Romanos 5

1Chaymi Taytanchi Jesucristuman yupachicuptinchi, alli ñawinwan Tayta Diosninchi ricamanchi. Jesucristu wañuyninpa juchaynajta ricamashpanchi maquinçhüpis allilla cawachimanchi. 2Jesucristu camacächisha Tayta Diosninchipa shungunwan tincunanchipaj. Payga llaquipämashpanchi maquinçhu purichimanchi. Janaj pachaman apacamänanchita musyarpis, cushish cawaycanchi. Ñaupallançhu cawashunpaj. 3Runacuna ñacachimaptinchisi, cushish cawanchi. Ñacaywan Tayta Diosninchipa shungun munashannuy cawayta sumaj yaçhacunchi. 4Shungun munashannuy cawayta yaçhacuptinchi, shungunwan tincunchi. Shungunwan tincuptinchi, ñaupanman apacamänanchita mana yamacaypa shuyaraycanchi. 5Chaymi ñacayman çhayaptinchisi, shungunchi mana llaquicunchu. Manchäga maquinçhu Espíritu Santu purichimaptinchi, Tayta Diosninchi llaquipämashanchitapis sumaj tantiyacunchi. 6Llapanchi juchaçhu cawaptinchisi, wañuypita jishpiyta mana camäpacuptinchisi, nuwanchi-raycur Washäcuj Jesús wañuyman çhayananta Tayta Diosninchi camacächiran. 7Alli runata, Tayta Diosninchipa shiminta çharcuj runata pipis wañuy-caway washanman. 8Tayta Diosninchim ichanga sumaj llaquipämanchi. Wasguiptinchisi, juchaçhu aruycaptinchisi, jishpichimänanchi-raycur Washäcuj Jesús wañuyman çhayananta camacächiran. 9Wañur, caway-bïdanta çhurasha alli ñawinwan Tayta Diosninchi ricamänanchipaj. Washämaptinchi, Tayta Diosninchipa ullguynin jasacäcusha. Ñacaymanpis mana çhayachimäshunpänachu. 10Chiquiptinchisi, shungunwan shungunchi tincunanta munaran. Chaymi nuwanchi-raycur Wawan Jesús wañuyman çhayananpaj camacächiran. Cananmi ichanga cawarimusha. Cawarish caycar, sumaj yanapaycämanchi Tayta Diosninchipa maquillançhu cawananchipaj. Chaymi alli ricanacunchi. 11Chaypitam shiminchita mana amucurcunchichu. Manchäga alli ñawinwan Tayta Diosninchi ricamashanchipita, washämänanchi-raycur Tayta Jesucristuta caçhamushanpita sumaj cushicunchi. 12Sumaj tantiyacushun. Unayga Tayta Diosninchita mana wiyacur, Adán juchata aparicuran. Chaypita wañuran. Wañuran juchata aparicushanpita. Cananpis Adán-jina llapanchi juchata aparicushanchipita wañuyman çhayashunpaj. 13Moisés mana willapäcuptillan, unay runacunapis juchallaçhu cawaran. Chaymi paycuna chapacuyta mana camäpacuranchu: Shimiquita mana musyashcächu nir. Chaynuy chapacuptinsi, llapanpa juchanta Tayta Diosninchi jurgaparan. 14Chaymi Adán cawashan wichanpita Moisés cawashan wichancaman llapan runa juchata aparicushanpita wañuran. Quiquin Adán juchata aparicushan-jina llapan runa wañuyman çhayan Tayta Diosninchipa shiminta mana musyarpis. Chaymi tincuchiypa tantiyachimanchi: Adán llapan runata wañuyman jançharan. Washäcuj Jesúsmi ichanga llapan runata alli cawayta tarichinanpaj camacächiran. 15Jesucristu Tayta Diosninchita wiyacuran. Adánmi ichanga mana wiyacuranchu. Adánpita llapanchi wañuyman çhayashunpaj juchata aparicushanchipita. Jesucristupitam ichanga sumaj llaquipämashpanchi alli ñawinwan Tayta Diosninchi ricamanchi. Tayta Diosninchipa maquinman çhayachimänanchi-raycur caway-bïdanta Jesús çhuraran. 16Tayta Diosninchi llapanchita jurgapämäshunpaj ima juchata aparicushanchitapis. Jurgapämäshun Adán juchata aparicushanpita. Paypa juchan llapanchita aypämashcanchi. Juchayuj caycar, ñacayman çhayananchi camacan. Chaypis llaquipämashpanchi alli ñawinwan Tayta Diosninchi ricamanchi: Juchaynaj canqui nir. 17Adán mana wiyacushanpita llapanchi wañuyman çhayananchi. Jesucristu washämaptinchim ichanga, Tayta Diosninchiwan allina ricanacunchi. Sumaj llaquipämashpanchi alli ñawinwan ricamanchi. Chaymi janaj pachaçhu imaycamanpis Jesucristuwan cawashunpaj. 18Chaymi Adánlla juchata aparicush captinsi, llapanchitana Tayta Diosninchi jurgapämäshunpaj: Jucha-sapa canqui nir. Jesústa wiyacuptinchim ichanga, alli ñawinpa ricamashpanchi imaycamanpis cawachimäshunpaj. 19Adán mana wiyacushanpita llapanchi juchata aparicushcanchi. Jesústa wiyacushanchipitam ichanga alli ñawinwanna Tayta Diosninchi ricamanchi. 20Unayga Moiséswan Tayta Diosninchi shiminta musyachicuran runacuna alliçhu cawananpaj. Runacunam ichanga çharcuyta mana camäpacur, juchaçhu arushanta tantiyacuran. Juchata aparicuptinsi, Tayta Diosninchi mana yamacaranchu. Manchäga unay runacunatapis, nuwanchitapis sumaj llaquipaycämanchi. 21Mayganinchipis juchata aparicushanchipita wañuyman çhayananchi caran. Llaquipämashpanchi Taytanchi Jesucristu washämaptinchim ichanga, alli ñawinwan Tayta Diosninchi ricamanchi. Janaj pachaçhu imaycamanpis cawananchipaj shuntacamäshunpaj.

will be added

X\