Romanos 14

1Tayta Diosninchiman yupachicur, sumaj tantiyanacushun. Irmänunchicunapa yarpayninwan yarpayniqui mana tincuptinsi, ama pampaman çhuranacunquichu. Yarpayniqui-janan ama chiquinacunquichu. Chiquinacur, yatayayman pipis çhayan. 2Waquin irmänunchi tarishanta micun. Waquinna Tayta Diosninchi alli ricananta yarpar, ricsish-ricsishllata micun. 3Ricsish-ricsishllata micuptiqui Tayta Diosninchi alli ricashushayquita yarparpis, tarishanta micujcunata pampaman ama çhuranquichu. Tarishayquita micuptiqui Tayta Diosninchi alli ricashushayquita yarparpis, ricsish-ricsishllata micujcunata pampaman ama çhuranquichu. Llapantapis Tayta Diosninchi wamrachacusha. 4Llapanchi Tayta Diosninchipa maquinçhu cawaycanchi. Sumaj tantiyacushun. ¿Juc runapa uywayninta tincupänanchi camacanchuraj? Mana. Quiquin wasiyuj musyan uywaynin alli arushantapis, mana alli arushantapis. Chay-jina Tayta Diosninchipis allita rurananchipaj yanapaycämanchi. Munashanta ruraptinchi, pingayman çhayananchitapis mana camacächingachu. 5Waquin irmänunchi ricsish junajllaçhu jutucar, Tayta Diosninchita alliman çhuran. Waquinna waran-waran jutucan alliman çhurananpaj. Imanuy yarparpis, llapan shungunchiwan Tayta Diosninchita alliman çhurashun. Quiquinchi-pura ama tincupänacushunchu. 6Waquin irmänunchi ricsish junajta acran Tayta Diosninchita alliman çhurananpaj. Tarishan micuyta micun. Llapantapis ruran Tayta Diosninchita alliman çhurashpan: Ima allish micunäpaj tarichimanqui nir. Waquininchi ricsish micuyllata micurpis, micunchi Tayta Diosninchita alliman çhurashpanchi: Ima allish micunäpaj tarichimanqui nir. Ima-imata micurpis, rurarpis, mana llutantachu ruraycanchi. 7Mayganinchipis mana quiquillanchipächu cawanchi. Mana ushyaräcunallanchipächu wañunchi. 8Cawarpis, wañucurpis, Tayta Jesústa alliman çhuranchi. Cawarpis, wañucurpis, Washäcuj Jesúspa maquinçhu cawaycanchi. 9Nuwanchi-raycur Washäcuj Jesús wañuyman çhayasha. Ichanga cawarimusha cawajcunatapis, wañushcunatapis maquinçhu charänanpaj. 10Chaymi llapanchita maquinçhu Tayta Jesús puriycächimaptinchi, ¿imanirtaj irmänucunata waquinta jamurpanqui? ¿Imanirtaj pampaman çhuranqui? Llapanchita ima-imata rurashanchitapis Tayta Diosninchi jurgapämäshunpaj. 11Shiminçhüpis isquirbiraycan: Cawaycaj Tayta Dios caycä. Shimï çharcucanga. Munayniyuj cashäta tantiyacur llapan runa manchapacamar, ñaupäman jungurpacunga. Shiminwan alliman çhuramanga nir. 12Sumaj tantiyacushun. Tayta Diosninchi alli ñawinwan ricamänanchipäpis, juyu ñawinwan ricamänanchipäpis quiquinchi ima-imatapis rurashanchipita canga. Paymi llapan runata imata rurashantapis jurgapanga. 13Chaymi ama tincupänacushunchu. Tincupänacuptinchi, irmänunchicuna micushanchi-janan, upushanchi-janan juchata aparicurunman. Juchata aparicur, Washäcuj Jesústapis wasguirunman. 14Tayta Jesúsman yupachicuptinchi, ima micuypis juchaman mana jançhamanchichu. Waquin micuycuna mana allichu nijcuna quiquillanpita yarpan. Chaymi: Mana allichu niptin, ama micuchishuwanchu. Ama tincupäshuwanpishchu. 15Mana allichu nij irmänucunapa ricay ñawinçhu micur, tincupaj-yupay caycanchi. Mana llaquipäcuj-yupay pampaman çhuraycanchi. Micushanchi-janan pipis Washäcuj Jesústa ama wasguipanmanchu. Payga llapanchita washämänanchi-raycur wañuyman çhayasha. 16Chaymi shungunchi munashanta micur, Tayta Diosninchita pingayman ama çhurashunchu. 17Paypa maquinçhu cawanchi mana ricsish-ricsishllata micushanchipitachu, mana tarishanchita micushanchipitachu. Manchäga shungunchi shungunman tincunman. Paypa shungun munashanta rurashun. Llapanwan alli ricanacur, allilla juyäshun. Cushishalla cawashun. Llapanpäpis Espíritu Santu yanapaycämanchi. 18Washäcuj Jesústa manchapacur alli cawaptinchi, Tayta Diosninchi sumaj cushicun. Runa-masinchipis alli ricamäshun. 19Chaymi irmänunchicunawan imaypis alli ricanacushun. Tayta Diosninchiman sumaj yupachicunanchipaj shacyächinacushun. 20Micuy-janan Tayta Diosninchipa maquinçhu cawajcunata ama mashtacächishunchu. Ima micuypis allitaga allim. Ichanga micushanchi-janan irmänunchicunata mashtacächir, marca-pingayman çhayanchi. 21Chaymi irmänunchi: Cayga jucha nir yarpaptin, ricay ñawinçhu ima aychatapis ama micushuwanchu. Bïnutapis ama upushuwanchu. Achäqui cananpaj imatapis ama rurashuwanchu. 22Mana imananchu nir quiquillayqui yarparanquiman. Tayta Diosninchi llapanchipa shungunchita musyapämanchi. Imata micuptinchisi, Tayta Diosninchi mana juyu ñawinwan ricamäshunchu nir yarpar, shungunchi munashanta micur, upur cawashun. 23¿Allichuraj, manachuraj? nir micurmi ichanga, juchata aparicunchi. Tayta Diosninchipa shungunman tincushanta mana sumaj musyaycar ruraptinchi, imapis jucha.

will be added

X\