Apocalipsis 5

1Chaypita jamanançhu jamarajpa dirïcha-caj maquinçhu pitush papilta aptaraycajta ricarä. Papilçhu jananpa rurinpa isquirbiraycaran. Ichanga pipis mana quiçhananpaj jançhis pachapa sïrawan lagaraycaran. 2Mayur anjiltapis ricarä. Payga wiyacächiypa tapucuran: ¿Cay papilta paçhgananpaj mayganiquitaj munayniyuj? ¿Quiçhananpaj mayganiquitaj camacan? nir. 3Papilta quiçharcur liguinanpämi ichanga janaj pachaçhüpis, cay pachaçhüpis, pacha rurinçhüpis pipis mana caranchu. 4Papilta quiçhananpaj pipis mana captin, juyupa llaquicur wagarä. 5Chaura juc mayur runa nimaran: Ama wagaynachu. Judápa willcanpita yurij liyun mandaj Davidpa allicaj willcan llapanta içhipusha. Paymi munayniyuj jançhis sïrata quipsarcur papilta quiçhananpaj. 6Ricaycashäçhu manta Uyshata pishtar ushyash caycajta ricarä. Chaypis mandajpa jamananpa ñaupallançhu, çhuscu cawajcunapa çhaupinçhu, ishcay çhunca çhuscuwan (24) mayurcunapa çhaupinçhu cawaycar içhiraycaran. Uyshapa wajrancunapis, ñawinpis jançhis caran. Jançhis ñawi Espíritu Santuwan tincun. Tayta Diosninchi Espíritu Santuta cay pachaman caçhamuran llapan runata ricananpaj. 7Uyshana mandajpa jamananman aywarcur, jamaraycajpa maquinpita pitush papilta çhasquiran. 8Papilta çhasquircuptin, Uyshapa ñaupanman çhuscu cawajcunapis, ishcay çhunca çhuscuwan mayurcunapis jungurpacuycuran. Llapanmi arpanwan-caman caran. Juri cüpacunawan insinsutapis aparan. Insinsuga Tayta Diosninchita wiyacujcuna mañacushanman tincun. 9Pitush papilta çhasquiptin, mayurcunapis, cawajcunapis Uyshata alliman çhuraycur mushuj alabansata cantaycaran: Taytallau Tayta, munayniyujmi canqui pitush papilta çhasquinayquipaj, sïrata quipsarinayquipaj. Uyshata pishtashan-jina pishtashcashunqui llapan runata rantiypa-yupay jishpichinayquipaj. Tayta Diosninchipa maquinçhu cawananpaj yawarniquiwan runacunata jishpichishcanqui. Paycuna ima casta captinpis, ima rimayta rimaptinpis, may marcapita captinpis, may runa captinpis, llapantam llaquipanqui. 10Tayta Diosninchipa mandunta rurananpaj camacächishcanqui. Llapan runata marcantinta maquinçhu purichinanpaj mandaj cayman çhurashcanqui. Runa-masinta mañacapunanpaj cüra cayman çhurashcanqui. 11-12 Chaypita ricäriptï, may-may anjilcunatapis wiyarä. Yupaysi mana atipaypaj caran. Paycuna intïru janançhu ñawiyuj cawajcunawanpis, ishcay çhunca çhuscuwan mayurcunawanpis, jamanançhu jamaraycaj mandajta tumaparaycasha. Llap-llapanmi juc shimilla mañacurcaycaran. Alliman çhurarcaycaran: Uyshata alli ñawinwan llap-llapanmi ricanman. Runacunata washänan-raycur pishtaypa wañuyman çhayashanpita alli ñawinwan ricanman. Paymi munayniyuj. Llapan ima-aycapis maquinçhu caycan. Yarpayniyuj. Camacächij. Llapan alli ricanman. Llapan alliman çhuranman. Llapan alliçhu jurgunman nir. 13Chaypita juc alabansata wiyarä. Janaj pachaçhu cawajcunapis, cay pachaçhu cawajcunapis, pacha rurinçhu cawajcunapis, yacucunaçhu cawajcunapis cantarcaycaran. Llap-llapanmi jamanançhu jamarajtapis, Uyshatapis juc shimilla niycaran: Taytallau Tayta, Uyshallau Uysha, Imay-imaypis alliçhu jurgush caycullächun. Alliman çhuraycullächun. Alli ricash caycullächun. Munayniyuj caycullächun. 14Chaura: Chaynuy caycullächun nir çhuscu cawajcuna auniptin, ishcay çhunca çhuscuwan mayurcunapis manchapacushpan jungurpacaycäriran.

will be added

X\