Apocalipsis 18

1Ricapacuynilläçhu ricapacuycaptillä, janaj pachapita achic-achicyaycar munayniyuj anjil yarpaycämuran. Sumaj achicyaptin, cay pachapis intïru achicyacurcuran. 2Cushicur, japariypa anjil niran: Babilonia marca ushyacärunna. Jatun marca carpis, chunyajna. Supaycunalla tiyaycan. Shapshicucunapa maçhayninman çhayasha. Janra siucacunapis, tucucunapis chayçhu purin. Asyaj uywacunapis wasichacusha. 3Babilonia marcapa mandajnin warmi llapan runata maquinçhu charar, juchallaçhu purichiran. Maçhashta-jina cawachiran. Majanta jananpachij-jina marcapa mandajnin warmillata mamachacuran. Chay-tucuy marca mandajcunapis paywan cacuran. Marcapa mandajnin puchuy-puchuy janançhu cawaptin, rantipacujcunapis rïcuyaran. 4Chaypita janaj pachapita jucna wiyacächiypa nimuran: Wawacuna, chay marcapita witicäriy. Juchaçhu arujcunawan ama talluranquimanchu. Timpurij jishya jamcunaman ama çhayamunmanchu. 5Mana wiyacujcuna juchallan atipay caycan. Tayta Diosninchipis ricashana. Chay-chica juchata aparicushanta Tayta Diosninchi musyaraycan. 6Jucha aparicushanman-tupu ñacayman çhayachun. Runacunata ñacachishan-jina juyupana ñacachun. Jucta ñacachishanpita chigaypa ñacachun. 7Alli-tucushanpita chigaypa ñacachun. Llapanpa janançhu cawashanpita pasaypa ushyapacächun. Mandaj warmi yarpaj: Llapan runata maquïçhu puriycächï. Jucpa maquinçhu mana imaypis purishächu. Biyüda cayman mana imaypis çhayashächu. Llaquicuymanpis mana çhayashächu nir. 8Chay-niraj cashanpita timpurij jishyacuna çhayapunga. Illajpita yargaypis, ñacaypis, wañuypis çhayapunga. Nina llapanta ushyanga. Tayta Diosnillanchi munayniyuj. Paymi juchanta jurgapar, ñacachinga. 9Babilonia marcaçhu nina içhicurcuptinmi ichanga, llapan marcapa mandajnincuna llaquicuywan atar ninga: ¿Piwanraj cacushaj? Silluta manaçhi micushänachu. Paycuna Tayta Diosninchita mana manchapacuranchu. Manchäga shungun munashallanta imatapis ruraran. 10Chaura Babilonia marcata ñacachiptin, mancharinga. Carullapita ricar, wiguinpawanraj atanga: Babiloniallau Babilonia, Jatun marca carsi, ushyacayman çhayashcanqui. Mana yarpashpita ñacayman çhayashcanqui nir. 11Babilonia marca mana captin, llapan rantipacujcunapis: ¿Piraj rantimäshun? nir wiguinpawan atangapaj. 12Purichishan juricunata, jillaycunata, achic-achicyaj rumicunata pipis mana rantinganachu. Chaynuypis bayïtacunatapis, müdanacunatapis finu captinsi, achic-achicyaycaptinsi mana rantinganachu. Pirjümi jirucunata, tullupita piñicunata, alli jirucunata, brunsicunata, jïrucunata, 13canïlacunata, pirjümicunata, bïnucunata, wiracunata, ñuchgu maçhcacunata, rïgucunata, uywacunata, uyshacunata, cawallucunata, cärucunata, shutirächishan runacunata pipis mana rantinganachu. Uywata-jina runata mana rantinganachu. 14Chaymi marca runacunata rantipacujcuna ninga: Cananga silluta mana micunquipänachu. Shunguyqui munashanta mana tarinquipänachu. Alli cawayniquipis ushyacashana. Llapan jillayniquipis ushyacashana. 15Rantipacujcuna imancunatapis Babilonia marcaçhu ranticur, rïcuyaran. Marca ushyapacaptinmi ichanga, mancharinga. Atar, aullar, carullapita jayacunga: 16Babiloniallau Babilonia, jatun marca caran. Jatun marca carsi, pishipacuyman çhayasha. Ñaupata mandaj car, achic-achicyaycaj puca müdanashalla purisha. Jillay piñicunawan achic-achicyaycaj rumicuna piñishalla cuyayllapaj purisha. 17Chaypis mana yarpashpita ushyapacayman çhayasha. Babilonia marca ratariptin, büti mayur purichijcunapis, büti purichijcunapis, bütiwan purijcunapis, rantipacujcunapis carullapita ricapanga. 18Jushtay içhicurcuptin, juyupa mancharinga. Jayacuringa: Babilonia marca runacuna puchuy-puchuy janançhu cawasha. Chay marcaman maygan marcapis mana tincushachu nir. 19Llaquicushpan umancunamanpis uçhpata wiñacunga. Atar wagangapaj: Marcallau marca, jatun marca caran. Jatun marca carsi, ushyacayman çhayasha. Bütiyujcunapis, rantipacujcunapis jillayllayquiwan rïcuyasha. Chaypis mana yarpashpita ushyapacayman çhayasha. 20Janaj pachachu llapaniqui jatunpa cushicärinquiman. Tayta Diosninchipa wawancunapis, caçhancunapis, shiminta willacujcunapis cushicärinquiman. Ñacachishushayquiman-tupu Tayta Diosninchipis ñacachishana nir. 21Chaura munayniyuj anjil jatun rumita lamar yacuman wicaparamur niran: Rumita wicaparishä-jina Babilonia marcatapis wicaparish cangapaj. Tayta Diosninchi wicapaptin, illaringapaj. Pisi mana imaypis ricangapänachu. 22Chay marcaçhu mana pipis tünapacunganachu. Arpapis, pincullupis, curnïtapis mana suynamunganachu. Arujcunapis mana canganachu. Maçhcatapis mana pipis aganganachu. 23Achquitasi pipis mana ratachinganachu. Warmi ashiypis mana canganachu. Babilonia marca rantipacujcuna sumaj rïcuyaran. May-chayçhüpis chapata rurar, runacunata riguichiran. 24Babilonia marcaçhu Tayta Diosninchipa shiminta willacujcunatapis, wawancunatapis wañuchir, yawarnintapis mashtaran. May-chayçhüpis runacunata wañuchiran. Chaynuy cashanpita ushyacayman çhayangapaj.

will be added

X\