Filemón 1

1- 3 Filemónllau Filemón, nuwa Pablo, irmänunchi Timoteuwan ishcanï cartacamü Washäcuj Jesús-janan runacuna wiçhgaraycächimaptinsi. Tayta Diosninchipa shiminta willapäcur purïshimashayquipita sumaj cushicü. Wasiquiçhu llapan juturaj irmänunchicunatapis, mama Apiatapis, yanapäcuj Arquiputapis wamayapämay, ari. Llapaniquita Washäcujninchi Jesúspis, Tayta Diosninchipis alli ñawinwan ricayculläshunqui. Llaquipäshushpayqui sumaj yanapayculläshunqui. 4Jamta yarpararmi, sumaj cushicü. Chaymi waran-waran Tayta Diosninchita mañacü: 5Taytallau Tayta, ima allish Filemón Tayta Jesúsman sumaj yupachicun. Irmänucunatapis alli ñawinwan rican. 6Ichanga: Yupachicü nirpis, alli cawananpaj sumajraj tantiyacuchun. Washäcujninchi Jesús-raycur allillata ruraycullächun nir. 7Irmänunchicunata sumaj llaquipashayquita musyä. Shacyächiptiqui, shungunpis achicyacäcusha. Chayta rurar, nuwatapis shacyächimanqui. Shungüpis achicyacäcusha. 8Chaypis Washäcuj Jesúspa maquinçhu cawar, piñacunaj camacan. 9Ichanga llaquipashpä alli shimilläpa mañacushayqui auquin carpis, Washäcuj Jesús-janan wiçhgarächimaptinpis. 10Uywayniqui Onésimupaj mañacushayqui, ari. Wiçhgararpis, Onésimuta wawäta-yupaymi ricä shimïpita Jesúsman yupachicuptin. 11Ñaupata ricay ñawiquiçhu manacaj runash caran. Cananmi ichanga ishcaninchita sumaj yanapaycämanchi. 12Shungü llaquiraycaptinsi, maquiquiçhüna cawananpaj cutiycächimü. 13Jesúspa alli willapanta willapäcushäpita wiçhgaraptï, ricamaj pishïman. Quiquiqui yanapämayta mana camäpacuptiqui, Onésimuta maquïçhu charayta yarpashcä. 14Ichanga mana aunimashayquicaman charänä mana camacanmanchu. Jamurpämanquiman. Alli shimiquipa aunimaptiquiraj, yanapämanman. 15Ñaupata Tayta Diosninchi camacächiptinçhi, Onésimo çhaquinta jurgusha. Cananmi ichanga maquiquipita mana imaypis jishpipäshunquipächu. 16Ñaupata uywayniqui captin, maquiquiçhu charashcanqui. Jesúsman yupachicuptinmi ichanga, yaçhänacushayqui irmänu-jina ricanquiman. Llaquipäshä-jina sumaj llaquipanquiman. 17Chaymi shungunchi tincuycaptin, nuwata-jina Onésimutapis alli ñawiquiwan ricanquiman. 18Imaçhüsi llutanta rurash captin, imatapis jaga-tucush captin, willamay. Llapanta jugaricushaj. 19Quiquï cartacaycämü: Llapallanta cutichishayqui nir. Ichanga Tayta Diosninchipa willacuyninta yaçhachishajpita, jagä-yupay caycanqui. Chaypis mana rimapäshayquinachu. 20Manchäga irmänu, Tayta Diosninchi-raycur yanapaycallämay, ari. Washäcuj Jesús-raycur shacyächicamay, ari. 21Wiyacujmi canqui. Chaymi juc-ishcayllata cartacamuptïsi, llapallantaçhi çharcuj aywanqui. 22Mañacärishayquita wiyar carsilpita llucshinäpaj Tayta Diosninchi camacächiptin, yapay watucushayqui. Pachächimanqui, ari. 23-24 Purïshimaj Marcospis, Aristarcupis, Demáspis, Lucaspis wamayämushunqui. Irmänunchi Epafraspis wamayämushunqui. Paytapis Washäcuj Jesús-janan carsilaraycächin. 25Chayllata cartacallämü. Taytanchi Jesucristu llaquipäshushpayqui yanapayculläshunqui, ari. Chaynuy caycullächun.

will be added

X\