Tito 3

1Llapan irmänunchicunata willapanqui mayur runacunatapis, auturdäcunatapis wiyacunanpaj. Arushun niptin, arunman. 2Pitapis pampaman ama çhuranmanchu. Ama tincupänacunmanchu. Manchäga llaquipänacuyta, alli ñawinwan ricanacuyta yaçhanman. 3Ñaupata Tayta Diosninchita mana wiyacushanchi wichan upa rinri cashcanchi. Rumi shungu cashcanchi. Jucpa shimillanta wiyacushcanchi. Shungunchi munashallanta rurar, paçhallanchita ashishcanchi. Warmin-warmin purishcanchi. Runa-masinchita juyu ñawinchipa ricashcanchi. Juyu cashcanchi. Chiquinacuyllaçhu arushcanchi. 4Chaypis Tayta Diosninchi jishpichimajninchi. Llaquipämashanchitapis musyachimashcanchi. Chaynuypis llapan runata llaquipan. 5Mana Moiséspa shiminta çharcushanchipitachu llaquipämashcanchi. Manchäga alli shungu cashpan washämashcanchi. Ushyacuptinchi, juchanchita mana yarparanchu. Chayraj yurish-jina caycanchi. Alli ñawinwan ricaycämanchi. Shungun munashallanta rurananchipaj Espíritu Santu shacyächimanchi. 6Payta Tayta Diosninchi caçhamusha Washäcuj Jesús camacächiptin. Payga jishpichimajninchim. 7Llaquipämashpanchi juchaynajta ricamanchi. Wamran cashpanchi maquinçhu imaycamanpis cawananchita shuyarcaycanchi. 8Tito, Tayta Diosninchipa shungun munashallanta willapaycaj. Chaymi manchapacur cawananpaj irmänunchicunata sumaj willapanqui. Paycuna yanapänacunman. 9Ichanga pipis: Tayta Diosninchi alli ricamänanchipaj Moiséspa shimintapis çharcushuwan. Unay auquillunchi yarpashannuylla rurashuwan nir tincupäshuptiqui, upällachinquiman. Paycuna ima rimashantapis mana musyanchu. Umallanpita imatapis jurguycan. 10Paycunata juc-ishcay cutilla piñacunqui. Mana wiyacuptin irmänunchi captinsi, jargurinqui. 11Tincupänacuyllaçhu arujcuna juchata aparicullar purin. Quiquinpa juchanpita ñacaymanpis çhayanga. 12Irmänunchi Artemasta carpis, Tíquicuta carpis, caçhamuyta yarpaycä. Mayganpis çhayamuptin, Nicópolis marcaman juclla shamunqui tincunanchipaj. Tamya wichan captin, chay marcaçhu juyapäriyta yarpaycä. 13Yaçhaj Zenastapis, Apolutapis yanapanqui, ari. Tayta Diosninchipa shiminta willapäcur puriptin, imasi pishishancunata tarichinqui. 14Pitapis tarichinanpaj irmänunchicuna sumaj arunman. Tayta Diosninchipa maquinçhu cawar, ama jilla runa cashunchu. 15Cayçhu caycaj irmänunchicuna llapanmi wamayäshunqui. Jampis Jesús-janan llaquipämashanchi irmänucunata wamayapämanqui, ari. Llapallayquita Tayta Diosninchi yanapayculläshunqui allilla cawanayquipaj. Chayllana.

will be added

X\