Romanos 16

1Cananga cartäwan mama Febe çhayamuptin, çhasquinqui, ari. Cencreas marcaçhu irmänanchi Febe jutucaj irmänunchicunata rican. 2Payga Tayta Jesúspa maquinçhu cawaycan. Chaymi jamcunapis Tayta Diosninchipa wawan cashpayqui alli ñawiquiwan ricanayqui camacan. Pishipacushantapis tarichinayqui camacan. Mama Febe achcajta yanapasha. Nuwatapis sumaj yanapämasha. 3Mama Priscatapis majan Aquilatapis wamayapämay. Paycuna Washäcuj Jesúspita willapaptï, purïshimasha. 4Wañuy-caway imapitapis washämasha. Chaymi jäpa runacunapa marcancunaçhu jutucaj irmänucunapis sumaj cushicärin. Nuwalläpis sumaj cushicü. 5Mama Priscapa wasinçhu jutucaj irmänunchicunatapis wamayapämay. Yaçhänacushä Epénetuta wamayapämay. Paymi Asia quinrançhu Washäcuj Jesúspa shiminta puntata çhasquicusha. 6Mama Maríatapis wamayapämay. Payga tucuy-jinanpa yanapashcashunqui. 7Marca-masï Andrónicutapis, mama Juníastapis wamayapämay. Paycunawan iwal carsilçhu wiçhgarashcä. Jesúspa caçhan cashanta llapan runa musyan. Paycuna puntata Washäcuj Jesúspa shiminta çhasquicush caran; chaypitaraj nuwa. 8Ampliatutapis wamayapämay. Tayta Jesús-janan paywan sumaj yaçhänacü. 9Washäcuj Jesúspita willacäshimaj Urbanutapis, yaçhänacushä Estaquistapis wamayapämay. 10Apelestapis wamayapämay. Washäcuj Jesúsman yupachicushan-janan sumaj ñacasha. Aristóbulucunatapis wamayapämay. 11Marca-masï Herodióntapis, Narciso castacunatapis wamayapämay. Paycunapis Tayta Jesúsman yupachicun. 12Chay ñañalla Trifenatapis, Trifosatapis wamayapämay. Paycuna Jesús-raycur sumaj yanapäcuycan. Mama Pérsiditapis wamayapämay. Paypis Tayta Jesús-raycur sumaj yanapaycaran. 13Irmänu Rufutapis wamayapämay. Payga Tayta Jesúspa acracuynin. Mamantapis wamayapämay. Mamanga wamranta-yupay ricamasha. 14Asíncritutapis, Flegóntapis, Hermestapis, Patrobastapis, Hermastapis, paycunawan juturaj irmänucunatapis wamayapämay. 15Filólogutapis, mama Juliatapis, Nereutapis, Nereupa panintapis, Olimpastapis, paycunawan juturaj irmänucunatapis wamayapämay. 16Juturashpayqui jucniqui-jucniquipis llapan shunguyquiwan wamayänacärinqui. Washäcuj Jesúsman yupachicushpan jutucaj irmänunchicuna chay-tucuypita wamayäshunqui. 17Irmänucuna, Jesúspita willapäshushayquita ama jungaychu. Pipis quiquinpa yarpashanman jançhayta munashuptiqui, witichiyta munashuptiqui, ama çhasquipanquichu. Paycuna llutanta willapäcuycan. 18Quiquin munashallanta ashircaycan; mana Taytanchi Jesucristu munashantachu. Paycuna paçhallanta ashin. Alli-tupayllapa, cushichipayllapa lluta runacunata pantachin. 19Jamcuna Tayta Diosninchita wiyacuj cashayquitapis, alli rurashayquitapis chay-tucuyçhu musyaptin, jatunpa cushicü. Chaypis Tayta Diosninchita manchapacur cawanquiman. Juchata ama aparicunquimanchu. 20Tayta Diosninchi allilla cawaycächimanchi. Supaytapis içhipur, ushyaypa ushyaringa. Pampaman çhuraptin, maquiquiçhüna canga. Taytanchi Jesucristu alli shungu cashpan yanapayculläshunqui, ari. 21Irmänucuna, willacäshimaj Timoteo wamayäshunqui. Marca-masï Luciupis, Jasónpis, Sosípatrupis wamayäshunqui. 22Nuwa Tercio, Pablupa isquirbänun caycä. Tayta Jesúsman yupachicur, llapaniquita wamayaj. 23-24 Irmänu Gayupis wamayäshunqui. Paypa wasinçhu pacharpaycä. Wasinçhüpis irmänunchicuna jutucan. Erastupis, Cuartupis wamayäshunqui. Irmänu Erastuga cay marcapa jillay charajnin. 25Tayta Diosninchita llapallanchi alliman çhurayculläshun. Washäcuj Jesúspita willapaptï, yanapäshunqui alli willapanta sumaj tantiyacunayquipaj. Unaypita-pacha Jesúswan jishpichimänanchipaj shungullançhu yarpararan. 26Ichanga cananraj willacuycä. Imaycamanpis cawaj Tayta Diosninchi camacächiptin, unay willacujnincuna jishpichicujpita isquirbirächishançhu musyachicuran. May-chayçhüpis llapan runa Washäcuj Jesúsman yupachicunanpaj, payllata wiyacunanpaj Tayta Diosninchi camacächiran. 27Washäcuj Jesús yanapaycämaptinchi, imaycamanpis Tayta Diosninchita alliman çhurayculläshun. Payllam Tayta Diosninchi. Sumaj yarpay-sapa. Chaynuy caycullächun.

will be added

X\