प्रेरीत 4

1पत्‍रूसलो यूहन्‍ना मीनाचीलो नीनाहँचीतोङा, पूजारीची, नीनाबूङ् दब्‍माक खीम्‌क तीलीङ्‍गेचीमी तँबप् खकामा सदूकीची खोचीपी तामी। 2खतालो ऊम्‍चू छूली काताक तूवा, यँमाधँ खोचीवा येसू ऊसामा पोकाक तूई, नकसावा येसूपी मीनाची ऊसीमीमा पोकीमीक प्रामाना तालूक तूई ग्‍याचीमा मीनाचीलाई च्‍याताहँचूक तूवा। 3खकामा खोचीवा पत्‍रूसलो यूहन्‍नालाई लापूचीमा स्‍याल्‍मासाम्‍म छीऊचीहँ यूसूची यँमाधँ मक ले नाम्‌कूरादूराक तूवा। 4खताधँसँ नीनाबूङ्‍मी खा ईन्‍काबी मारीवाङा बीस्‍वसा मूची। आतामा बीस्‍वसा मूकाबीची झारा नँक्‍होतोङ् लाईतो छामी। 5आतामा स्‍याल्‍मा यहूदीचीमी अगूवाची, धार्म तकीची खकामा ब्‍यबस्‍था चेकाबीची यरूसलेमपी ङायूवा तूपूचीक तूवा। 6ढ्‍याप्‍पा तूम्‍साबू पूजारी हन्‍नास, खकामा काईयाफा, यूहन्‍ना, अलेक्‍जेन्‍डर खकामा ढ्‍याप्‍पा तूम्‍साबू पूजारीमी झानीची झाराङा मपी तूवामी। 7खोचीवा पत्‍रूसलो यूहन्‍नालाई झारामी म़झापी रीप्‍मीऊची खकामा ततूची, “हाक्‍क रलामा खकामा आसामी नूङ्‍लामा आनाचीवा नक चालँवा माचूनाक?” 8मातालो पत्‍रूस पबीत्‍रा आत्‍मावा प्‍याबूमा ग्‍या, “मीनाचीमी अगूवाचीलो, धार्म तकीचेऊ, 9ईसे काचीकावा ऊम्‍लँ तसानक ईत्‍ता मीनाछोपी खान्‍नीक चालँवा माचूकाकमी गार्नापी खो यँतामा नो गीनीमा ततीचीकानूम्‌धँ, 10आनानी झारा खकामा ईस्राएलक झारा मीनाची नक खा तूम्‍तनूम्, आनानीवा क्रूसापी कसानूम्‌क खकामा नीनाबूङ्‍वा स्‍याकपीका ऊसूक मक नासरतक येसू ख्रीस्‍टमी नूङ्‍पीका नक मीना नोक खकामा आम्‍नू लाम्‍लोपी रीपाक तूई। आतामा धार्मसास्‍तारावा येसूमी बारेपी गी, 11‘आनानी चीखीम् पोकाबीचीवा छीङासानूम्‌क मक लूङ्‍ङा होतो ऊम्‍सूरा लूङ् छाक तूई।’ 12येसूपीका आरू आसालामासँ माच्‍छे तम्‌न, यँमाधँ नीनाम्‍खम्‌मी खूँपी माच्‍छे तोमाक आर्क नूङ् मीनाचीहँपी आसालाईसँ प्‍याक मान्‍तू।” 13खकामा खोची पत्‍रूसलो यूहन्‍नामी साहासा तूचीमा अतलल छाखातामी, खकामा खोचीवा पत्‍रूसलो यूहन्‍ना नूवामी तायामीसँ मनक मीनाची राछ ग्‍यामीमा तूम्‍तूची। खकामा खोची येसूलो तूवाचीक खासँ खोचीवा तूम्‍तूची। 14खताधँसँ खोचीवा मक नोक मीनालाई पत्‍रूस खकामा यूहन्‍नालो रीपायाक तूचीमासँ नेमादूरूचीन। 15खकामा खोचीवा पत्‍रूसलो यूहन्‍नालाई ढ्‍याप्‍पा साभापीका पाखा खाताची लूची। खकामा खोची ऊम्‍चूहँपा ङायूवा तूपूचीमा यायो मूमा थालामूची, 16खोचीवा ग्‍यामी, “हने काएवा नक मीनाचीलाई यँ मूमा त? यँमाधँ ऊम्‍छूङ्‍ङा नकचीपीका ईत्‍ता अतलल छेक चालँवा छाकने झारा यरूसलेमक मीनाचीवा ङीसचीङा, खकामा काएसँ नक मन गेमा छीङ्‍मा दूराम्‌न। 17नक खा झारा मीनाचीहँपी ताल्‍नने ग्‍यामीमा, हने नाप्‍कानापे आरू आसालोसँ आनाची नेनची, लोमामा काएवा खोचीलाई लोमाछी।” 18खकामा खोचीवा पत्‍रूसलो यूहन्‍नालाई फेरी खीम काछूचीमा, “हने नाप्‍कानापे आनाचीवा येसूमी नूङ्‍पी आसालोसँ नेनची खकामा च्‍याताचूनसँ” लूचीमा खोचीलाई आग्‍या पीऊची। 19खतालो पत्‍रूसलो यूहन्‍नावा खोचीलाई लूची, “नीनाबूङ्‍मी लाम्‍लोपी आम्‍नू खा ईन्‍माले नीनाबूङ्‍मी खा ईन्‍मा हाक्‍क धूङ्‍ली मक आम्‍नूहँपाङा मीनानूम्। 20यँमाधँ काचीकावा तचूकाकलो ईनाचूकाक खा नेमाम्‍पा तूमा काचीका दूर्माङा दूरूचूकान।” 21खकामा ढ्‍याप्‍पा साभापी दोसामीक मीनाचीवा खोचीलाई सजाया पीमाक लाम् तूचीनमा आझाई मारी पायूचीहँ लीऊछोची। यँमाधँ मपी छाक नीनाबूङ्‍मी चालँवा तूचीमा मीनाचीवा नीनाबूङ्‍मी साया पूयोचीक तूवा। 22यँमाधँ मक अतललक चालँवालामा नोक मीना लँक्‍होप् दँ तालादूराक तूवा। 23खकामा पत्‍रूसलो यूहन्‍ना मपीका लताचीहँ ऊम्‍चू बूमीचीपी लासाचीहँ खाताची। खकामा खाताचीहँ तूम्‍साबू पूजारीचीवालो धार्म तकीचीवा लूचीक झारा खाची खोचीलाई लचू। 24खोची झारावा नक खा ईनूचीमा नीनाबूङ् दब्‍तो आता ग्‍यामी, “झारापीका ढ्‍याप्‍पा ऊम्‍रलोक प्रभू, आनानीवा नीनाम्‍खम्, खँदीमा, होङ्‍कामा, खकामा मपी तूईक झाराङा लीसानूम्‌क ह, 25खकामा आनानीवा पबीत्‍रा आत्‍मालामा आम्‍नू सेवाका आम्‍का फूपापा दाऊदमी ङोपी छानीमा ग्‍यानीक तूई, ‘आर्क जाईची धँमा झँकाछीमी, मीनाचीवा धँमा यँनायँक खापी जाला मूमा मीनची? 26प्रभूमी बीरोधापी खकामा ऊम्‍अभीसीक्‍ता जनामी बीरोधापी खँदीमापीक हँची पोकामी खकामा मीनाचीमी सासाकाची ईखेपाङा ङायूवा तूपूची।’ 27यँमाधँ आनानीवा अभीसेक मानूम्‌क, आम्‍नू पबीत्‍रा सेवाका येसूमी बीरोधापी हेरोदलो पन्‍तीयस पीलातस हीसाङा, आर्क जाईची खकामा ईस्राएलक मीनाचीलो नक साप्‍सेमापीङा ङायूवा तूपूचीकने ऊम्‍छूङ्‍ङा ह। 28मपी छाक झारा तेतँनीङा आम्‍नू हूलामालो आम्‍नू योजानालामा ठरामानूम्‌कतीकाङा छा। 29हने प्रभू ऊम्‍चू मूसँवा ईनानूम्, खकामा आम्‍नू खा साहासालो कँदीम्‍नाचीमाहँ नेमालाई आम्‍नू सेवाकाचीलाई र प्‍यानूम्। 30खकामा आनानीवा नोमेमालाई आम्‍नू हू सतूनूम्‌लो आम्‍नू पबीत्‍रा सेवाका येसूमी नूङ्‍पी मारी अतलल छेक चालँवालो लासाईची छूनेवो।” 31आतामा खोचीवा नीनाबूङ् दबूदूरूचीमा खोची तूवामीक चीखीम् योसा, खकामा खोची झारा पबीत्‍रा आत्‍मावा प्‍याबूचीहँ कँदीम्‍नाचीमीमा नीनाबूङ्‍मी खा नीनामी। 32झारा बीस्‍वसा मूकाबीची ईत्‍ताङा सागूँवा खकामा ईत्‍ताङा सानूवा छामीक तूवा। खकामा खोचीहँपीक आसावासँ ऊम्‍चू बूलूदँची नक अँमी मात्‍ताई ग्‍यामीन। खतालोने खोचीमी झाराङा साझे तूवा। 33प्रेरीतचीवा ढ्‍याप्‍पा रलो प्रभू येसू ऊसामा पोकाकमी गाभाई पीऊची। खकामा खोचीछोपी नीनाबूङ्‍मी ममारूङ् साफी छाक तूवा। 34आतामा खोचीहँपीक आसालाईसँ यँमीसँ खँच मान्‍तूवा, यँमाधँ चासूम्‌लालो खीम्‌ची छूकाबीचीवा ऊम्‍चू चासूम्‌लालो खीम्‌ची ईनूचीमा बूलू तातूयोचीक तूवा, 35खकामा प्रेरीतचीमी हूपी पीऊची। खकामा आसासालाई खँच तूवा मकची झारालाई हाईपीऊची। 36खोलो मपी साईप्रस नाम्‍दपीक लेबीमी चाचायोछाक योसेफ तूवा। खोलाई प्रेरीतचीवा बारनाबास नूङ् वायूचीक तूवा, 37खोसावा ऊम्‍चासूम्‌ला ईनूमा ताक बूलू प्रेरीतचीमी हूपी पीऊची।

will be added

X\