Apocalipsis 8

1Papilpa jançhis-caj lagarashan sïrata Uysha quipsariptinna, janaj pachaçhu juc çhajçhanuy imapis mana wagacuranchu. Llap-llapallan upällacäcuran. 2Chaypita Tayta Diosninchipa ñaupançhu jançhis anjil içhirpaycajta ricarä. Llapan anjil curnïtata çhasquiran. 3Juc anjilna juripita tacsha mancata apamuran Tayta Diosninchipa ñaupançhu juri tullpaçhu insinsuwan saumachinanpaj. Juri mancanman achca insinsuta wiñaran Tayta Diosninchita jarananpäpis, irmänucuna mañacushanta çhayachinanpäpis. 4Anjil jaraptin, insinsupa jushtayninpis, irmänucuna mañacushanpis Tayta Diosninchiman çhayaran. 5Chaypita tullpapita tacsha mancaman anjil shanshata wiñaran. Jinarcur pachaman jitarpaycamuran. Mancata shanshantinta cay pachaman jitarpaycamuptin, räyupis bunruruylla pashtamuran. Rimamujcunapis wiyacächimuran. Illagupis achicyaypa achicyaran. Pachapis juyupa sicsicyaran. 6Jinarcur jançhis anjilcuna camaricuran curnïtanta tucamunanpaj. 7Juc anjil curnïtata tucaramuptin, yawarwan tallush tamyamuran ninapis, runtu tamyapis. Cay pachaçhu yüratapis, jiwatapis jircantinta pullanta-yupay rupariran. 8Juc anjilna curnïtata tucaramuptin, jatun-caray punta ratataycar jatun lamar yacuman tunimuran. Chaymi yacu pullan-yupay yawarman ticracuriran. 9Yacucunaçhu tiyajcunapis pullan-yupay wañuran. Büticunapis pullan-yupay ushyacaran. 10Juc anjilna curnïtata tucaramuptin, janaj pachapita jatun-caray ratataycaj istrïlla shicwamuran pullan-yupay mayucunaman, pullan-yupay yacupa ñawincunaman. 11Istrïllapa jutin caran Asgaj. Chaymi yacu pullan-yupay asgacäcuran. Asgaj yacuta upur, achcaj runa wañuran. 12Juc anjilna curnïtata tucaramuptin, intitapis, quillatapis, istrïllacunatapis jishya chariran. Jishya chariptin, pullan-yupay chacacäcuran. Pagas-junajpis inti, quilla, istrïllacuna yangallana achicyaran. 13Jinalla ricapacuynïçhu ricapacuycarä. Chaypita anca päriycajta ricarä. Janajpita japariypa nimuran: Wawallau wawïta. Waquin anjilcunapis curnïtata tucaramuptin, runacuna llaquipaypaj ñacanga. Quimsa anjilraj pishiycan curnïtata tucaramunanpaj.

will be added

X\