Apocalipsis 6

1Chaypita ricäriptï, Uysha juc sïrata quipsariran papilta liguinanpaj. Quipsariptin, çhuscu cawajcunapita räyu pashtamuj-jinaraj jucnillan wiyacächiypa jayacuran: Llucshimuyna nir. 2Chaura juc murucu yuraj cawallun muntash, tucsicunan aptash llucshiramuran. Curünata çhasquicurcur, yapay aywaran llapanta magaj maquinçhu purichinanpaj. 3Papilpa ishcay-caj lagarashan sïrata Uysha quipsariptin, juc cawajna jayacuran: Llucshimuyna nir. 4Chaura juc murucu yawar-puca cawallun muntash llucshiramuran. Chay murucuta jatun machïtinta aptaparcur, cay pachaman caçhamuran: Runacunata chiquinacachiy. Wañuchinacachiy nir. 5Papilpa quimsa-caj lagarashan sïrata Uysha quipsariptin, juc cawajna jayacuran: Llucshimuyna nir. Chaura ricäriptï, juc murucu yana cawallun muntash, balansan aptash llucshiramuran. 6Çhuscu cawajcunapa çhaupinpita jucna rimaramuran: Muçhuy cachun. Runa cawananpaj quïlu rïgullapaj juc junaj aruchun. Quimsa quïlu sibädallapaj juc jurnal aruchun. Ichanga wiratapis, bïnutapis ama ushyacächichunchu nir. 7Papilpa çhuscu-caj lagarashan sïrata Uysha quipsariptin, juc cawajna jayacuran: Llucshimuyna nir. 8Chaura ricäriptï, ugui cawallu llucshiramuran. Muntarajpa jutin caran: Wañuy. Runacunata wañuchir, chacaj pachaman çhayachiran. Muntarajga llucshiran pullanta-yupay runacunata wañuchinanpaj. Marca-pura wañuchinacuywan, muçhuywan, timpurij jishyawan, micucuj uywacunawan wañuchiran. 9Papilpa pichga-caj lagarashan sïrata Uysha quipsariptin, Tayta Diosninchipa wasinçhu alli shungu runacunapa almancunata ricarä. Paycunata Tayta Diosninchipa shiminta willapäcushanpitash, wiyacushanpitash runacuna wañuchish caran. Almacunaga Tayta Diosninchipa jaracunan tullpa puncunçhu caycaran. 10Paycuna wiyacächiypa Tayta Diosninchita jayacuran: Taytallau Tayta, munayniyujmi canqui. Juchaynaj cashpayqui allillata ruranqui. Shimiquita llapanta çharcunqui. Juchallaçhu arujcunata, ¿imayraj juchanta jurgapunquipaj? Wañuchimashanpita, ¿imayraj ñacachinquipaj? nir. 11Tayta Diosninchina niran: Shuyaycuyraj. Wañuchishushayqui-jina waquin irmänucunatapis wañurachinga. Paycunata shungü munashanta ruraptin: Chaycamalla nishäcaman wañurachinga. Chaynuy nir yuraj müdanata ushtuparan: Ima juchayquipis mana canchu nir. 12Jinalla ricapacuynilläçhu ricapacuycarä. Papilpa sujta-caj lagarashan sïrata Uysha quipsariptinna, pacha juyupa sicsicyacurcuran. Inti yana chicruman, yana jacu-nirajman ticracuriran. Quillapis yawar pucaman ticracuriran. 13Shucucuy wayra rütata shicwachishan-jina istrïllacunatapis shucucuy wayra cay pachaman shicwachimuran. 14Janaj pachapis lluylluypa-lluyllucäcuran. Puntacunapis, yacu çhaupinçhu islacunapis wacpa-cayman witicuriran. 15Chaura maçhaycunamanpis, chaga çhaquincunamanpis llapan runa pacacuran. Mandajcunapis, auturdäcunapis, capitancunapis, puchuy-puchuy janançhu cawajcunapis, munayniyujcunapis, piyuncunapis, pampa runacunapis llapanmi pacacuran. 16Puntacunatawan chagacunata jayacuran: Pacaycallämay, ari. Tayta Diosninchitapis, Washäcuj Uyshatapis manchacü. Juyupa ullgucarcärisha. 17Ullgucäcushan junaj çhayamushana. Ñacachimaptinchi, ¿piraj içhipunga? nir.

will be added

X\