Romanos 10

1Irmänucuna, Israel-masïcuna Tayta Diosninchipa maquinçhu cawananta llapan shungüwan munä. Jishpichinanta munar, waran-waran Tayta Diosninchita mañacapü. 2Israel-masïcuna tucuyta ruran Tayta Diosninchi alli ricananpaj. Sumaj manchapacunpis. Shungun munashanta mana tantiyacurmi ichanga, pantacash purircaycan. 3Alli ricananpaj Tayta Diosninchi mayna camacächish caycaptinsi, wasguipan. Quiquin yarpashanta rurar, Moiséspa shimillanta çharcuyta munan. 4Chaypis Tayta Diosninchi juchaynajta alli ñawinpa ricamanchi mana Moiséspa shiminta çharcushallanchipitachu; manchäga Washäcuj Jesúspa shiminta çhasquicuptinchi. Chaymi Israel-masïcuna Moiséspa shiminta çharcuyta yarpar, pantapacun. 5Unay isquirbishançhu quiquin Moisés niran: Cawayta munar, Tayta Diosninchipa shimintaraj llap-llapanta çharcushuwan. Chaura Tayta Diosninchi juchaynajta ricamänanchipaj shiminta wiyar, llapallanta sumaj-sumaj çharcunanchi. 6Jesúspa shiminta çhasquicujcunatam ichanga yupachicushallanchipita juchaynajta Tayta Diosninchi ricamanchi. Chaymi ama nishuwanchu: Janaj pachapita Washäcujta pushamushun. Washäcujninchi Jesús mayna yanapaycämanchi. 7Chaynuypis ama nishuwanchu: Yanapämänanchipaj chacaj pachapita cawarachimushun. Jishpichimänanchipaj mayna Washäcujninchi Jesús shamusha. Wañushanpitapis mayna cawarimusha. 8Payllaman yupachicuptinchi, jishpichimanchi. Shiminçhüpis nin: Tayta Diosninchipa shimin mayna shunguyquiman çhayasha. Shimintapis willapäcuycanqui. Nuwacunapis Washäcuj Jesúsman yupachicunallanchipita willapäcurcaycä. 9Chaymi llapan shunguyquiwan yupachicur: Washäcuj Jesúsga Taytanchim. Maquinçhu purichimanchi. Wañuypitapis Tayta Diosninchi cawarachimusha nir willapäcuptiqui, jamcunatapis Tayta Diosninchi jishpichishunquipaj. 10Tayta Diosninchi alli ricamänanchipaj Washäcuj Jesúsman llapan shungunchiwan yupachicushun. Jishpichimänanchipaj Jesústa taytachacushun. Pï-maytapis willapäshun. Ama upällacushunchu. 11Isaías isquirbishançhüpis nin: Yupachicujcunata pingayman Tayta Diosninchi mana çhurangachu. 12Israel runa captinchisi, jäpa runa captinchisi, Tayta Diosninchi llaquipämanchi. Payman yupachicuptinchi, llapanchita maquinçhu purichimanchi. Jayacuptinchi, sumaj yanapämanchi. 13Shiminçhüpis nin: Jayacujcunata pitapis Tayta Diosninchi jishpichinga. 14Tayta Diosninchi pï cashantapis mana musyarmi ichanga, ¿imanayparaj runacuna jayacunman? ¿Imanayparaj shiminta wiyacunman paypita mana wiyaycar? ¿Imanayparaj shiminta çhasquicunman pipis mana willapaycaptin? 15¿Piraj willapäcunman Tayta Diosninchi mana caçhaptin? Pipis alli willapata çhayachimuptin, cushicuypaj canga. Tayta Diosninchipa shiminpis nin: Pipis alli willapata çhayachimuptin, cushicuypaj. 16Ichanga mana llapan runachu shiminta çhasquicun. Chayçhi unay willacuj Isaíaspis niran: Tayta, shimiquita willapaptï, pipis mana çhasquicushachu. 17Waquin runa wiyacuyta mana munaptinsi, Jesúspita willapäcurcaycä. Willacushäta çhasquicujcuna Washäcuj Jesúsman yupachicurcaycan. 18Chaynuy caycaptin, ¿Israel-masïcuna manachuraj Tayta Diosninchipa shiminta wiyasha? Au. Wiyasham. Shiminçhüpis nin: Shimin may-chayçhüpis willacucashana. Shiminta llapan marcaçhüpis wiyashana. 19Willapäcuptin, ¿willacushan shungunman çhayashachuraj? Mana. Wiyarsi, mana çhasquicuranchu. Israel runacunata willacujnin Moiséswan Tayta Diosninchi musyachiran: Jäpa runacunata: Paycuna runaçhi niptiquisi, wamrachacushaj. Wamrachacuptï, chiquinquipaj. Pampaman çhurash runacunata alliman çhuraptï, ullgunquipaj nir. 20Isaías libruçhüpis Israel runacunata piñapar, Tayta Diosninchi niran: Jäpa runacuna pï cashätapis mana tantiyaycarsi, çhasquicamasha. Mana tapucuycaptinsi, pï cashätapis musyachicushcä. 21Israel runacunapämi ichanga niran: Mana wiyacamaptinsi, chucru shungu captinsi, mana yamacashcächu. Manchäga maquïçhu cawananta munashcä.

will be added

X\