Romanos 4

1- 2 Cananga Abrahampita tantiyacushun. Israel runacuna alli-tucur riman: Abrahamga marcanchipa unay taytan. Paytaga Tayta Diosninchi alli ñawinwan ricaran nir. Abraham alli cawaptin, marca-masincunapis alli ñawinwan ricaran. Tayta Diosninchim ichanga mana alli cawashanpitachu alli ñawinwan ricaran; manchäga yupachicushallanpita. 3Shiminçhüpis isquirbiraycan: Yupachicushallanpita Abrahamta alli ñawinwan Tayta Diosninchi ricaran nir. 4Canan mä, tantiyacushun. Arupacur çhasquishanchi mana jarayninchichu; manchäga callpanchipa çhaninmi. 5Tayta Diosninchim ichanga alli ñawinwan ricamanchi mana imatapis arushanchipitachu, mana imatapis rurar cawashanchipitachu. Manchäga juchaçhu cawaycaptinchisi payllaman yupachicuptinchi, alli ñawinwan ricamanchi. 6Unaypis chaynuy caran. Yupachicushallanpita Tayta Diosninchi runacunata alli ñawinwan ricaran; mana ima allitapis rurar cawashanpitachu. Shungunman tincuptin, cushish cawaran. Chaymi unay mandaj David cantaran: 7Cushicärishun. Tayta Diosninchipa shungunman tincunchi. Jucha aparicushanchita jungasha. Llutan rurashanchita mana yarparannachu. 8Cushicärishun. Alli ñawinwan Tayta Diosninchi ricamanchi. Juchanchita mana imaysi jurgapämäshunnachu nir. 9Chaynuy captin, yarpaçhacushun. Tayta Diosninchi, ¿pitataj alli ñawinwan rican? ¿Jïrucush Israel runacunallatachuraj? Mana. Musyanchi Abrahamta yupachicushallanpita Tayta Diosninchi alli ñawinwan ricashanta. 10Alli ñawinwan ricananpaj, ¿Abraham jïrucushachu? Mana. Jïrucuyta mana yaçhaycarsi, Tayta Diosninchiman yupachicuran. Jipataraj jïrucusha. 11- 12 Jïrucunanpaj Tayta Diosninchi niran: Abraham, yupachicamar, jïrucuy. Yupachicamashayquipita shungüman tincunqui. Chaymi waquin auquillunchicuna mana yuriptillanräsi, auquillunchi Abrahamta alli ñawinwan ricaran. Payga Tayta Diosninchipa maquinçhu cawananpaj, änir jïrucusha. Chaynuypa Abraham Tayta Diosninchiman yupachicujcunapa taytan-yupay caycan. Chaymi mana jïrucush jäpa runa captinchisi, jïrucush Israel runa captinchisi, Abraham-jina yupachicuptinchi, alli ñawinpa Tayta Diosninchi ricamanchi. 13Unayga Abrahamta aunir, Tayta Diosninchi niran: Abraham, yupachicamashayquipita pï-maytapis alli ricashaj. Jam-raycur, willcayquicuna-raycur, pï-maytapis sumaj yanapäshaj. Chaura mana Moiséspa shiminta çharcushanpitachu auniran; manchäga yupachicushallanpita. 14Chaymi: Moiséspa shiminta çharcujcunalla Tayta Diosninchi aunishanta çhasquinga nimaptiqui, ¿imapäraj Tayta Diosninchiman yupachicunchi? ¿Imapäraj Tayta Diosninchipis auniran? 15Jäpa runacuna Tayta Diosninchipa shiminta mana çhasquiranchu. Chaymi wiyacushanpitapis, mana wiyacushanpitapis Tayta Diosninchi juchanta mana jurgapanmanchu. Waquin runacunam ichanga Tayta Diosninchipa shiminta çhasquirsi, mana çharcunchu. Chaymi mana wiyacushanpita, Tayta Diosninchita ullgüchishanpita, unyanta cutichinan camacan. 16Payman yupachicuptinchim ichanga, aunishanta Tayta Diosninchi çharcun. Llaquipämashpanchi alli ñawinpa ricamanchi. Chaymi Moiséspa shiminta wiyacuj Israel runa carsi, jäpa runa carsi, Abraham-jina yupachicushun. Yupachicujcunaga Abrahampa wawanwan tincun. 17Aunishanta unayna Tayta Diosninchi musyachicuran. Shiminçhüpis isquirbiraycan: Abraham, chay-chica marcapa taytan canayquipaj jamta acracushcaj nir. Tantiyayta mana atiparsi, Abraham sumaj yupachicuran. Tayta Diosninchi wañushcunata cawarachinantapis, mana ricashancunata camacächinantapis musyaran. 18Tantiyayta mana atiparsi, Tayta Diosninchi aunishanman Abraham sumaj yupachicuran. Payta aunish caran: Abraham, willcayquicuna chay-chicaj cangapaj. Yupaytasi mana atipaypaj miranga. Chay-tucuyçhüpis marcayangapaj nir. 19Auninacushan wichan Abraham paçhac (100) wata-yupayta aywaycaran. Churiyäcunanpaj alläpa chachana caycaran. Warmin Sarapa quilla jishyanpis çharcushana caycaran. Chaypis Tayta Diosninchi aunishanman Abraham yupachicuran. 20Ishcay yarpayta mana yarparanchu. Manchäga sumaj yupachicuran. Tayta Diosninchitapis alliman çhuraran: Taytallau Tayta, ima allish wamrata tarichimanquipaj nir. 21Aunishanta Tayta Diosninchi camacächinantapis musyaran. 22Chaynuy yupachicuptin, alli ñawinwan Tayta Diosninchi juchaynajta ricaran. 23Mana Abrahamllatachu yupachicushanpita alli ñawinwan rican. Manchäga isquirbirashançhu nuwanchipäpis rimaycan. 24Yupachicuptinchi, alli ñawinpa Tayta Diosninchi ricamanchi. Paymi Taytanchi Jesústa wañuypita cawarachimuran. 25Juchanchi-janan jishpichimänanchi-raycur Jesús wañuyman çhayananpäpis Tayta Diosninchi camacächiran. Jinarcur cawarachimuran: Jucha aparicushayqui-janan Jesús caway-bïdanta çhuraptin, shimïta çhasquicujcunata alli ñawïpa ricä nir.

will be added

X\