Apocalipsis 7

1-2 Chaypita çhuscu anjilta ricarä. Anjilcuna cay pachapa çhuscun cantunçhu juc-caman içhirpaycaran. Maquinçhu cay pachapis, yacucunapis caycaran. Ñacachinanpäpis munayniyuj caran. Wayratapis chaparaycaran. Chaymi pachatapis, yacucunatapis, yüracunatapis wayra mana pücaranchu. Chaura juc anjilna inti jigamunanpita llucshiramuran. Maquinçhu cawaj Tayta Diosninchipa chäpacunanta aptaraycaran. Ñacachicuj anjilcunatana wiyacächiypa jayacuran: 3Shuyaycuyraj. Tayta Diosninchipa wawancunataraj urcunçhu-caman chäpashaj. Chaypitaraj cay pachatapis, yacucunatapis, yüracunatapis ñacachinqui. 4Chaypita wiyarä: Paçhac çhuscu çhunca çhuscuwan waranga (144,000) Israel runacunallata chäpanqui nimujta. 5Judá castacuna çhunca ishcaywan waranga (12,000) chäpacuran. Rubén castacuna çhunca ishcaywan waranga (12,000) chäpacuran. Gad castacuna çhunca ishcaywan waranga (12,000) chäpacuran. 6Aser castacuna çhunca ishcaywan waranga (12,000) chäpacuran. Neftalí castacuna çhunca ishcaywan waranga (12,000) chäpacuran. Manasés castacuna çhunca ishcaywan waranga (12,000) chäpacuran. 7Simeón castacuna çhunca ishcaywan waranga (12,000) chäpacuran. Leví castacuna çhunca ishcaywan waranga (12,000) chäpacuran. Isacar castacuna çhunca ishcaywan waranga (12,000) chäpacuran. 8Zabulón castacuna çhunca ishcaywan waranga (12,000) chäpacuran. José castacuna çhunca ishcaywan waranga (12,000) chäpacuran. Benjamín castacuna çhunca ishcaywan waranga (12,000) chäpacuran. 9Chaypita yupaysi mana atipaypaj runacunata ricarä. Chay-tucuy marcacunapita, tucuy casta runacuna, tucuy-niraj rimajcuna juturpaycaran. Tayta Diosninchipa ñaupançhu, Uyshapa ñaupançhu yuraj müdanash, palman aptash içhirpaycaran. 10Juc shimilla wiyacächiypa jayacuycaran: Tayta Diosninchi munayniyuj. Mandajpa jamanançhu jamaraycan. Paymi jishpichimajninchi. Uyshapis washämajninchi. 11Mandaj Tayta Diosninchipa jamananta llapan anjilcunapis, ishcay çhunca çhuscuwan (24)mayur runacunapis, intïru janançhu ñawiyuj çhuscu cawajcunapis tumaparaycaran. Llapanmi Tayta Diosninchita manchapacur, jungurpacuycur niran: 12Chaynuy caycullächun. Tayta Diosninchita imay-imaypis llapan manchapacunman. Llapan alliman çhuranman. Payga yarpayniyuj. Llaquipäcuj cashanpita llapan cushicunman. Llapan alli ricanman. Payga munayniyuj. Camacächij. Chaynuy caycullächun. 13Chaypita juc mayur runa tapumaran: Yuraj müdanashcuna, ¿picunataj? ¿Maypitataj shamusha? nir. 14Tapumaptin, nirä: Quiquiqui musyanqui, tayta. Payna nimaran: Paycuna juyupa ñacayta içhipur, çhayamusha. Washäcuj Uysha wañuyninpa, yawarninta jarayninpa Tayta Diosninchi llapan juchantapis jungaycusha. Cananga ima juchanpis mana canchu. Chaypita yuraj müdananta ushtucusha. 15Paycuna Tayta Diosninchipa ñaupançhu juturpaycan. Pagas-junajpis wasinçhu manchapacurcaycan. Tayta Diosninchipis çhaupinçhu juyar, maquillançhu cawachinga. Imaypis mana caçharingachu. 16Paycuna mana imaypis yarganganachu. Imaypis mana yacunanganachu. Intipis mana rupanganachu. Acaypis mana wapunganachu. 17Tayta Diosninchipa maquinçhu cawar, mana llaquicunganachu. Washäcuj Uyshapis Tayta Diosninchipa ñaupallançhu caycar, waran-waran paycunata ricanga. Uyshïru-jina sumaj ricanga. Pashtaj yacuman pushanga. Cawachicuj yacuta upuchinga. Llaquishpan Tayta Diosninchi wiguincunatapis pichanga.

will be added

X\