Tito 2

1Tito, jammi ichanga imaypis Tayta Diosninchipa shimillanta willapäcunqui, ari. 2Chacha runacuna Tayta Diosninchipa shiminta çharcunman. Tantiyacurir-tantiyacurir imatapis rimanman. Runa-masintapis alli ñawinwan ricanman. Imatapis allillata ruranman. Tayta Diosninchimanpis llapan shungunwan yupachicunman. Llaquipäcuj canman. Ima ñacaytapis içhipunman. 3Chacha warmicunapis Tayta Diosninchita manchapacunman. Pipa washantapis ama rimanmanchu. Upyallaçhu ama arunmanchu. Manchäga juc ricacunanpaj Tayta Diosninchita manchapacur cawanman. 4Mushuj majachacash warmicunatapis willapanman majantawan wamrancunata alli ricananpaj, 5sumaj tantiyacurir-tantiyacurir imatapis rurananpaj, mama-warmi cananpaj, yawar-masincunata alli ricananpaj, llaquipäcuj cananpaj, majanta wiyacunanpaj. Manchapacur cawaptinga, mana pipis Tayta Diosninchipa shiminta pampaman çhurangachu. 6Müsucunapis sumaj tantiyacurir-tantiyacurir imatapis ruranman. 7Tito, ricacushunayquipaj quiquiquipis manchapacur cawanquiman. Pitapis willapar, alli shimillayquipa willapanqui. Tayta Diosninchita manchapacunqui. 8Paypa shimillanta yaçhachicuptiqui, mana pipis pampaman çhurashunquipächu. Shimïta wiyacamaptiqui, mana pipis ashllimäshunchu. Imata rimananpäpis achäquita mana taringachu. 9Piyun purijcunatapis willapanqui patrunninta wiyacunanpaj, alli ricananpaj. Shimillan atipash ama cachunchu. 10Ama suwacuchunchu. Imatapis mana yatapacuptinga, llapan runa tantiyacunga Tayta Diosninchi Washäcujninchi cashanta, shimin alli cashanta. 11Tayta Diosninchi llaquipäcuj cashpan llapan runata janaj pachaman jishpichinan-raycur Washäcuj Jesústa caçhamusha. 12Llaquipaycämaptinchi, jucha aparicuypita wanacushun. Shungunchi munashanta imatapis ama rurashunchu. Manchäga Tayta Diosninchita manchapacur, allillata rurar cawashun. 13Taytanchi Jesucristu warasi-chicasi cutimunga. Paymi Tayta Diosninchi. Washämajninchi. Shuntacamänanchita shuyar, manchapacur cawashun. 14Washäcuj Jesús wañuymanpis çhayasha nuwanchi-raycur juchapita wanacunanchipaj. Wanacuptinchi, Tayta Diosninchi llapan juchanchita junganga. Llapantapis rurasha maquinçhu cawananchipäpis, shungun munashallanta rurananchipäpis. 15Tito, willapashajta llapanta tantiyachinqui. Shacyächinqui. Sumaj piñapanqui. Pipis pampaman çhurarushunquiman.

will be added

X\