Mateo 8

1Sumaj willapäcurir puntapita yarpuptin, achcaj runa Jesúspa jipanpa aywaran. 2Jaraçhu jishyaj runapis Jesústa taripar ñaupanman jungurpacuycur, niran: Llaquipämashpayqui allchacaycachillämay. Tayta Diosninchipa ricay ñawinçhüpis alli cayta munä. 3Jesúsna llaquipashpan maquinwan yataycur, niran: Llaquipajmi. Allchacayna. Niptin, jaraçhu jishya illaricäcuran. Allchacäcuran. 4Jinarcur Jesús niran: Ama pitapis willapanquichu. Manchäga cüraman ayway. Moiséspa shiminta çharcur cuyachicuyniquitapis Tayta Diosninchita jaray. Chayraj llapanpa ricay ñawinçhu alli canquipaj. 5Cafarnaún marcaman Jesús çhayaycaptin, Roma murucucunapa capitannin çhayapuran. Çhayarcur mañacuran: 6Tayta, uywaynï jishyaycan. Çhaquinta, maquinta mana cuyuchinchu. Juyupa nanächicun nir. 7Jesúsna niran: Wasiquiman aywashun. Allchacächishaj. 8Capitanmi ichanga niran: Wasïman çhayanayqui mana camacanchu. Roma runa captï, Israel-masiquicuna ricamaytapis mana munanchu. Chaypis aunimaptiqui, uywaynï allchacäcunga. Mana aywanayquirächu. 9Nuwapis jucpa maquinçhu juyä. Quiquïpis maquïçhu murucucunata purichï. Chaymi: Shamuy niptï, shamun. Ayway niptï, aywan. Wasïçhüpis llapan mincaynï shimïta wiyacun nir. 10Capitanpa shiminta wiyar, Jesús jatunpa cushicuran. Jatirpaj runacunata niran: Jäpa runa caycarsi, llapan shungunwan cay runa manchapacaman; Israel-masinchicunam ichanga janan shungulla. 11Sumaj tantiyacunquiman. Tayta Diosninchipa maquinçhu cawajcuna chay-tucuy marcapita jutucangapaj. Auquillunchi Abrahamwan, Isaacwan, Jacobwan, llapanmi Tayta Diosninchipa ñaupallançhu micupacungapaj. 12Israel-masinchicunam ichanga: Tayta Diosninchipa wawanmi cä nirpis, mana jutucangachu. Paycunata chacaj pachaman Tayta Diosninchi jargungapaj. Chayçhüraj llaquicunga. Atar waganga. Juyupa ñacar quiruntapis uçhunga. 13Jinarcur capitanta Jesús niran: Wasiquimanna cuticuy. Yupachicamashayquiman-tupu camacanga. Nishan ürash capitanpa uywaynin allchacäcuran. 14Chaypita Pedrupa wasinman Jesús aywaran. Pedrupa suydan wayllaywan jishyaycaran. 15Maquinpita Jesús yataycuptinmi ichanga, wayllay caçhariycuran. Chaura jatarcur, yanucuriycuran jarananpaj. 16Chacanaycaptinna, Jesúsman jishyaçhucunata apamuran: Diyawarda ushyashanam nir. Supay pucllacushan jishyaçhucunatapis çhayachiran. Jesúsmi ichanga juc shimi rimarillar, supaycunata jarguriran. Jishyaçhucunatapis llapallanta allchacächiran. 17Chaynuymi unay willacuj Isaíaspa shimin çharcucaran. Isaíasga unayna niran: Quiquinmi jishyanchicunata jurgusha. Nanayninchicunatapis apasha. 18Juc cuti achcaj runata ricar, purïshijnincunata Jesús niran: Yacu püsuta chimpashun. 19Chaynuy niptin, Moiséspa shiminta yaçhaj runa niran: Tayta, aywashayquipa aywayta munä. Maypapis purimushun. 20Jesúsna niran: Atujcunapis maçhayninçhu tiyan. Pichuysacunapis jishuyuj. Nuwapam ichanga Tayta Diosninchipa caçhan captïsi, mayman çhayanäpäpis wasï mana canchu. 21Chaypita juc purïshijninna Jesústa niran: Tayta, papänïtaraj ricashaj. Wañucuptin pampaycurraj, purïshishayqui nir. 22Jesúsna niran: Papäniqui chapata ama rurashunquimanchu. Juclla purïshimay. Wañushta wañush-masincuna pampachun. 23Chaypita purïshijnincunawan-ima Jesús bütiman jigaran. 24Bütiwan aywaycashançhu Jesús puñucäcuran. Puñucäcushancaman shucucuy wayra ricacamuran. Yacu büchiypa-büchir, bütiman yaycuycaran. 25Purïshijnincunana Jesústa ricchachiran: Washämay. Washämay, Tayta. Challpucaycanchina nir. 26Jesúsna niran: ¿Imanirtaj mancharinqui? ¿Janan shungullachu Tayta Diosninchiman yupachicunqui? Jatarcurna, yacutawan wayrata Jesús piñacuran. Piñacuptin, shucucuy wayra çhawacäcuran. Yacupis puñucäcuran. 27Chaura purïshijnincuna mancharicäcur, quiquin-pura ninacäriran: ¿Piraj cay runa? Piñacuriptin, shucucuy wayra çhawacäcun. Yacupis puñucäcun nir. 28Püsuta chimpar, Gadara quinranman Jesús çhayaran. Çhayaptin, pantyunpita ishcaj runa llucshiramuran. Supaypa maquinçhu purir, juyu caran. Chaymi chay quinranpa pipis mana puricujnachu. 29Supay pucllacushan runacunana supay rimachiptin, jayacuran: Tayta Diosninchipa Wawan Jesús, ¿imanirtaj ashipämanqui? ¿Imanirtaj juclla ñacayman jitarpamayta munaycanqui? Amaraj ñacachimaychu, ari nir. 30Chay junaj washlänin quinrançhu chay-chica cuchi pagupacurcaycaran. 31Chaymi supaycuna Jesústa mañacuran: Cay runapita jargumashpayqui cuchicunata pucllacunäpaj aunimay, ari nir. 32Mañacushanta Jesús auniran: Ayway nir. Auniptinga runata caçhariycur, cuchicunatana pucllacuran. Cuchicunana jishyayar, chagapita yacuman jigapurcuran. Llapallan shugupacaypa wañuran. 33Cuchi michijcunana mancharish jishpicäriran. Marcanman çhayar, imallata ricashantapis willacuran. Ishcaj jishyayash runa allchacashantapis willacuran. 34Willaptin, llapan runa Jesúsman aywaran. Çhayar, mañacuran: Cay marcapita aywacuy, ari nir.

will be added

X\