Apocalipsis 10

1Chaypita janaj pachapita munayniyuj anjil pucutay rurinçhu yarpuycämujta ricarä. Umanta turmanya waçhcaraycaran. Jajllan inti-jina achic-achicyaycaran. Çhancan nina-jina warau-warauyaycaran. 2Tacshalla pitush papilta aptaraycaran. Ichanga quiçharaycaran. Dirïcha-caj çhaquin jatun lamar yacuman lluchcaraycaran. Isquirda-caj çhaquinna allpaman lluchcaraycaran. 3Nircur liyun japarashan-jina jayacuran. Jayacuriptin, janaj pachapita jançhis räyu pashtaramuran. 4Jançhis räyu pashtamushanta apuntanäpaj caycaptï, janaj pachapita wiyacächiypa nimuran: Räyu pashtamushanta pitapis ama willapanquichu. Rimamushantaga ama apuntanquichu. 5- 6 Chaura aunishpan lamar yacuman, allpaman lluchcaraj anjil maquinta janaj pachaman jugarcur niran: Yarpashancunata Tayta Diosninchi camacächinga. Payga imaycamanpis cawacuj. Llap-llapanta camasha. Janaj pachata llapantinta camaran. Cay pachatapis llapantinta camaran. Yacucunatapis llapantinta camaran. Shiminta çharcungana. Juc junajpaj mana jitapunganachu. 7Chaymi juc anjil curnïtata tucaramuptin, shungun yarpashan çharcucash canga. Unaypita-pacha shungunçhu pacarächishan yarpashanta willacujnincunawan musyachicuran. 8Janaj pachapita rimamujga yapay nimaran: Lamar yacuman, allpaman lluchcaraj anjilman ayway. Aptarashan quiçhash papilta mañacamuy. 9Nimaptin, anjilman aywarä: Tacsha papilta juycallämay, ari nir. Anjilna nimaran: Catay. Micuy. Micuptiqui, sumaj mishquinga. Paçhayquitam ichanga juyupa asgächinga. 10Chaura tacshalla papilta çhasquircur, änir micucurcurä. Micuptï, änir sumaj mishquiran. Paçhätam ichanga juyupa asgächiran. 11Jinarcur nimaran: Tayta Diosninchi camacächiptin, imapis cananta yapay musyachicuy. Runacuna may marcaçhu tiyaptinpis, ima casta captinpis, ima rimayta rimaptinpis, jatun mandaj captinpis llapantam musyachinquiman.

will be added

X\