Romanos 15

1Llapan shungunchiwan Tayta Diosninchiman yupachicur, wichaypa-uraypa yarpaj irmänunchicunata llaquipäshuwan. Quiquillanchipaj ama yarpäshunchu. 2Tayta Diosninchiman sumaj yupachicunanpaj irmänunchicunapa ricay ñawinçhu alli purishun. 3Washäcuj Jesúspis mana quiquillanpächu yarpasha. Manchäga runacuna ashlliptinsi, Tayta Diosninchipa shungun munashanta rurasha. Chaypaj Tayta Diosninchipa shiminçhu nin: Taytallau Tayta, runacuna ashllishuptiquipis, çhasquicushcä. 4Ima captinpis, paypa shimin tantiyachimanchi shacya-shacyalla cawananchipaj, mana yamacällar sumaj yupachicunanchipaj. Shimin shungunchiman çhayaptin, payman sumaj yupachicunchi. 5Llaquipäcuj Tayta Diosninchi yanapayculläshunqui, ari. Ima captinsi, paymi shacyächishunqui Washäcuj Jesúspa maquinçhu cawar juc shungulla cawanayquipaj. Tayta Diosninchi imaypis mana caçharishunquipächu. 6Chayraj juc shungulla, juc shimilla Tayta Diosninchita alliman çhuranquipaj. Payga Taytanchi Jesucristupa Taytan. 7Chaura Washäcuj Jesús alli ricamashanchi-jina jucninchi-jucninchipis alli ricanacushun. Chaynuy cawashpanchi Tayta Diosninchitapis alliman çhuraycanchi. 8Sumaj tantiyacushun. Washäcuj Jesús yanapäcuj cananpaj cay pachaman shamuran. Israel-masincunata washänan-raycur Tayta Diosninchi caçhamuran unay Israel auquillunchicunata aunishanta çharcucächinanpaj. 9Jäpa runacunatapis washänan-raycur caçhamuran. Jesús llaquipaptin, jäpa runacunapis Tayta Diosninchita alliman çhuraycan. Paycunapaj Tayta Diosninchipa shiminpis nin: Taytallau Tayta, jäpa runacunawan juturparpis, alliman çhurashayqui. Cantar alliçhu jurgushayqui. 10Chaynuypis nin: Tayta Diosninchi acracushan runacuna cushicuptin, llapan runa may-chayçhu juyarpis, cushicuchun. 11Jananmanpis niran: Llapan jäpa runa Tayta Diosninchita alliman çhuraycullächun. Llapan runa manchapacur, alliçhu jurgullächun. 12Willacuj Isaíaspis niran: Jesépa willcancunapita juc munayniyuj yuringa. Llapan jäpa runacunata maquinçhu purichinga. Payman jäpa runacunapis yupachicunga. 13Irmänucuna, Tayta Diosninchi yanapayculläshunqui payman yupachicunayquipaj, sumaj allilla juyänayquipaj, cushishalla cawanayquipaj. Payga shiminta çharcun. Mana yamacällar yupachicunayquipaj Espíritu Santupis yanapayculläshunqui. 14Irmänucuna, quiquiqui-pura alli ricanacushayquita, yarpay-sapa cashayquita, tantiyanacur cawashayquita musyä. 15Chaypis shacyäcamur cartacamü mana tantiyashayquicunapita willapärinäpaj. Llaquipämar, Tayta Diosninchi mincacamasha anyapäcur purinäpaj. 16Jäpa runacuna-raycur Washäcuj Jesúspa alli willapanta willapäcunäpaj caçhacamasha. Paycunapaj cüra-jina mañacapuycä. Tayta Diosninchipa shiminta willapäcuycä. Shiminta çhasquicuptin, Tayta Diosninchipa shungunwan tincun. Allinnin uywata jarashanta ricashan-jina alli ñawinpa rican. Espíritu Santuwanpis yanapan shungun munashannuy cawananpaj. 17Nuwapis Washäcuj Jesúspa maquinçhu cawar, Tayta Diosninchipa shungun munashanta rurar, cushicunä camacan. 18Washäcuj Jesúspita willapäcuptï, jäpa runacunapis Tayta Diosninchiman yupachicun. Chaypita cushicü. Mana shimilläwanchu willapashcä. 19Manchäga Tayta Diosninchi camacächiyninpa runacunata sumaj yanapashcä. Runa mana imaysi ricashancunata ruranäpaj Espíritu Santu camacächisha. Tayta Diosninchi munayniyuj cashanta tucuy-jinanpa tantiyachishcä. Jerusalén marcapita Ilírico marca quinrancaman Washäcuj Jesúspa alli willapantapis willapäcushcä. 20Willapäcuj aywar, juc willacushan jananman mana yaycushcächu. Manchäga pipis mana çhayashan marcacunallaman yaycushcä. Mä, tantiyacushun. Wasi ruraj runa quiquin pirgashanman tapyan; mana juc pirgashanmanchu. Chay-jina pipis mana willapäcushancunaman Washäcuj Jesúspita willapäcushcä. 21Tayta Diosninchipa shiminçhüpis nin: Paypita unay mana willacucash caycaptinsi, shimin shungunman çhayanga. Pï cashantapis mana tantiyachish caycaptinsi, sumaj tantiyacunga. 22- 23 Chaymi wacpa-caypa purir unaypita-pacha watucuj shamuyta munarpis, mana camäpacushcächu. Cananga cay quinranpa willapäcuyta çharcushcä. Waquin marcacunaman çhayanäpis mana cannachu. 24Watucuyta munar España marcapa aywar, yagaramushaj. Ricanacuptinchi, imallawanpis yanapämanqui willapäcur purinäpaj. 25Ichanga imallatapis apacurcur, Jerusalén marcaparaj aywarishaj irmänunchicuna chaywan cawananpaj. 26Acaya quinrançhu, Macedonia quinrançhu irmänunchicuna shungun shacyaptin, cuyachicuyninta shuntasha Jerusalén marcaçhu pishipacuj irmänucunata yanapänanpaj. 27Shungun shacyaptin, shuntar allita rurasha. Jäpa irmänunchicuna Israel runacunapita Washäcuj Jesústa tarisha. Jaga-tucush-yupay ricacusha. Chaymi Jerusalén marcaçhu pishipacuj Israel irmänunchicunata yanapäshun paçhanpäpis, jananpäpis. 28Jerusalén marcaman cuyachicuynincunata çhayarcachir, España marcapa llucshishaj. Aywar, yaycaramushaj. 29Çhayamuptï, Washäcuj Jesús sumaj-sumaj yanapämäshun cushishalla shacyächinacunanchipaj. 30Irmänucuna, maquinçhu Taytanchi Jesucristu llapanchita charämanchi. Espíritu Santupis llaquipänacunanchipaj yanapaycämanchi. Chaymi ama jungamanquichu. Llapan shunguyquiwan Tayta Diosninchita mañacapamanqui, ari. 31Mañacunqui Judea quinrançhu Jesúspa shiminta wasguipaj Israelcuna mana imatapis ruramänanpaj, cuyachicuyta apashäcunatapis Jerusalén marcaçhu irmänucuna cushi-cushilla çhasquinanpaj. 32Chaynuypis mañacunqui Tayta Diosninchi camacächiptin, watucuj çhayamunäpaj. Tincushpanchi cushïrishämi. 33Tayta Diosninchi llapaninchita yanapaycämäshun allilla cawananchipaj. Chaynuy caycullächun.

will be added

X\