Filipenses 2

1Washäcuj Jesúsmi ichanga shacyächimanchi. Llaquipämaptinchi, mana manchacunchinachu. Espíritu Santu shacyächimaptinchi, juc shungulla cawaycanchi. Llaquipänacur, alli ñawinchiwan ricanacunchi. 2Chaymi cushish cawanäpaj alliçhu jurgamanquiman. Juc shungulla cawanquiman. Sumaj llaquipänacunquiman. Tayta Diosninchita manchapacur cawanquiman. 3Pampaman çhuranacullar imatapis ama ruranquichu. Ama apärinacunquichu. Ama alli-tucunquichu. Pitapis ama pampaman çhuranquichu. Manchäga alli ñawiquiwan ricanacunquiman. 4Quiquillayquipaj imatapis ama ashinquichu. Manchäga llaquinacärir-llaquinacärir cawanquiman. 5Llapanchipis Washäcuj Jesúsman yupachicur, llupillanpa aywashun. 6Payga quiquin Tayta Diosninchi cashpan mana alliçhu llucshiytachu ashiran. 7Manchäga munayniyuj cayninta jaguicuran mandu-ruraj cananpaj, pampa runa cayman çhayananpaj. 8Runa cashpan Tayta Diosninchipa shiminta sumaj wiyacuran. Runacuna pingayman çhuraptinsi, rusçhu wañuchiptinsi, wiyacuran. 9Chaypis munayniyuj cayman Tayta Diosninchi çhuraran. Payman pipis mana tincunchu. 10Canan llapan runa Jesústa alliçhu jurgunga. Janaj pachaçhu cawajcunapis, cay pachaçhu runacunapis, wañushcunapis alliçhu jurgunga. 11Llapan auninga: Tayta Diosninchi alli ricash caycullächun. Payga Washäcuj Jesústa caçhamuran. Jesúspa maquinçhüna cawaycanchi. Payga Tayta Diosninchi nir. 12Wawallau, wiyacujmi canqui. Jishpichish caycäshuptiqui, llapan shunguyquiwan Tayta Diosninchipa shiminta wiyacunquiman. Iwal juyaptinchisi, caruçhu captïsi, Tayta Diosninchipa shiminta wiyacärinquiman. 13Shungun munashanta rurananchipaj quiquin Tayta Diosninchi shacyaycächimanchi. Payta manchapacur cawananchipäpis quiquin yanapaycämanchi. 14Mayganiquipis ama jamurpänacunquichu. Ama jayapänacunquichu. 15Chaura pipis mana jurgapäshunquichu: Juchaçhu arun nir. Llapan runa juchata aparicullar cawaptinsi, Tayta Diosninchipa wawan caycar, manchapacur cawashun. Llapan ricacunanpaj alli cawashun. 16Chayraj waquin runapis Tayta Diosninchiman yupachicunga. Chaymi Tayta Diosninchipa shiminta ama jungashunchu. Washäcuj Jesús cutimuptin, cushicushaj: Allipämi willapashcä nir. 17- 18 Shiminta wiyacuptiqui, shungun munashanta ruraptiqui, Tayta Diosninchipa shungunpis jatunpa cushicunga. Nuwatapis willacushä-janan runa wañuchimaptinsi, ama llaquicunquichu. Manchäga Tayta Diosninchipa shungun munashallanta rurar, llapanchi cushi-cushilla cawashuwan. 19Alli cawashayquita musyar, jatunpa cushicushaj. Chaymi imanuy cawashayquita musyayta munar, irmänunchi Timoteuta caçhamushaj; ichanga Tayta Jesús camacächiptinraj. 20Timoteuwan sumaj yaçhänacü. Jamcunatapis mana jungashunquichu. 21Waquin runam ichanga quiquillan alliçhu llucshiyta ashin. Washäcuj Jesús yarpashanta mana imasi jucunchu. 22Timoteo alli shungu cashanta musyanqui. Jesúspa alli willapanta willapäcuptï, purïshillamasha. Wawa-yupay imaçhüpis yanapämasha. 23Carsilpita llucshinätapis, mana llucshinätapis musyarir, juclla Timoteuta caçhamushaj. 24Chaypis sumaj Tayta Diosninchiman yupachicü. Carsilpita caçharimaptin, quiquïrämi ricashayqui. 25-26 Irmänucuna, ima allish Epafrodituwan imasi pishïmajcunata apachillämushcanqui. Payga sumaj yanapämasha. Shungümanpis tincusha. Cananga imanuy cawashantapis musyanayquipaj caçhaycämü. Epafrodito sumaj llaquipäshunqui. Chaymi: Jishya charimashanta mayar, Filipos irmänucuna llaquicuycançhi nir cutimuyta munaycan. 27Rasunpa jishya sumaj charisha. Tayta Diosninchim ichanga llaquipar allchacächisha. Alläpa llaquicunäpita wañunantapis mana camacächishachu. 28Chaymi jamcunapis Epafrodituta ricar, cushicunayquipaj caçhaycämü. Shunguyqui cushïriptin, nuwapis jatunpa cushicushaj. 29Çhayamuptin, alli ricanqui. Cutimunanpaj Tayta Diosninchi camacächisha. Chaymi paytapis, waquin willacujcunatapis alliçhu jurgushuwan. 30Epafrodito jishya chariptinsi, shiminta mana chapacushachu. Jamcuna mana camäpacuptiqui, nuwatapis wañuy-cawaymi ricamasha. Llapantapis rurasha Washäcuj Jesúspa shiminta willacurmi.

will be added

X\