प्रेरीत 19

1अपोल्‍लोस कोरीन्‍थीपी तूवालो पावल भीत्‍र ईलाकापीका छूतो एफीससपी भाना। खतालो खोसावा मपी कोई कोई सीच्‍चेचीलाई छीपूची। 2खकामा खोसावा खोचीलाई ततूची, “आनानीवा बीस्‍वसा मानूम्‌लो पबीत्‍रा आत्‍मा तनूम् त?” खतालो खोचीवा ग्‍यामी, “अँहँ काएकावाने पबीत्‍रा आत्‍मा तूई गूँमासँ ईनाम्‌हँकान।” 3खतालो पावलवा खोचीलाई ततूची, “खताधँ आनानी यँतीकाक बप्‍तीस्‍मा छानी त?” खतालो खोचीवा पावललाई लूची, “यूहन्‍नामी बप्‍तीस्‍मा।” 4खकामा पावलवा खोचीलाई लूची, “यूहन्‍नावा पीऊचीक बप्‍तीस्‍माबो खँ मूमा छीमामा नीनाबूङ्‍लाम्‍पे सानूवा लामाक बप्‍तीस्‍मा ह। खकामा खो पाछी ती:क मीना येसू ह। खोछोपी आनानीवा बीस्‍वसा मानूम् लूचीमा मीनाचीलाई यूहन्‍नावा हालाबूची।” 5खकामा खोचीवा नक खा ईनूचीमा प्रभू येसूमी नूङ्‍पी बप्‍तीस्‍मा छामी। 6खकामा पावलवा खोचीछोपी ऊम्‍हू यूसूलो खोचीछोपी पबीत्‍रा आत्‍मा धाता, खकामा खोचीवा लापा गूँ खकामा अगम्‍बानी नीनामी। 7खोची झारा ईत्‍हीस् लापा लाईतो तूवामी। 8खकामा पावल तायाखीम्‌पी वँङामा कँदीम्‍नाचीहँ सूम्‍छी माईनातो खोचीलाई नीनाबूङ्‍मी हालाखम्‌मी बारेपी पूर्पाछे मूचोहँ मीनाचीलाई बीस्‍वसा दीलामूमेमा बाल्‍ला मू। 9खतालो कोई कोई मारी याक्‍तँ खूरामीहँ बीस्‍वसा मूचीन, खकामा प्रभूवा खँमीऊचीक लाम्‌मी बीरोधापी मीनाचीमी लाम्‍लोपी खोची नीनामी खतालो पावल खोचीपीका छूटाछामा सीच्‍चेचीलाई खोलो खायूचीमा टूरान्‍नसमी ढ्‍याप्‍पा चेमाखीम्‌पी लेक ले पूर्पाछे मूमा थालामूची। 10नक चालँवा हीसा दँतो छाया, खकामा एसीयापी तूकाबी झारा यहूदीचीलो ग्रीक हीसावाङा प्रभूमी खा ईनूची। 11खकामा नीनाबूङ्‍वा पावलमी हूलामा ढ्‍याप्‍पा अतललक चालँवाची मू। 12ऊत्‍तोसाम्‍म छा पावलवा गाङूक रूमालाचीलो खोसावा हूप्‍सूक ते सामवा लापूचीक मीनाचीपी खायूचीमा खोचीछोपी यूसूचीलो खोची नोखातामी, खकामा ईसीक आत्‍माचीसँ खोचीपीका लतामीमा खाल्‍तामी। 13खतालो भेपानापे कोल्‍मातेकाबी कोई कोई फाफू मूकाबी यहूदीचीवा ईसीक आत्‍माचीलाई प्रभू येसूमी नूङ्‍पी लातू तीतूचीक तूवा। खोचीवा आता ग्‍यामीक तूवा, “पावलवा हालाबक येसूमी नूङ्‍पी कँ आनानीलाई आग्‍या पीनीनी।” 14मपी ईत्‍ता स्‍केवास लूचीक यहूदी ढ्‍याप्‍पा पूजारीमी सावाबो ऊम्‍वाच्‍छाछाचीवा आता मूचीक तूवा। 15ईले मक ईसीक आत्‍मावा जूवापा पीऊचीमा खोचीलाई लूची, “येसूलाईसँ, खकामा पावललाईसँ कँङावा छ्‌यातँ, खतालोने आनानीबो आसाल्‍या?” 16खकामा मक ईसीक आत्‍मावा लापूक मीना खोचीछोपी तईतो भाना खकामा खोची झारालाई लापूचीमा धाप्‍सूची, आतामा खोची मक खीम्‌पीका सीमानालेमा छामीहँ ते मान्‍दूङङा फूसामी। 17नक झारा खा एफीससपी छूकाबी यहूदीलो ग्रीक हीसावाङा ईनूची। खकामा खोची झाराङा कीसामी, खकामा मपी प्रभू येसूमी नूङ्‍मी ढ्‍याप्‍पा सायासम्‍दूङ् छा। 18खकामा बीस्‍वसा मूकाबीचीसँ साफीवा खोचीवा मूचीक ऊम्‍चू खँसापी चालँवापीका ऊम्‍चू सानूवा लासूचीमा तामीहँ खोचीवा मूचीक झारा चालँवा ग्‍यामी। 19खकामा खोचीहँपीक साफी टूनामूना मूकाबीची झारावा ऊम्‍चू ऊम्‍चू कीतापाची भ्‍याला मूतातूची, खकामा झारामी लाम्‍लोपी हूयूतीङूची। खोचीवा मक झारामी मोला मूचीलो नँक्‍होतोङ् छमीमी सीक्‍का लाईतो हीसापा लता। 20आतामा प्रभूमी खा पर्तो झारालाम्‍पे खातामा ऊम्‍रलोक छा। 21खकामा नक झारा खाची छामा पबीत्‍रा आत्‍मावा लूतीका पावल माकेडोनीयालो अखाईयामी लाम् छूतो यरूसलेम खाईमालाई ऊम्‍सानूवापी मीन्‍नाची। खकामा खोसावा ग्‍या, “कँ यरूसलेम तालँमा रोमसँ खाईमाङा छी।” 22खकामा खोसावा खोलाई भकाबी हीसा तीमोथीलो, ईरास्‍तसलाई माकेडोनीयापी पसूची, खताधँसँ खोबो चसी ले एसीयापीङा तूवा। 23मातामा मक दँमापी मपी प्रभूमी लाम्‌मी सीक्‍छेमी गार्नावा हूल्‍दाङ्‍गा माच्‍चाछा। 24यँमाधँ डेमेतीरीयस लूचीक ईत्‍ता मीना तूवा। खो छमीमी सीकीया मूलूवा मूकाबी तूवा। खोसावा देबी अर्तेमीसमी छमीमी मखीम्‌ बानामूमाक चालँवा पीऊचीमा चालँवा मूकाबीचीलाई साफी चालँवा पीऊचीक तूवा। 25खकामा खोसावा खोचीलो आरू आतीकाकङा चालँवा मूकाबीचीलाई ङायूवा तूप्‍मीऊचीहँ खोचीलाई लूची, “बूमीचेऊ, आनानीवा ङीसूनूम् नक चालँवापीकाङा काएवा खान्‍नीक आम्‍दानी मूम्‌क तूई। 26आनानीवा तूयूनूम्‌क खकामा ईनूयूनूम्‌कङा तूई, एफीससपी मात्‍ताई मन झारा एसीयाभोरीङा हूवा बानामाक मचीबो यँसँ मननी गीमा पावलवा साफी मीनाचीलाई लीमूचीमा ऊलूखायूचीक तूई। 27आताधँने हने खान्‍नीतो एब्‍यापारा छीन मकामा काए सामास्‍सेपी वङे खकामा झारा एसीयालो साप्‍तेमूलूङ्‍वा सायासम्‍दूङ् मूचीक मक ढ्‍याप्‍पा देबी अर्तेमीसमी मखीम्‌सँ यँनायँक छीखाती खकामा ऊम्‍माहीमापीका पतन छी।” 28खतालो खोची नक खा ईनूचीलो ऊम्‍चूछूलीवा मारी हीरामीहँ, आता गूँतो पाईमा थालामूची, “एफीसीचीमी अर्तेमीस ढ्‍याप्‍पा तूई।” 29झारा साप्‍सेमापी हाल्‍लाखाल्‍ला छा, खकामा खोची ईत्‍ताङा छामीहँ झारा तोङामीमा पावललो साङ्‍गाई माकेडोनीयापीका ताचीक गायसलो अरीस्‍तार्खसलाई लापूचीमा साईतो रङ्‍गासालापी खायूची। 30खतालो पावल मक पीपीछूर्छूर् मीनाचीपी खाईमा लामू खताधँसँ सीच्‍चेचीवा खोलाई खाईमा पीऊचीन। 31एसीयाक कोई कोई मूख्‍या मीनाची पावलमी बूमीची तूवामी खोचीवा पावललाई रङ्‍गासालाहँपी खाईननी लूचीमा खाबारा हसूची। 32खतालो खोची भीन्‍दाई भीन्‍दाई खा पोतो पातामी यँमाधँ मक पीपीछूर्छूर् मीनाचीहँपी हाल्‍लाखाल्‍ला माच्‍चाछाक तूवा। खतालोने साफी मीनाचीवा खोची यँमा ङायूवा तूपूचीकल्‍या मकसँ तूम्‍तूहँचीन। 33खतालो पीपीछूर्छूर् मीनाचीहँपीक कोई कोई यहूदीचीवा अलेक्‍जेन्‍डरलाई लाम्‍लो तीऊची, खकामा अलेक्‍जेन्‍डरवा साङ छूने ग्‍यामा ऊम्‍हूवा छ्‌याम् मीऊचीमा मीनाचीवा तीऊचीक फक्‍ता ऊम्‍छूङ् मन ग्‍यामा नेमाक सानूवा मू। 34खतालोने खोचीवा खो यहूदी राछ गूँमाक खा तूम्‍तूचीमा खोची झारावा ईत्‍ता सँलँवापीङा, “एफीससक अर्तेमीस ढ्‍याप्‍पा ह” ग्‍यामीमा हीसा घान्‍टातो पाताचामी। 35खकामा मक नगराक हाकीमवा मीनाचीलाई मानेपा तूमीऊचीमा खोसावा ग्‍या, “एफीससक मीनाचेऊ, एफीसस साप्‍सेमाबो ढ्‍याप्‍पा अर्तेमीसमी मखीम् खकामा नाम्‌छूरीपीका धाक ऊम्‍ततूम्‍बालाई खान्‍नीतो सान्‍टारी पीमामा यूङ्‍माक थाम्‍पूङ् ह गीमीहँ साप्‍तेमूलूङ्‍क झारा मीनाचीवाङा ङीसची। 36आनानी नक खा ऊम्‍छूङ् ह गूँमा ङीसूनूम्, आतामा आनानी मानेपा तूवानी खाईसीक चालँवा मूमा ईसी। 37यँमाधँ आनानीवा तातानूम्‌क नक मीनाचीवा, मखीम्‌सँ लूटामीहँचून खकामा एदेबीमी नूलासँ ससूहँचून। 38आतामा डेमेतीरीयस खकामा ऊम्‍चालँवा मूकाबीचीलो आरू कोई कसाईमी बीरोधापी यँची तूईधँ आदालताची तूई खकामा न्‍यायाधीसाचीसँ तूईहँमीङा, आतामा खोची खाईमीनेमा मूद्‍दा तेमोमीने। 39खताधँसँ नकपीकासँ आरूङा खा तूईधँ मकमी फाईसाला साधाईङा छीक साभापी छूमाछी। 40यँमाधँ ईसेक हूल्‍दाङ्‍गामी फक्‍ता काएकाछोपी तामाक खतरा तूई। यँमाधँ नक काराना मान्‍दूङ्‍क हूल्‍दाङ्‍गामी जूवापा काएकावा पीमा दूराम्‌कान।” 41खोसावा आता ग्‍यामा मक साभापी ताकाबीचीलाई बीदा पीऊची।

will be added

X\