Apocalipsis 11

1Jinarcur bärata juycamar, Tayta Diosninchi nimaran: Jerusalén marcaçhu wasïta tullpantinta tupunqui. Manchapacamajcunatapis yupanqui. 2Sawantam ichanga ama tupunquichu. Sawantaga mana manchapacamaj runacunapa maquinman çhurashcä. Marcä caycaptinsi, paycuna quimsa wata pullan Jerusalén marcata pampaman çhuranga. 3Chay wichan ishcaj willacujnïta caçhamushaj quimsa wata pullan shimïta willapäcunanpaj. Wañupacush-yupay jaçhga müdanash puringa. 4Cay pacha Tayta Diosninchipa maquinçhu caycan. Paypa ñaupallançhu caycar, ishcaj willacujcuna tincun ishcay ulïbus yürawan, ishcay lamparinwan. 5Pipis ñacachiyta munaptin, willacujcunapa shiminpita llucshimuj nina ushyacächinga. Ñacachicujcunata rupaypa illarachingapaj. 6Tayta Diosninchi camacächiptin, willacujcuna munayniyuj cashpan tamyatapis mana tamyachimungachu. Yacutapis yawarman ticrarachinga. Munar, tucuy-niraj timpurij jishyawan runacunata ñacachinga. 7Tayta Diosninchipa shiminta willapäcuyta ushyarcuptinmi ichanga, chacaj pachapita llucshimuj waräcuy maganga. Içhipunga. Wañurachinga. 8Willacujcunapa ayanpis llapan ricay Jerusalén marca cälliçhu jitaranga. Chay marcallaçhu Taytanchi Jesústapis rusçhu wañuchiran. Jerusalén runacuna juyu. Sodoma marca runacunawan, Egipto marca runacunawan tincun. 9Quimsa junaj pullannin ayan jitaraycaptin, chay-tucuy marcapita, tucuy casta runacuna, tucuy-niraj rimajcuna ricäcunga. Pampanantapis miçhanga. 10Tayta Diosninchipa shiminta willacushpan willacujcuna llapan runata juyupa ñacachish caran. Chaymi wañuchish captin, llapan runa cushicunga. Ima allish wañuyta tarisha nir, cuyachicuynincunatapis jaranacunga. 11Quimsa junaj pullannintam ichanga Tayta Diosninchi cawarachiptin, willacujnincuna jataricurcuran. Chayraj ricäcujcuna juyupa manchariran. 12Janaj pachapitana juc jayacamuran: Shamuy nir. Jayacamuptin llapan chiqui runacuna ricapaycaptin, ishcaj willacujnincuna pucutay jananpa jigacuran. 13Jigacuptin, cay pacha juyupa sicsicyaran. Jerusalén marcaçhu chay-chica wasipis juçhuran. Runacunapis jançhis waranga (7,000) wañuran. Wañuypita jishpijcunam ichanga juyupa manchariran. Janaj pachaman jayacuran: Taytallau Tayta, alli ricash caycullay nir. 14Caycaj ñacay çhawarcuptinsi, quimsa-caj çhayamunan pishinraj. 15Juc anjilna curnïtata tucaramuptin, janaj pachaçhu wiyacächiypa nimuran: Cushiculläshun. Cay pacha Tayta Diosninchipa maquinçhünam. Caçhamushan Washäcuj Jesúspa maquinçhünam. Imaycamanpis maquinçhümi Tayta Diosninchi purichimäshun nir. 16Ishcay çhunca çhuscuwan (24) mayurcunapis Tayta Diosninchipa ñaupançhu jamarashanpita sumaj manchapacushpan jungurpacaycäriran. Cushicuywan niran: 17Taytallau Tayta, llapanpaj munayniyujmi canqui. Imay-imaypis cawajmi canqui. Imaypis mana ushyacanquichu. Ima allish llap-llapanta maquiquiman shuntashcanqui. Sumaj munayniyuj cashpayqui maquiquiçhünam llapallanta purichinqui. Chaypitam jatunpa cushicärillä. 18May-chayçhüpis mana wiyacuj runacuna ullgucäcusha. Cananmi ichanga quiquiqui ullgucuycushcanqui. Llapan wañushcunatapis juchanta jurgapanquipaj. Shimiquita willacujcunatam ichanga alli cawayta tarichinquipaj. Shunguyqui munashanta rurashanpita, shimiquita wiyacushanpita manchapacujcunatapis alli cawayta tarichinquipaj. Paycunata alli ricash captinsi, mana alli ricash captinsi, llapantam alli cawayta tarichinquipaj. Ñacachicujcunatam ichanga, wañuchicujcunatam ichanga, wañuchir illarachinquipaj. 19Chaura janaj pachaçhu Tayta Diosninchipa wasi puncun quiçhacäcuran. Babulta ricar, runacunawan Tayta Diosninchi parlanacushanta yarparä. Ricaycaptï, illagu achicyaypa-achicyämuran. Rimamujcunapis wiyacächimuran. Räyupis bunruruylla pashtamuran. Cay pachapis sicsicyacurcuran. Runtu tamyapis juyupa tamyamuran.

will be added

X\