प्रेरीत 14

1हने पावललो बारनाबास आईकोनीयनपी साङ्‍गाई यहूदीचीमी तायाखीम्‌पी वँङाचीहँ मीनाचीलो नीनाचीलो साफी यहूदीचीलो ग्रीकचीवा बीस्‍वसा मूची। 2खकामा बीस्‍वसा मन्‍मूकाबी यहूदीचीवा आर्क जाईचीलाई ऊलूची खकामा खोचीवा रूमीपामीचीमी बीरोधापी ऊम्‍चू सानूवा चाईसाक मीऊची। 3प्रभूपी हँरेप्‍पा माचूमा अँटालो नेतो खोची साफी लेसाम्‍म मपी तूवाची। खकामा प्रभूवा ऊम्‍चू हूपीका लासाईचीलो अतललक चालँवा मूमा ऊम्‍ममारूङ्‍मी खामी गाभाई पीऊ। 4खतालोने साप्‍सेमापीक मीनाचीपी फाट छामी खकामा कोई यहूदीचीलाम्‍पे खकामा कोई प्रेरीतचीलाम्‍पे खातामी। 5खकामा आर्क जाईचीलो यहूदीची हीसाङा ऊम्‍चू सासाकाचीलो तोङामीमा खोचीलाई खाईसीक चालँवा मूचीमा लूङ्‍वा घोर्मा दोसामी। 6खकामा खोचीवा आतीकाक खा तूम्‍तचूमा, लूकोनीयामी साप्‍सेमाची लूस्‍तारालो डार्बी खकामा मकमी मेक्‍कानापेकाक थाम्‍पूङ्‍लाम्‍पे फूसाचीहँ खाताची। 7खताधँसँ खोचीवा मक थाम्‍पूङ्‍पी खान्‍नीक खा हालाबाचाचूङा। 8लूस्‍तारा साप्‍सेमापी ऊम्‍लँ तमा दूरूनक ईत्‍ता मीना तूवायाक तूवा। खो मूनालोपीकाङा मातीकाकङा तूवा। खो हाल्‍लोसँ लाम्‍दूमाहँन। 9खोसावा पावल नीनाक ईनूयोक तूवा। खतालो पावलवा खोलाई कीकीरीरी खाङूलो मक ऊम्‍लँ तसानक मीनापी नीक बीस्‍वसा तूई गूँमाक तूमा, 10पावलवा खोलाई लू, “आम्‍लँमी रपी आना रीपा।” खतालो खो तया खकामा लाम्‍दूम्‍मा थालामू। 11खकामा पावलवा मूक चालँवा तूचीमा पीपीछूर्छूर् मीनाचीवा ढ्‍याप्‍पा सँलँवापी “नीनाबूङ्‍ची मीना छामीमा काएकापी मूईनी तामी राछ।” ग्‍यामीमा लूकोनीयाक गूँपी ग्‍यामी। 12खोचीवा बरनाबासलाई जीऊस लूची खकामा पावललाई हर्मेस लोमा थालामूची यँमाधँ पावलबो मूख्‍या नेकाबी तूवा। 13खकामा साप्‍सेमाक लाम्‍लोपी तूवाक जीऊस दब्‍माक खीम्‌क पूजारीवा साप्‍सेमाक मूल दूवारेखूचीपी पपीचीलो बूङामी मालाची बायूचीमा मपीक मीनाचीलो तोङामीमा खोचीलाई बलीदाना पीमाक सानूवा मूची। 14खतालोने प्रेरीतची पावललो बारनाबासवा मक खा ईनाचू, खकामा खोचीवा ऊम्‍चू ते पीताचूहँ आता गूँतो मीनाचीपी भूल्‍तो खाताची, 15“मीनाचेऊ, आनानीवा यँमा आतीकाक चालँवा मीनूम्‌क ल्‍या? काचीकासँ आनानीतीकाङा दूखा सूखा तोकाबी मीनाची ह, खकामा काचीकावा आनानीलाई नक यँनायँक खापीका नीनाम्‍खम्, खँदीमा, होङ्‍कामा खकामा मपी तूईक झारा थोका लीस्‍काबी जीऊँद नीनाबूङ्‍लाम्‍पे लामालाई खान्‍नीक खा आनानीलाई ईन्‍मीनी। 16खोसावा तेतँनी लूकाक दँमापी झारा जाईचीलाई ऊम्‍चू ऊम्‍चू चालानातीकाङा लाम्‍दूम्‍मा पीऊची। 17खताधँसँ खोसावा ऊम्‍हँपालाई गाभाई मान्‍दूङ्‍क मूनाचीन, खकामा खोसावा आनानीलो खान्‍नीक चालँवा मूमा नाम्‌छू‌‍‌‌‌‌‌‌‌रीपीका आनानीलाई वा सोर्‌मीऊहँ ठीक्‍का दँमापी चासूम् प्‍यानी, खकामा आनानीलाई मारी चासूम् प्‍यानीहँ आम्‍नू सागूँवालाई दीम्‍दीम्‍ध मीऊ।” 18आतामा खोचीवा बलाईवा मक झारा मीनाचीलाई काचीका मँ मन ग्‍याचीमा खोचीलाई बलीदान चारामूमापीका चीबाचू। 19खतालो कोई कोई यहूदीची एन्‍टीओखीयापीकालो आईकोनीयापीका मपी तातामी खकामा मीनाचीलाई ऊलूचीमा पावललाई लूङ्‍वा घोरूची खकामा खो स्‍या राछ ग्‍यामीमा साप्‍सेमापीका साईतो तेखू खायूची। 20खतालोने सीच्‍चेची ऊम्‍मेक्‍कानापेका रीपामीलो खो पोका खकामा साप्‍सेमापी वँङा। खकामा स्‍याल्‍मा मपीका लतामा बारनाबासलो डर्बी खाताची। 21पावललो बारनाबासवा मक साप्‍सेमापी खान्‍नीक खा हालाबाचूहँ साफी सीच्‍चेची माचूमा, खोची लूस्‍तारा, आईकोनीया, खकामा एन्‍टीओखीयापी लासाची। 22सीच्‍चेचीलाई तयातोल्‍तो नूवाताया पीऊची, खकामा काए साफी कास्‍टा तोतो नीनाबूङ्‍मी हालाखम्‌पी वँमाछी लूची। 23खकामा खोचीवा ऊम्‍चू झारा मन्‍डालीचीपी धार्म तकीची छ्‌याताचू, खकामा ङोयाङाचूहँ नीनाबूङ् दबाचूमा खोचीलाई खोचीवा बीस्‍वसा माचूक प्रभूमी हूपी जीम्‍मा प्‍याचू। 24खकामा खोची पीसीदीया छूतो पामफीलीयापी ताची। 25पर्गापी नीनाबूङ्‍मी खा हालाबाचूमा खोची अटालीयापी धाताची। 26खकामा खोची मपीका पानी जहाजालामा एन्‍टीओखीयापी लासाची, मपी खोचीवा दूराचूक चालँवाक लागी नीनाबूङ्‍मी ममारूङ्‍पी बीस्‍वसीचीवा खोचीलाई आर्पन मीऊचीक तूवा। 27खकामा खोची एन्‍टीओखीयापी ताताची खकामा झारा मन्‍डालीलाई ङायूवा तूप्‍मीऊचीहँ नीनाबूङ्‍वा खोचीलो मूक झारा खाची खोचीलाई लूची, आतामा खोचीवा यँतामा नीनाबूङ्‍वा आर्क जाईचीमी बीस्‍वसामी लाम् हईपीऊची मक खा खोचीलाई लूची। 28खकामा मपी खोची सीच्‍चेचीलो साफी लेतो तूवाची।

will be added

X\