Apocalipsis 2

1Éfeso marcaçhu jutucaj irmänucunata täpaj anjilta cartacur, ninqui: Jesúsga jançhis istrïllata dirïcha-caj maquinçhu charaycan. Jançhis juri lamparin çhaupinçhu puriycan. Paymi nishunqui: 2Ima-imata rurar cawashayquitapis ricashcä. Nuwa-janan ñacashayquita musyä. Wañuy-caway wiyacamashayquitapis musyä. Juchaçhu arujcunatapis mana çhasquipashcanquichu. Caçhä-tucujcunata llullacushantapis taripushcanqui. 3Çhasquicamashayqui-janan ñacachishuptiquipis, mana caçharimashcanquichu. Mana yamacällar shimïtapis wiyacushcanqui. 4Chaypis llaquicü. Janan shungullana manchapacarcaycämanqui. Quiquiqui-purapis mana llaquipänacärinquinachu. Shimïta çhasquicushayqui wichan llapan shunguyquiwan manchapacamarayqui. Quiquiqui-purapis sumaj llaquipänacärirayqui. 5Cananga jasacar, carupayllapa ama purinquimanchu. Manchäga wanacärinquiman. Ñaupata llaquipayta yaçhashayquinuy cawanquiman. Llapan shunguyquiwan shimïta wiyacunquiman. Mana wanacuptiqui, lamparinta upirachir illarachishä-jina jamcunatapis illarachishayqui. 6Chaypis Nicolauspa jatirajnincuna ima-imata rurashantapis mana aunipar, allita rurashcanqui. Nicolauscuna imata rurar cawashanga shunguyquimanpis, shungümanpis mana tincunchu. 7Rinriyuj irmänucuna mayçhu juturarpis, Espíritu Santupa shiminta wiyacunman. Juchacuyta munapächishanta içhipujcunata quiquinpa ñaupanman mana ushyacaj cawayman Tayta Diosninchi çhuranga. Cawachicuj yürapa wayuynintapis micuchinga. 8Esmirna marcaçhu jutucaj irmänucunata täpaj anjilta cartacur, ninqui: Jesúsga cawacuj. Mana ushyacaj. Wañuyman çhayasha. Cawarimusha. Paymi nishunqui: 9Ñacashayquitapis, pishipacuyçhu cawashayquitapis ricaycä. Chaypis puchuy-puchuy janançhu cawaj-yupay carcaycanqui. Çhasquicäramashayquipita Tayta Diosninchi tariycächishunqui. Runacuna washayquita rimashanmi ichanga rinrïman çhayamusha. Washa rimaj Israel runacuna yarpan: Tayta Diosninchipa maquinçhu cawä. Wasinçhu juturä nir. Chaynuy yarparsi, Supaypa maquinçhu cawarcaycan. 10Jamcunam ichanga ñacayta ama manchacärinquichu. Supaypa munayninta rurar, washa rimajcuna waquinniquita carsilman wiçhgachishunquipaj shimïta wiyacushayquita musyapäshunayquipaj. Camacaptin, çhunca junajlla ñacachipärishunquipaj. Chaypis wañuy çhayapushuptiquisi Tayta Diosninchita mana wasguipaptiqui, mana ushyacaj cawayta tarichishayqui. 11Rinriyuj irmänucuna mayçhu juturarpis, Espíritu Santupa shiminta wiyacunman. Juchacuyta munapächishanta içhipujcuna wañurpis, cawarimunga. Cawarimur, yapay mana wañunganachu. Manchäga imay-imaypis Tayta Diosninchipa maquillançhu cawanga. 12Pérgamo marcaçhu jutucaj irmänucunata täpaj anjilta cartacur, ninqui: Jesúsga ishcanläpa afilash cuchilluta charaycan. Paymi nishunqui: 13Juyashayqui marcaçhu llapan runata Supay maquichacusha. Chaypis jamcuna llapan shunguyquiwan shimïta wiyacushcanqui. Willacujnï Antipasta wañuchiptinsi, mana wasguimashcanquichu. 14Ichanga waquin rurashayquicuna shungüman mana tincunchu. Musyapacuj Balaampa yaçhachishanta mana miçhashcanquichu. Balaamga mandaj Balacta shimiyaran: Israelcunata juchaman jançhay. Uywata pishtar jircacunata jaraycur, mallichinacuchun. Jucwan-jucwan cacuptinpis, mana imananchu nir. 15Chaynuypis waquinniqui pantachicuj Nicolauspa jatirajnincunapa shiminta çhasquicärishcanqui. 16Cananga wanacäriy-llapa. Manchäga juclla shamur, shimïpita llucshij ishcanläpa afilash cuchilluwan mana wanacujcunata ñacachishaj. 17Rinriyuj irmänucuna mayçhu juturarpis, Espíritu Santupa shiminta wiyacunman. Juchacuyta munapächishanta içhipujcunata pacaraj manäwan cawachishaj. Yuraj rumitapis jushäpaj. Chayçhu pipis mana ricsishan mushuj juti isquirbiraycan. Chay jutita rumita çhasquijcunalla ricsingapaj. 18Tiatira marcaçhu jutucaj irmänucunata täpaj anjilta cartacur, ninqui: Jesúsga Tayta Diosninchipa Wawan. Ñawinpis nina-jina ratataycan. Çhaquinpis brunsi-jina achic-achicyaycan. Paymi nishunqui: 19Ima-imata rurar cawashayquita ricaycä. Yarparämashayquita, yupachicamashayquita, llaquipänacushayquita, quiquiqui-pura yanapänacushayquita musyä. Maquïçhu cawar ima ñacayman çhayarsi, mana yamacämanquichu. Manchäga shungü munashanta waran-waran ruraycanqui. 20Chaypis waquin rurashayquicuna shungüman mana tincunchu. ¿Imanirraj juchaçhu aruj warmi Jezabelta mana miçhanquichu? Payga wawäcunata pantachir niycan: Tayta Diosninchipa shiminta willacü. Jucwan-jucwan cacushansi mana imananchu. Jircatapis manchapacushuwan. Uywata pishtar, jircata jarashantapis mallichinacushuwan nir. 21Chay warmi wanacunanta munar, mayna willapashcä. Chaypis runacunawan cacur puricuycan. 22Chaymi juyu jishyaman çhayachishaj. Sumaj ñacachishaj. Runan-runan puricuj warmiwan cacujcunatapis mana wanacushanpita ñacachishaj. 23Wañurachinäpaj Jezabelpa llupinpa jatijcunaman jishyata çhayachishaj. Chayraj chay-tucuy marcaçhüpis jutucaj irmänucuna llapan runapa shungunta musyapashäta tantiyacunga. Llapaniquita ima-imatapis rurashayquiman-tupu allimanpis, mana allimanpis çhayachishayqui. 24Waquinniquim ichanga Jezabelpa shiminta mana çhasquipashcanquichu. Jezabelshi Supaypa shungun yarpashanta yaçhachin niptinpis, mana çhasquipashcanquichu. Chaymi piñapänaj mana camacanchu. 25Ichanga cutimunäcaman shimïta ama junganquichu. 26Juchacuyta munapächishanta içhipujcunata cutimunäcaman shimïta wiyacamaptin, marcacunata mandananpaj çhurashaj. Mandäshinäpaj Papänï çhuramashan-jina paycunatapis mandaj cayman çhurashaj. 27Wiyacamajcunapa maquinman çhuraptï, jïru garutiwan mana wiyacujcunata ñacachingapaj. Allpa mancata japllurij-jina ushyarachingapaj. 28Llapanta içhipushanpita waraj istrïllatapis jushäpaj. 29Rinriyuj irmänucuna mayçhu juturarpis, Espíritu Santupa shiminta wiyacunman.

will be added

X\