1 Chaypita janaj pachaman ricar, mancharishcä. Tantiyayta mana atipashcächu. Jançhis anjilta ricarä. Anjilcunapa maquinçhu jançhis casta timpurij jishyacuna caycaran. Jançhis jishya runacunata ñacachiptinraj, Tayta Diosninchipa ullguynin jasangapaj. 2 Yacu püsuta-nirajtapis ricarä. Ichanga chip-chipyaycaj chuya yacu-jina ricacuran. Ninawan tallush caycaptin, achic-achicyaycaran. Yacu janançhu waräcuyta içhipujcuna içhirpaycaran. Paycunaga waräcuytapis, waräcuyman ricchacujtapis mana manchapacuranchu. Waräcuypa jutinwanpis mana chäpacuranchu. Chaypita Tayta Diosninchi jucta-caman arpata juran. 3 Paycuna Tayta Diosninchipa mandu-rurajnin Moisés unay cantashantapis, Uysha cantashantapis cantaycaran. Arpata tucapayllapa cantar niycaran: Taytallau Tayta, llapanpaj munayniyuj canqui. Rurashayquiga llapanpis sumaj alli caycan. Rurashayquita pipis mana ruranmanchu. Maquiquiçhu llapan runata purichinqui. Pitapis allilla ricanqui. Pitapis sumaj yanapanqui. 4 Tayta, llapan runa alliman çhurashunquiman. Llapan alliçhu jurgushunquiman. Juchaynaj cashpayqui alli cawayniquiman runa mana tincunchu. Chaymi chay-tucuy marcacunapita sharcamur, manchapacushunquipaj. Allillata rurar cawashayquita llapan runa ricasha. 5 Jinarcur janaj pachaman ricäriptï, Tayta Diosninchipa wasi rurin-caj puncu quiçhacäcamuran. Wasiga purichina jiru çhaqui wasin caran. 6 Ruri-caj cuartupitana jançhis anjilcuna llucshiramuran. Maquinçhu jançhis casta timpurij jishyacuna caycaran. Anjilcunapa müdanan achic-achicyaycaran. Jasgu waçhcunpis caran juripita. 7 Intïru janançhu ñawiyuj cawajcunana jançhis anjilcunata jucta-caman juripita tasunta juran. Tasunga Tayta Diosninchipa ullguyninman tincun. Payga imay-imaypis cawan. 8 Munayniyuj captin, manchapacuypa captin, wasintapis jushtay niticurcuranraj. Chaymi pipis mana yaycuranchu. Jançhis anjilcuna purichishan jançhis timpurij jishya runacunata ñacachiptinraj, yaycuran.
