Filipenses 4

1Chaymi wawallau, alliçhu jurgamashayquipita jatunpa cushicü. Llapaniquita llaquij. Sumajmi watucuyta munä. Jamcunapita Tayta Diosninchipis alli ñawinwan ricaycäman. Wawallau, chaymi shungun munashannuy cawashayqui-jina mana yamacällar Washäcuj Jesúspa maquillançhu cawanquiman. 2Washäcujman yupachicushpan mama Evodiapis, mama Síntiquipis ama apaycaçhänacuchunchu. 3Paycuna Clemente-ima, waquin irmänunchi-ima sumaj yanapämaran Jesúspa alli willapanta willapäcuptï. Chaymi alli ricanacunanpaj sumaj yanapanquiman. Paycunata Tayta Diosninchi ricsiraycan. Maquinçhu imaycamanpis cawangapaj. Acta librunçhu jutincunapis isquirbiraycan. 4Chaymi Tayta Diosninchipa maquinçhu cawaycar, imaypis cushishalla cawanquiman. Ama llaquicunquimanchu. 5Pï-maytapis llaquipanquiman. Washäcuj Jesús warasi-chicasi cutimungapäna. 6Ima captinpis, alläpa ama yarpaçhacunquichu. Pishipacur-imarga, Tayta Diosninchita mañacunqui. Imallata tarichishuptiquipis, cushishalla çhasquicärinqui. 7Washäcuj Jesúspa maquinçhu cawar payllaman yupachicur, Tayta Diosninchi allilla cawaycächishunquipaj. Shunguyqui jasillaman çhayashantapis tantiyayta mana atipanquipächu. 8Irmänucuna, sumaj yarpaçhacushun. Tayta Diosninchipa shungun munashannuylla cawashun. Alli shungu cashan-jina cuyay-munaypaj cawashun. Shungunman tincushallanta imatapis rurashun. Camacächishannuylla purishun. Alli ñawinwan ricamashanchi-jina runa-masinchitapis alli ricashun. Ricay ñawinçhüpis manchapacullar cawashun. Imaypis runa-masinchipa ricay ñawinçhu allillata rurashun. Chaynuy cawaptinchi, runacunapis alliman çhuramäshun. 9Willapashajta, tantiyachishajta ama junganquichu. Ricamashayquita ruraptiqui, willapashajta wiyacuptiqui, llaquipäcuj Tayta Diosninchipis mana caçharishunquipächu. Manchäga maquinçhüna allilla cawachishunquipaj. 10Irmänucuna, ima allish yarpäramashcanqui. Tayta Diosninchi camacächiptin, yanapämashcanqui. Ñaupata yanapämayta mana camäpacushcanquichu. Cananmi ichanga mana jungamashayquita musyä. 11Mana pishipacurchu rimaycä. Taripacushalläwan cawayta yaçhacashcänam. 12Puchuy-puchuyçhu cawaytapis, pishipacuyçhu cawaytapis yaçhacashcä. Micuy janançhu cawaytapis, yargayçhu cawaytapis yaçhacashcäna. 13Washäcuj Jesús shacyächimaptin, llapantapis içhipü. 14Chaypis pishipacuptï yanapämar, allita rurashcanqui. 15Tayta Diosninchipa shiminta willacur Macedonia quinranpita aywacuptï, jamcunalla yanapämashcanqui. Waquin marcaçhu jutucaj irmänucunam ichanga mana ricamashachu. Imallawanpis mana yanapämashachu. 16Tesalónica marca quinrançhu willacur puriptï, pishipacurä. Chaypis mana pipis yanapämashchu. Jamcunam ichanga ishcay-quimsa cuti apachillämushcanqui. 17Cananpis mana yapay apachimunayquita munarchu rimaycä; manchäga yanapämashayquipita Tayta Diosninchi sumaj yanapäshunayquita munar. 18Nuwa llapanta sumaj ricaycä. Imapis mana pishïmanchu. Ima allish Epafrodituwan apachillämushcanqui. Cananga imapis mana pishïmanganachu. Apachimushayquita quiquinta jarashayquita-yupay Tayta Diosninchi cushishalla çhasquisha. 19Washäcuj Jesús washämänanchi-raycur jamcunatapis Tayta Diosninchi sumaj tarichishunquipaj. Payga munayniyuj. Llapanchi maquinçhu cawaycanchi. 20Chaymi Tayta Diosninchita imaycamanpis alliman çhurayculläshun. Allilla ricayculläshun. Chaynuy caycullächun. 21- 22 Irmänunchicunata llapanta wamayapämay, ari. Paycunapis Washäcuj Jesúsman sumaj yupachicun. Purïshimaj irmänunchicunapis llapanmi wamayäshunqui. Roma mandajpa wasinçhu aruj irmänunchicunapis wamayäshunqui. 23Washäcuj Jesús llapaniquita yanapayculläshunqui, ari. Chayllana.

will be added

X\