Apocalipsis 3

1Sardes marcaçhu jutucaj irmänucunata täpaj anjilta cartacur, ninqui: Jesúsga maquinçhu Espíritu Santuta purichin. Jançhis istrïllatapis maquinçhu charaycan. Paymi nishunqui: Ima-imata rurar cawashayquita musyä. Runacuna: Tayta Diosninchipa ricay ñawinçhu alli cawarcaycan nishuptiquisi, jungaycäramashcanqui. Wañush-jina carcaycanqui. 2Sumaj yarpaçhacunquiman. Mana wañunayquipaj shimïta wiyacunquiman. Janan shungulla wiyacuptiqui, Tayta Diosninchipa ricay ñawinçhu mana allitachu ruraycanqui. 3Ñaupata Tayta Diosninchipa shiminta çhasquicärirayqui. Shunguyquicaman çhayaran. Cananpis wiyacunquiman. Jucha aparicushayquipita wanacunquiman. Manchäga suwa-jina mana yarpashpita çhayapushayquipaj. 4Waquinniquim ichanga Tayta Diosninchipa shungun munashannuy cawarcaycanqui. Chaymi yuraj müdanash purïshimänayqui camacan. 5Juchacuyta munapächishanta içhipujcunata yuraj müdanata ushtupanga. Cawajcunapa jutincuna isquirbirashan acta librüpita mana imaysi illarachishächu. Manchäga Papänïpa ñaupançhu, anjilcunapa ñaupançhu nishaj: Nuwaman yupachicaman. Maquïçhümi cawan. 6Rinriyuj irmänucuna mayçhu juturarpis, Espíritu Santupa shiminta wiyacunman. 7Filadelfia marcaçhu jutucaj irmänucunata täpaj anjilta cartacur, ninqui: Jesúsga Tayta Diosninchipa juchaynaj Wawan. Shimin nishanta çharcuj. Mandaj Davidpa willcan car, marcantapis maquinçhu purichin. Wasiyuj lläbita charashan-jina marcapa lläbinta maquinçhu charaycan. Puncunta quiçhaptin, pipis mana wiçhganmanchu. Wiçhgaptinpis, mana quiçhanmanchu. Paymi nishunqui: 8Ima-imata rurar cawashayquita musyä. Ima allish shimïta wiyacushcanqui. Runa-masiqui juyu ñawinpa ricashuptiquisi, mana wasguimashcanquichu. Cananga shungü munashanta ruranayquipaj puncuta quiçhashä-jina pipis mana chapata rurashunquipänachu. 9Chiquicuj Israelcunatam ichanga ñacachishaj. Paycuna: Israel runa cashpä Tayta Diosninchipa ricay ñawinçhu alli cawä nirpis, Supaypa wawan carcaycan. Chaymi paycunata pingayman çhayachishaj. Chayraj jamcunata alli ñawïpa ricashajta tantiyacur, ñaupayquiçhüpis jungurpacuycungapaj. 10Tayta Diosninchi runapa shungunta musyapashan wichan llapan runa ñacananpaj camacächinga. Ñacay captinsi, mana yamacaypa shimïta wiyacamashayquipita washäshayqui. 11Cutiycamüna. Shimïta wiyacuptiqui, mana ushyacaj cawayta tarinquipaj. Ñaupäman çhayanayquipaj pipis mana chapäshunquipächu. 12Juchacuyta munapächishanta içhipujcunata wasinçhu Tayta Diosninchi cawachinga. Chaypita pipis mana cuyuchinganachu. Manchäga janançhu isquirbishaj: Caycuna Tayta Diosninchipa wawan. Mushuj Jerusalén marcaçhu tiyan. Chay marca Tayta Diosninchipa marcanmi. Janaj pachapita yarpamunga. Quiquïpa mushuj jutïtapis çhurapushaj nir. 13Rinriyuj irmänucuna mayçhu juturarpis, Espíritu Santupa shiminta wiyacunman. 14Laodicea marcaçhu jutucaj irmänucunata täpaj anjilta cartacur, ninqui: Jesúsga ima-imatapis camacächij captin, jutichaparan: Chaynuy caycullächun nir. Tayta Diosninchipa shimintapis llap-llapanta willacun. Tayta Diosninchi Jesúswan-ima llap-llapanta camaran. Jesúsmi nishunqui: 15Ima-imata rurar cawashayquitapis musyä. Jamcuna janan shungulla çhasquicäramashcanqui. Wasguimar, juclla wasguiramanquiman. Çhasquicamar, llapan shunguyquiwan çhasquicamanquiman. 16Janan shungulla çhasquicamajcunata ricaytapis mana munallächu. Chaypitam jamcunata millanäcü. 17Puchuy-puchuy janançhu cawashallayquiman yupachicunqui. Rasunpa cuyapaypaj carcaycanqui. Waccha canqui. Pishipacuj. Japra. Jalapaçha. 18Rasunpa puchuy-puchuy janançhu cawayta munar, shimïta llapan shunguyquiwan çhasquicunquiman. Shimïga juriwan tincun. Nuwapita rantishayqui juriga ninaçhu chulluchish caycan. Jalapaçha puriyta mana munarpis, shungü munashannuylla cawanquiman. Shungü munashanta rurayga yuraj müdanawan tincun. Chaymi yuraj müdanash purir, mana pingacullar cawanquipaj. Japra cayta mana munarpis, shungü yarpashanta tantiyacunquiman. Shungü yarpashanga ñawi jampiwan tincun. Ñawiqui jampish captin, shungü yarpashantapis tantiyacunquipaj. 19Shungüman tincujcunatam alli cawananta munar, piñacü. Llaquipashpä willapä. Chaymi llapan shunguyquiwan Tayta Diosninchita wiyacäriy. Jucha aparicushayquipita wanacäriy. 20Sumaj tantiyacunquiman. Puncupita jayacuj-jina jamcunata jayaycaj. Jayashäta wiyar çhasquicamaptiqui, yaycurir yanagäshayqui. Micur upur juyäshun. 21Juchacuyta munapächishanta içhipujcunata mandäshimänanpaj lädüman jamachishaj. Nuwatapis shiminta wiyacur juchacuyta içhipushäpita Papänï mandäshinäpaj lädunman jamachimasha. 22Rinriyuj irmänucuna mayçhu juturarpis, Espíritu Santupa shiminta wiyacunman.

will be added

X\