हीब्रू 8

1काएकावा गेहँकाक खास खामी आर्थाबो: एमी आतीकाक ढ्‍याप्‍पा तूम्‍साबू पूजारी तूई, खो नीनाम्‍खम्‌पी झारापीका ढ्‍याप्‍पा नीनाबूङ्‍मी सींहासनमी खारूलाम्‍पे तूवाक तूई। 2खकामा खोसावा मीनावा मन, नीनाबूङ्‍वा बानामूक पबीत्‍रा खम्‌पी, मकामा मक ऊम्‍छूङ्‍ङा मारी पबीत्‍रा पालापी ढ्‍याप्‍पा तूम्‍साबू पूजारी छीःमा चालँवा मी। 3यँमाधँ झारा ढ्‍याप्‍पा तूम्‍साबू पूजारीची, बूलूदाम् चारामूमालो नीनाबूङ्‍लाई लँपेर्‌वामी बलीदाना चारामूमालाई छ्‌यातीमीक छी। आताछाकसावा एढ्‍याप्‍पा तूम्‍साबू पूजारीलोसँ नीनाबूङ्‍लाई चारामूमाक यँनायँने छूमाङा छी। 4खो खँदीमापी तूवाकधँने पूजारी छूमाङा छानक, यँमाधँ ब्‍यबस्‍थातीका बूलूदाम् चारामूकाबी पूजारीचीने तूवाहँमीकङा तूवा। 5खोचीवा नीनाम्‍खम्‌पीक पबीत्‍रा खम्‌मी नाक्‍कालालो लाछेमी स्‍यावा मीची। यँमाधँ मोसावा पबीत्‍रा खम् बानामूमा ग्‍याहँलो, नीनाबूङ्‍वा खोलाई आता लूक तूवा, “आनावा पप्‍चीलापी तूनाक यादेतीकाङा झारा थोका बानामू।” 6खन्‍धँसँ ख्रीस्‍टवा पूजारीमी चालँवा मूकने झारामीपीका ढ्‍याप्‍पा तूई। आतामाङा खोसा नीनाबूङ्‍लो मीनामी म़झापी माध्‍यास्‍था मूक करारसँ पाईलाक करारपीका ढ्‍याप्‍पा तूई। यँमाधँ नक करारमी जाग झारापीका ढ्‍याप्‍पा प्रतीग्‍याछोपी त्‍याक तूई। 7यँमाधँ पाईलाक करार खोटा मान्‍दूङ्‍क तूवाकधँने आर्क करार चाहाङा छानक। 8खतालोने नीनाबूङ्‍वा पाईलाक करारपीक गाल्‍ती छीपूहँ आता लूची, “परमप्रभूवा गी, हने मक ले ती, खलो ईस्राएलक मीनाची, खकामा यहूदाक मीनाचीलो कँ ईत्‍ता नयाँ करार सूरू म। 9नक नयाँ करार कँ ऊम्‍चू फूपापाचीलाई मीस्र नाम्‍दपीका ऊम्‍चू हूपी लापूङ्‍चूङ्‍मा लातूङ् बायूङ्‍चूङ्‍लो मूङ्‍क करारतीकाक छीन। खतालोने खोची अँ करारपी ख्‍याबायामीन, आतामा कँ खोचीलाई फूम् मीङ्‍चूङ्‍न। 10परमप्रभूवा गी, मक लेपीका पाछी कँ ईस्राएलक मीनाचीलो नक करार म। कँ ऊम्‍चू सानूवापी अँ ब्‍यबस्‍था यूङ्‍प्‍यँचूङ्, ऊम्‍चू सागूँवापी मक छाब्‍प्‍यँचूङ् खकामा कँ ऊम्‍चू नीनाबूङ् छँ, मकामा खोची अँ जाईची छीमी। 11‘परमप्रभूलाई छ्‌यातानूम्’ गीमीमा हने नाप्‍कानापे आसासँ ऊम्‍रेबारूङ्‍चीलाईलो ऊम्‍रूमीपामीचीलाई च्‍यातचीन। यँमाधँ ढ्‍याप्‍पालो स्‍यान खोची झारावाङा कँलाई छ्‌यातेमी। 12यँमाधँ कँ ऊम्‍चू खँची धाईप्‍यँचूङ्, खकामा ऊम्‍चू खँची कँ हाल्‍लोसँ मीनन।” 13नयाँ करार गेमत्‍तो नीनाबूङ्‍वा पाईलाकलाई पूरान लूक ह। खकामा हाक्‍कबो पूरान छीहँ थत्‍रे छी, मक मासीहीसीहँ खाती।

will be added

X\