Romanos 9

1Irmänucuna, Israel-masïcuna Washäcuj Jesúsman mana yupachicuptin, llaquish cawä. Mana llullacüchu. Washäcuj Jesúsman yupachicuptï, Espíritu Santu yanapäman rasullanta rimanäpaj. 2Sumaj-sumaj llaquicü. Waran-waran shungüpis nanan. 3Israel-masïcuna Washäcuj Jesúsman yupachicunan-raycur, imamanpis çhayäman. Juyu ñawinpa Tayta Diosninchi ricamänan captinsi, mana llaquicümanchu. 4Israel runacunaga Jacobpa willcallan caycanchi. Israel runacunallata Tayta Diosninchi wamrachacuran. Chunyaj pachaçhu purishan wichanpis achic-achicyaycar ricaripunyaran. Parlanacunyaran. Sinaí puntaçhu shimintapis musyachiran. Quiquinmi wasinçhu imanuy-imanuy alliman çhurananpäpis, jarananpäpis tantiyachiran. Yawar-masillanpita Washäcuj yurinantapis auniran. 5Unay auquillunchicuna caycan Abraham, Isaac, Jacob. Paycunapa willcallanpita Washäcuj yurinantapis Tayta Diosninchi camacächiran. Yawar-masillan Jesús caycaptinsi, Israel-masïcuna wasguiparan. Washäcujninchi Jesúsmi ichanga cay pachatapis, llapan imacunatapis maquinçhu charan. Payga Tayta Diosninchim. Payllata imaypis alliman çhurashun. Chaynuy caycullächun. 6- 7Israel-masïcuna Washäcujta wasguipänanpaj, ¿Tayta Diosninchichuraj aunishanta cutiricuran? Mana. Tayta Diosninchi mana Abrahampa, Jacobpa llapan willcancunatachu wamrachacuran. Mana Israel runacunallatachu wamrachacuran. Manchäga shungun munashallanta wamrachacuran. Quiquin Abrahamtapis niran: ‹‹Isaacnillayquita wamrachacushaj. Payllapita willcayquicuna miranga.›› 8Tayta Diosninchi mana Abrahampa llapan wamrancunatachu wamrachacuran. Manchäga aunishan-jina jucnayllata wamrachacuran. 9Abrahamta aunir, Tayta Diosninchi niran: ‹‹Watan caynuy wichan cutimuptï, majayqui Sara wamrayujna caycanga. Llapanta camacächishaj.›› 10Auquillunchi Isaacpapis warmin Rebecaçhu ishcay wamran caran. 11- 13Ichanga wamrancuna mana yuriptillan, allita, mana allita rurananpis mana musyacaptillan, Tayta Diosninchi Rebecata niran: ‹‹Jichpa wamrayqui shullcanpa maquinçhu cawanga.›› Tayta Diosninchipa shiminçhüpis isquirbiraycan: ‹‹Shullca captinsi Jacobta llaquipar, wamrachacushcä. Esaútam ichanga jichpa captinsi, wasguishcä.›› Tayta Diosninchi shungun munashallanta wamrachacun. Payga allita, mana allita rurashantapis mana ricanchu. Manchäga munashallanta camacächin. 14¿Chaymi: ‹‹Tayta Diosninchi llutanta ruraycan›› nishuwanchuraj? Mana. 15Moiséstapis marca-masinpaj mañacapuptin, quiquin Tayta Diosninchi niran: ‹‹Manacaj captinsi munar, pitapis wamrachacushaj. Shungü munashan-cajllata llaquipäshaj.›› 16Tayta Diosninchi wamrachacamänanchipaj mana quiquinchichu callpachacunanchi. Manchäga llaquipashpan shungun munaptin, pitapis wamrachacun. 17Shiminçhüpis Egipto marca mandajta Tayta Diosninchi nin: ‹‹Faraón, munayniyuj canayquipaj camacächishcä. Chaymi nishä-nishäta rurachishayqui nuwalla munayniyuj cashäta llapan runa musyananpaj. May-chayçhüpis nuwallata manchapacamanga.›› 18Tayta Diosninchi munar, pipa shunguntapis chucruyächin ullgujyänanpaj. Llaquipayta munar, pitapis llaquipan. 19Sumaj tantiyacushun. ‹‹Tayta Diosninchi shungun munashallanta camacächin›› niptï waquinniqui llutanta yarpar, niramanquiman: ‹‹Juchata aparicuptinchisi, Tayta Diosninchi mana piñapämäshunchu. Paypa shungun munashanta mana ticrachishuwanchu›› nir. 20¿Pitaj canchi Tayta Diosninchita ashipänanchipaj? Mitu manca-yupay caycanchi. Mitu manca quiquin manca-rurajta mana ninmanchu: ‹‹¿Imanirtaj cay-nirajta ruramashcanqui?›› 21Manca-rurajga yarpashanta mitupita ruran. Chay mitullapita waquin mancata ruran cuyayllapaj; waquinta mana. Chay-jina Tayta Diosninchipis yarpashanta nuwanchiwan ruran. 22- 24Chaymi juchallaçhu arujcunata ushyacächinan camacan. Ushyacächimänanchi captinsi, juchanchita jurgapämänanchi captinsi, Tayta Diosninchi llaquipämänanchi camacan. Paypa maquinçhu cawaycanchi. Israel runa captinchisi, jäpa runa captinchisi, unaypita-pacha acracamashcanchi llaquipämashanchita tantiyacunanchipaj. Llapaninchita acracamashcanchi imaycamanpis janaj pachaçhu cawananchipaj. 25Chaymi Oseas isquirbishan libruçhüpis Tayta Diosninchi nin: ‹‹Jäpa runacunata wajta runa-jina ricaj carsi, acracushaj wamrachacunäpaj. Wasguishcunata llaquipar, sumaj llaquipäshaj. 26‹¿Piraj cacullanquipis?› nishä runacunata wamrachacushaj.›› Jananmanpis nin: ‹‹ ‹Jamcunata mana ricsijpishchu. Mana wamrächu canqui› nish captïsi, runacuna jinallançhu auninga: ‹Cawaj Tayta Diosninchipa wamrancuna carcaycanqui› nir.›› 27- 28Israel runacunapaj Isaías niran: ‹‹Israel runacuna agu-jina chay-chicajmi. Chaypis jucha aparicushanpita Tayta Diosninchi llapanta-yupay ushyacächinga. Mana llaquipar, juclla ushyaypa ushyarachinga. Auquillunchicunata aunishanta çharcurmi ichanga, waquin-waquillanta jishpichinga.›› 29Jananmanpis Isaías niran: ‹‹Auquillunchicunata waquin-waquillanta Munayniyuj Tayta Diosninchi mana jishpichiptin, Sodoma marcawan Gomorra marca ushyacashan-jina nuwanchipis pasaypa illarishuwan caran.›› 30Canan sumaj tantiyacushun. Jäpa runacunata mana imatapis ruraycaptin, alli ñawinwan Tayta Diosninchi rican Jesúspa shiminta çhasquicushallanpita. 31- 32Israel runacunatam ichanga Jesúspa shiminta mana çhasquicushanpita wasguiparan. Paycuna Tayta Diosninchi alli ricananta munar, Moiséspa shimin nishannuylla tucuyta ruraran: ‹‹Paypa shiminta llapanta çharcuptï, alli ñawinwan Tayta Diosninchi ricamanga›› nir. Chaymi Jesústa tunichicuj rumita-jina ricar, shimintapis mana çhasquicuranchu. 33Israel runacuna Washäcujta wasguinanpaj shiminçhu Tayta Diosninchi musyachicuran: ‹‹Sión marcaçhu juc runa yuringa pitapis llutäpacachinanpaj. Tunichicuj rumita-jina runacuna ricanga. Achcajmi wasguipanga. Pingaymanpis çhayanga Paypa shiminta çhasquicurmi ichanga, alli cawayta taringa. Imaypis mana pingayman çhayangapächu›› nir.


Copyright
Learn More

will be added

X\