साबू पूजारीलो छेमोचीक तूवा। आतामा खो येसूलोङा ढ्‍याप्‍पा तूम्‍साबू पूजारी तूमाक खीम्‌मी पँतेसाम्‍मङा वँङा। 16खतालो पत्‍रूसबो दूवारेखूपीङा रीपायाक तूवा। खकामा आर्क सीच्‍चेवाबो ढ्‍याप्‍पा तूम्‍साबू पूजारी छ्‌यातूकसावा दूवारेखूपी तूकाबी मीमाछालाई लूमा पत्‍रूसलाई खीम गनू। 17खकामा दूवारेखूपी तूकाबी मीमाछावा पत्‍रूसलाई लू, “आनासँ मक मीनामी सीच्‍चेचीहँपीकङा मनहँल्‍या?” खतालो पत्‍रूसवा मक मीमाछालाई लू, “कँने मनक।” 18मपी सान्‍टारी तूकाबीचीलो चापँवाछाची चूङाकसावा मी भोतो तूवायामीक तूवा। मातालो पत्‍रूसवासँ रीपामा मी भोमा थालामू। 19ढ्‍याप्‍पा तूम्‍साबू पूजारीवा येसूलाई ऊम्‍सीच्‍चेचीलो ऊम्‍सीक्‍छेमी बारेपी ततू। 20खकामा येसूवा खोलाई जूवापा पीऊमा लू, “कँ झारा मीनाचीलो कूम्‍माम्‍पा कीमाम्‍पा नीनक तूई। खकामा झारा यहूदीची ङायूवा तूपूचीक तायाखीम्‌चीपी खकामा नीनाबूङ् दब्‍माक खीम्‌पी खोचीलाई च्‍यातूङ्‍चूङ्‍क तूई। कँ आसासँ तूम्‍तोमाम्‍पा यँसँ ग्‍यँक मान्‍तू। 21आनानीवा यँमा कँलाई ततेचेनीक? अँ खा ईन्‍काबीचीलाई ततानूम्‌या, खोचीवाङा आनानीलाई झारा खाची लीनी।” यँमाधँ कँङा लूङ्‍चूङ्‍क खा खोचीवा ङीसची। 22येसूवा आतीकाक खा ढ्‍याप्‍पा तूम्‍साबू पूजारीलाई लूलो, “ढ्‍याप्‍पा तूम्‍साबू पूजारीलो आतामाङा नेमाछी?” लोतो खोधपी रीपायाक सान्‍टारी मूकाबी पालेवा ऊम्‍ङाबपी हूवा याप्‍सू। 23मातालो येसूवा खोलाई लू, “कँ खाईसाक खा नीनकधँ मक खाईसीक खा यँ राछ मकमी प्रामाना पीऊ, खतालोने कँ ठीक्‍काङा नीनकधँ यँमा याप्‍सेनाक?” 24खकामा हन्‍नासवा येसूलाई छूयाकङा ढ्‍याप्‍पा तूम्‍साबू पूजारी काईयाफापी पसू। 25सीमोन पत्‍रूस आझाई मीङा भूचोक तूवा। खतालो मपी तूकाबीचीवा खोलाई ततूची, “ऊम्‍सीच्‍चेचीहँपीक ईत्‍ता आनासँ मनहँल्‍या?” खतालो पत्‍रूसवा ऊम्‍चू खा छीङूमा आता ग्‍या, “कँने मनक।” 26ढ्‍याप्‍पा तूम्‍साबू पूजारीमी चापँवाछाचीहँपीक ईत्‍तावा ग्‍या, “कँ आनालाई खोलो चारीखूपी तोनाक मनहँल्‍या?” मक चापँवाछाबो पत्‍रूसवा नाब कीबूक मीनामी नात तूवा। 27खतालोसँ पत्‍रूसवा फेरी ऊम्‍खा छीङू खोतोलोङा सँरीवापा ओका। 28खकामा नाम्‌वारी फाकामा येसूलाई काईयाफामी खीम्‌पीका रोमीचीमी सारकारी ढ्‍याप्‍पा खीम्‌पी खायूची। खतालो यहूदी सासाकाची ईसीक छेकामा खीर्मासोमाक चाराक भोजा चामा नीक छेकान ग्‍यामीमा कीसामीहँ खीम वँङामीन। 29खकामा पीलातस खोचीपी पाखा लतामा ततूची, “नक मीनामी लागी आनानीलो यँ फक्‍ता तूई?” 30खकामा खोचीवा पीलातसलाई लूची, “नक मीनावा काचूवाकोई मूक मान्‍तूधँने, खोलाई काएकावा आनापी बाईमाङा बायूम्‌कानक।” 31खकामा पीलातसवा खोचीलाई लूची, “नकलाई खायानूम्‌हँ आम्‍नू ब्‍यबस्‍थातीका ऊम्‍न्‍याया मानूम्।” खतालो यहूदीचीवा पीलातसलाई लूची, “आसालाईसँ सीमाक दान्‍डा पीमाक आधीकारा काएकालाई मान्‍तू।” 32खकामा खो यँतामा सी राछ मकमी सङ्‍केता पीतो ग्‍याक खा ताल्‍मालाई नक झारा छाक ह। 33खकामा पीलातस फेरी खीम वँङामा येसूलाई काछूमा, “आना यहूदीचीमी हँ ह?” लूमा ततू। 34खकामा येसूवा पीलातसलाई ततू, “नक प्रास्‍ना आनानी आम्‍नूहँपा ग्‍यानीक ले, आनानीलाई अँ बारेपी आरू आसाचीवाङा लानीकल्‍या?” 35मातालो पीलातसवा येसूलाई लू, “कँ यहूदीहँल्‍या? आम्‍मीनाचीलो आम्‍तूम्‍साबू पूजारीचीवा आनालाई अँ हूपी प्‍यँमूङ्‍क ह। आनावा यँ मूना?” 36खकामा येसूवा खोलाई लू, “अँ हालाखम् नक साप्‍तेमूलूङ्‍क मन। अँ हालाखम् नक साप्‍तेमूलूङ्‍कधँने, कँलाई तीङ्‍माकीची यहूदीचीमी हूपी कँ मन्‍छूमालाई म़ामीक थीय। खतालोने अँ हालाखम् नक साप्‍तेमूलूङ्‍क मन।” 37पीलातसवा येसूलाई, “आना ऊम्‍छूङ्‍ङा हँहँल्‍या?” लूमा ततू। खकामा येसूवा पीलातसलाई लू, “आनानीवाङा कँलाई हँ लेहँनी त। ऊम्‍छूङ्‍बो कँ नकमी लागीङा मूनक ह। खकामा नकमी लागीङा ऊम्‍छूङ्‍मी गाभाई पीसी नक साप्‍तेमूलूङ्‍पी तँक ह। आतामा आसासा ऊम्‍छूङ्‍लाम्‍पेक तूईमी खोचीवा अँ खा ईनची।” 38पीलातसवा येसूलाई, “ऊम्‍छूङ् यँल्‍या?” लूमा ततू। ऊतो लूमा पीलातस फेरी यहूदीचीपी पाखा लतामा खाताहँ खोचीलाई लूची, “कँ खोपी यँसँ फक्‍ता छीपूङ्‍न। 39हने चाराक दँमापी कँ ईत्‍ता काईदीलाई लेमाछोमाक आम्‍नू राम्‍पूवा तूई। माताछाकसावा, कँ यहूदीचीमी हँलाई आम्‍नूमी लागी लीतूङ्‍ने गूँमाक आम्‍नू सानूवा तूई?” 40खतालो खोची पातामीमा ग्‍यामी, “खोलाई मन, बारब्‍बालाईबो ल्‍याछानूम्।” बारब्‍बाबो काचूवाकोईवाला तूवा।

will be added

X\