Romanos 3

1Chaymi ama ninquichu: Yuriynïpita-pacha Israel runa captïpis, ¿manaçhi imananchu? ¿Imapäraj papänï jïrucachimaran? 2Allipämi Israel runa yurishcanchi. Unay auquillunchicunallawan Tayta Diosninchi parlanacuran: Shimïta wiyacuptiqui, sumaj yanapäshayqui nir. 3Chaura waquin Israel-masinchi Tayta Diosninchipa shiminta çhasquicuyta mana munaptinsi, ¿Tayta Diosninchipis aunishanta jungaycungachuraj? 4Mana imaysi jungangachu. Payga shiminta çharcun. Llapan runa tumpaptinsi, shiminta çharcur juchanchita jurgapämäshunpaj. Tayta Diosninchipaj rimar, shiminçhüpis nin: Mana llullacunquichu. Runacunapa juchantapis jurgapanquipaj. Paycuna chapacuyta munar tumpashuptiquisi, llullacushanta taripunquipaj nir. 5Waquin Israel runa jucha aparicushanta tucuy-jinanpa chapacur nin: Tayta Diosninchi allita rurananpaj imatapis ruräman. Juchata aparicuptïsi, aunishan-jina shiminta çharcun. Shiminta çharcunan alli. Chaymi shiminta çharcüshiycaptï, wascamänan mana camacanmanchu, ¿au? 6Ichanga runa chapacuyta mana camäpacungachu. Tayta Diosninchi llapan runata iwal rican. Israel runacunapa juchantapis, jäpa runacunapa juchantapis llapanta jurgapanga. 7Chaypis waquin runa chapacur ninmançhi: Shiminta mana çharcuptïsi, Tayta Diosninchi juchäta mana jurgapämanmanchu. Jurgapämaptinmi ichanga, waquin runacunapis Tayta Diosninchita manchapacunga: Ima allish Tayta Diosninchi shiminta sumaj çharcun nir. Chaynuy Tayta Diosninchita manchapacuptin, allipäçhi jucha aparicushäpis, ¿au? 8Chaynuypis chapacun: Rasunpa llutanta ruraptï, Tayta Diosninchi llaquipämashpan alliman çhayachimanga. Pablush chaynuy willapäcuycan nir. Chaynuy tumpacujcunata quiquin Tayta Diosninchi llapan juchanta jurgapanga. 9Chaymi ama nishuwanchu: Israel runacunalla Tayta Diosninchipa shungunman tincun. Llapallanchi juchallicushcanchi. Israel runacunapis, jäpa runacunapis shungunchi munapashanta rurar, juchaçhu cawaycanchi. 10Tayta Diosninchipa shimin isquirbirashançhu nin: Tayta Diosninchipa ricay ñawinçhu llapan runa juchayuj. 11Llapan pishi-yarpayyuj. Tayta Diosninchipäga mana imasi jucunchu. 12Llapan runa Tayta Diosninchita wasguipasha. Pantacash purin. Mayganpis allita mana ruranchu. 13Runa-masinta asyächicun. Llullacullar cawan. Wañuchicuj curu-yupay cawar, pitapis ashllir ushyan. 14Chiquicur, runa-masinta pampaman çhuran. Jagayächicuyllaçhu arun. 15Pipis mana imanaycaptin, ñacayman çhayachin. Wañuchicuymanpis çhayachin. 16Maypa purirpis, runa-masinta wañuchir ushyan. Ushyapacaymanpis çhayachin. 17Allilla cawananpaj mana imasi jucunchu. 18Tayta Diosninchi pï cashantapis mana imasi jucunchu. Imanillarpis, mana manchapacunchu. 19Chaynuy Tayta Diosninchipa shimin Israel runacuna-janan isquirbiraycan. Paycunalla Tayta Diosninchipa shiminta çhasquiran. Chaymi sumaj-sumaj wiyacunman caran. Çharcuyta mana camäpacurmi ichanga, Israelcunapis, jäpa runacunapis mana chapacushunpächu Tayta Diosninchi jurgapämashanchi junaj: Mana imaçhüpis juchallicushcächu nir. 20Tayta Diosninchipa shiminta pipis sumaj-sumaj mana çharcunchu. Llapallanta çharcuptinchiraj, Tayta Diosninchi alli ñawinwan ricamanchi. Chaypis çharcuyta mana camäpacunchichu. Chaymi juchayuj cashallanchita musyanchi. 21- 22 Canan alli ñawinwan Tayta Diosninchi ricamänanchipaj mana Moiséspa shimintarächu sumaj-sumaj çharcunanchi. Unaypita-pacha Tayta Diosninchipa shiminwan Moiséspis, willacujcunapis piñapämashcanchi. Chaypis mana sumaj çharcuyta camäpacunchichu. Cananmi ichanga Jesucristuman yupachicushallanchipita Tayta Diosninchi alli ñawinwan ricamanchi: Juchaynaj canqui nir. Chaymi ama chapacushuwanchu: Israel runa caycä nirpis: Mana Israel runachu caycä nirpis. 23Llapanchi juchata aparicushcanchi. Mana mayganchisi Tayta Diosninchipa shungun munashannuychu cawanchi. 24Tayta Diosninchim ichanga llaquipäcuj. Jishpichicuj. Nuwanchi-raycur wañuyman Washäcuj Jesús çhayashanpita alli ñawinwanna ricamanchi payman yupachicuptinchi. Jucha aparicushanchitapis mana yarparannachu. 25Alli ricamänanchipaj Washäcuj Jesústa caçhamuran. Juchanchi jungacänan-raycur wañuyman çhayachiran. Jesús juchaynaj car, quiquinpa caway-bïdanta jararan Tayta Diosninchipa ullguyninta jasacächinanpaj. Chaymi payman yupachicuptinchi, alli ñawinwan Tayta Diosninchi ricaycämanchi. Unay runacunatapis jucha aparicushanta mana jurgaparanchu. Manchäga paycunapäpis cawayninta Jesús jaranan captin, juchanta mana jurgaparanchu. 26Paycunatapis llaquiparan. Chaynuypa unay runacunatapis, nuwanchitapis Jesúsman yupachicuptinchi, alli ñawinwan Tayta Diosninchi ricamanchi. 27Chaymi alli ñawinpa ricamänanchipaj ama alli-tucushuwanchu: Tayta Diosninchipa shiminta llapallanta çharcü. Shungun munashallanta rurä nir. Alli ricamänanchipaj Washäcuj Jesúsmanraj yupachicunanchi. 28Imatapis çharcushanchipita ama alli-tucushuwanchu. Tayta Diosnillanchi nimäshuwan: Juchaynaj canqui nir. Jesúsman yupachicuptinchiraj, alli ñawinwan ricamanchi. 29Israel-masicuna, chaymi ama yarpäshunchu: Israel runacunalla Tayta Diosninchipa shungunman tincun nir. Tayta Diosninchi llapan runata llaquipan. Jäpa runacunapis shungunman tincun. 30Tayta Diosninchi jucnaylla. Washäcuj Jesúsman yupachicuptin, llapan runata alli ñawinwan rican Israel runa captinsi, jäpa runa captinsi. 31Chaura yupachicullar Tayta Diosninchipa ricay ñawinçhu alli cawar, ¿Moiséspa shiminta pampaman çhurashuwanchu? Mana. Manchäga allipaj Moiséspa shimin caran. Chaymi pampamanpis ama çhurashuwanchu.

will be added

X\