याकूब 4

1आनानीहँपी म़मालो खीमाक लाम् यँतामा बूसी? नक झारा थोकाने आम्‍नू सूखा चाईना तोमालाई आनानीपी म़ीयीक आम्‍नू सानूवापीका तीःक मनहँल्‍या? 2आनानीवा यँ यँ तोमाक सानूवाने मीनूम्, खतालो आनानीवा तूनूम्‌न। आनानीवा मीना सीतूनूम्, झाली मीनूम्, खताधँसँ तूनूम्‌न। आनानी खीनी म़ीनी खताधँसँ आनानीलो छीन, यँमाधँ आनानी नीनाबूङ्‍लो ङाकूनूम्‌न। 3आनानीवा ङाकूनूम्‌लो तूनूम्‌न, यँमाधँ आनानीवा आम्‍नू सूखा चाईना पूर मूमालाई खाईसीक सानूवापीका ङाकूनूम्। 4कलवा मूकाबी मीनाचेऊ, साप्‍तेमूलूङ्‍कचीलो तोङ्‍माखाईमाबो नीनाबूङ्‍मी सातूरा छूमा ह गूँमा आनानीवा ङीसूनूम्‌न? आतामा आसावा साप्‍तेमूलूङ्‍लो तोङ्‍माखाईमाक सानूवा मी, खोसावा ऊम्‍हँपालाई नीनाबूङ्‍मी सातूरा मूनीची। 5पबीत्‍रा धार्मसास्‍तारापी, काएपी यूसूक ऊम्‍आत्‍मामी लागी नीनाबूङ्‍वा मारी फूम् मी ग्‍यामा छाबाक खा आनानीवा यँनायँक दाबूनूम्? 6खन्‍धँसँ खोसावा काएलाई झान मारी ऊम्‍ममारूङ् पेक तूई, मातामा पबीत्‍रा धार्मसास्‍तारावा गी, “नीनाबूङ्‍वा याक्‍तँ खूर्काबीचीमी बीरोधा मी, खकामा सानूवापा छूकाबीचीलाई ममारूङ् प्‍यची।” 7आतामा आनानी आम्‍नूहँपालाई नीनाबूङ्‍पी पीनाखाईनाचीनीहँ ऊम्‍हूपी तूवानी। साईतानामी बीरोधा मानूम्, खतालो खो आनानीपीका फूसीमा खाती। 8नीनाबूङ्‍मी छेऊपी बानानी, खकामा खो आम्‍नू छेऊपी बानी। खँवालाचेऊ! आम्‍नू हू नीक मानूम्। दूङ्‍मासेचेऊ, आम्‍नू सागूँवा नीक मानूम्। 9आम्‍नू कँचाईसीक छूने, चूलाईलोनी, खकामा खापानी। आम्‍नू घीमाक खाबो खाप्‍माक खापी सईने। मकामा आम्‍नू दीम्‍दीम्‍ध छूमाक खाबो चूलाईलोमाकपी सईने। 10परमप्रभूमी लाम्‍लोपी आम्‍नूहँपालाई सानूवापा मूनाचीनी, खकामा नीनाबूङ्‍वा आनानीलाई ढ्‍याप्‍पा मीःनी। 11रूमीपामीचेऊ, आनानी ईत्‍ताबो आर्कमी बीरोधापी खाईसीक यँसँ नेननी। आसा ऊम्‍‍‍‍‍‍‍रूमीपामीमी बीरोधापी खाईसीक खा नीनी खकामा खोलाई फक्‍ता त्‍यधँ, खो ब्‍यबस्‍थामी बीरोधापी नेकाबी, खकामा खो ब्‍यबस्‍थालाई फक्‍ता तेकाबी छी। आतामा आनानी ब्‍यबस्‍थालाई फक्‍ता तीऊनूम्‌धँ, ब्‍यबस्‍थावा गीक खातीका पूकाबी मन, बर्जू ब्‍यबस्‍थामीबोल्‍या आनानी न्‍याया मूकाबी छीनी त। 12ब्‍यबस्‍था पीकाबीलो न्‍याया मूकाबीने ईत्‍ता मात्‍ताई तूई। खोसावा सेमासँ दूर खकामा लेमेमासँ दूर। खन्‍धँसँ आम्‍नू रूमीपामीलाई फक्‍ता तेकाबी आनानी आसाहँल्‍या? 13“ईसेधँसँ स्‍याल्‍माधँसँ मक फालाना साप्‍सेमापी खाते, मपी ईदँ तूये, खकामा ब्‍यापारा म्‍याम्‌मा नाफा लाताम्” गूँकाबीचीवा ईनानूम्। 14स्‍याल्‍मा यँ छी आनानीवा ङीसूनूम्‌न। आम्‍पोसूङ्‍वा यँहँल्‍या? आनानीने ममूला मात्‍ताई ह, मक ऊछीना मात्‍ताई दाती खकामा मासीखाती। 15नकमी थूम्‍सूङ्‍पीने आनानीवा बर्जू आता ग्‍यानीकधँने छाक थीय, “प्रभूमी सानूवातीका छीधँ, काएका लीतेका खकामा आता माता म्‍याम्‌का।” 16खताधँसँ होतोलो आनानी याक्‍तँ खूरीनीमा धाका तीऊनूम्। आतीकाक याक्‍तँ खूर्माक झारा थोकाने खाईसीक थोका ह। 17आतामा आसावा खान्‍नीक चालँवा मूमाछी गीमा ङीसमासँ मीन खोसावा खँ मी।

will be added

X\