Mateo 6

1Runa ricanallanpaj ama alli-tucuychu. Runa ricanallanpaj ruraptiqui, janaj pachaçhu tiyaj Tayta Diosninchi mana imatapis tarichishunquipächu. 2Chaymi pishipacujta jarar, willacuräcur ama purinquichu. Janan shungu runacunalla cällicunaçhüpis, shuntacäna wasicunaçhüpis willacuräcur purin. Chay-niraj cashanpita runa-masin alli ricaptin, ashishanta mayna tarisha. Chaymi Tayta Diosninchi imatapis mana tarichinganachu. Chayta sumaj tantiyacunquiman. 3Chaura wacchata jarar, pitapis ama musyachinquichu. 4Llaquipäcuj cashayquita mana willacuptiquiraj Tayta Diosninchi shunguyquita musyapar, imatapis tarichishunquipaj. 5Tayta Diosninchita mañacur, janan shungu runacuna-jina ama ruranquichu. Paycunaga runa ricanallanpaj shuntacäna wasicunaçhüpis, cällicunaçhüpis içhicaycärir Tayta Diosninchita mañacun. Chay-niraj cashanpita runa-masin alli ricaptin, ashishanta mayna tarisha. Chaymi Tayta Diosninchi imatapis mana tarichinganachu. Chayta sumaj tantiyacunquiman. 6Tayta Diosninchita mañacushayquita shungullayqui musyaranman. Wasi puncuyquita wiçhgacurcur, mañacunqui. Pacayllapa mañacushayquita ricar, Tayta Diosninchi imatapis tarichishunquipaj. 7Juc rimashallayquita cutiparir-cutiparir Tayta Diosninchita ama mañacunquichu. Jäpa runacuna Tayta Diosninchi pï cashantapis mana musyar, yarpan: Cutiparir-cutiparir mañacuptïräshi, Tayta Diosninchi wiyamanga nir. 8Chay-niraj runacuna yarpashanta ama jatinquichu. Ima-imata mañacunanchipaj cashantapis mayna Tayta Diosninchi musyaycan. Shiminchi mana pashtapacuptillanraj, musyaycanna. 9Chaymi Tayta Diosninchita mañacur ninqui: Papäninchi, Janaj pachaçhu tiyajmi canqui. Llapanpis manchapacuyculläshunqui. 10Maquiquiçhu cawaycachillämay. Janaj pachaçhu wiyacushushayqui-jina cay pachaçhüpis llapanmi wiyayculläshunqui. 11Waran-waran cawanäpäpis tariycachillämay, ari. 12Juchäcunatapis ama yarparaynachu. Manchäga chiquimajcunata alli ricashä-jina alli ricaycallämay. 13Juchaman çhayanätapis ama camacaycachillaychu. Manchäga Supaypa maquinpita washaycallämay. 14Runa-masiquiwan imatapis alli shimillayquipa ushyacächiptiqui, Tayta Diosninchipis llapan juchayquita junganga. 15Quiquiqui-pura mana ushyacächiptiquim ichanga, Tayta Diosninchipis juchayquita mana jungangachu. 16Ayunar, llaquish-niraj ama canquichu. Janan shungu runacuna-jina ama canquichu. Paycunaga ayunashanta runacuna musyananpaj llaquish-tucur purin. Chay-niraj cashanpita runa-masin alli ricaycaptin, ashishanta mayna tarisha. Chaymi Tayta Diosninchipita mana imatapis çhasquinganachu. Chayta sumaj tantiyacunquiman. 17Jamcunam ichanga ayunar, umayquita pajpacurir ñajchacunqui. Jajllayquitapis mayllacunqui. 18Chaura ayunashayquita pipis mana tantiyangachu. Tayta Diosninchim ichanga pacayllapa mañacushayquita ricar, imatapis tarichishunquipaj. Payga llapan runapa shungunta musyapan. 19Cay pachallaçhu rïcuyaytapis, ima-aycatapis ama ashinquichu. Cayçhüga imanchicuna mupallin. Puyun. Suwapis apacun. 20Chaymi cay pachaçhu imatapis ama çhuracunquichu. Manchäga janaj pachaman çhuracunqui. Runa-masiquita llaquipar yanapashayquita Tayta Diosninchi ricanga. Ricaptinga, mana mupallinchu. Mana puyunchu. Suwapis mana apanchu. 21Sumaj tantiyacunquiman. Runaga shungun imata munashallanta yarparäcun. 22Achquiga shimïwan tincun. Ñawinchiwan llapantapis ricanchi. Ñawinchi achquita ricaptin, shungunchipis achicyacäcun. Shunguyquiman shimï çhayaptin, Tayta Diosninchipa shungun munashanta tantiyacunquipaj. Shunguyquiman mana çhayaptinmi ichanga, jucha aruyllaçhu cawanquipaj. 23Ñawinchi chacash captin, rama-ramalla ricashanchi-jina juyu shungu cashanchipis ricacan Tayta Diosninchipa shungun munashanta mana ruraptinchi. Ñawinchi japra captin, allita, mana allitapis mana tantiyacushunpächu. 24Juc runa ishcaj patrunpa maquinçhu mana cawanmanchu. Ishcanwan shungun mana tincunmanchu. Ishcajpa maquinçhu cawar, juc-cajpita carupayllapa purir, juc-cajllamanna jillicurcunga. Juc-cajta pampaman çhurar, juc-cajllatana alli ñawinwan ricanga. Jamcunapis jillayllaman yarparar, Tayta Diosninchita jungaycärinquipaj. 25Canan sumaj willapäshayqui. Ama llaquicunquichu: ¿Imawanraj cawashaj? ¿Imataraj micushaj? ¿Imataraj ushtucushaj? nir. Cawaycar paçhayquipaj pishiptinpis, janayquipaj pishiptinpis, ama llaquicunquichu. 26Pichuysacunata mä, ricacushun. Paycuna manash murupacunchu. Manash pallapacunchu. Murutapis manash çhuracunchu. Imatapis mana ruracuycaptinsi, Tayta Diosninchi micunanta camapan. Pichuysacunata camapaycarga, ¿pishïchishunquimanchuraj? Mana. Tarichishunquipämi. 27May-jina llaquicurpis wañuy çhayamuptin, mana jishpinquipächu: Cawapärishäraj nir. 28Müdanayquipaj ama yarpaçhacunquichu. Waytacunata mä, ricacushun. Waytacunaga mana arucuycarsi, mana puchcacuycarsi cuyayllapaj waytan. 29Wayta cuyayllapaj cashanman unay mandaj Salomónpis mana tincuranchu achic-achicyaycaj müdanash caycarsi. 30Waytacuna juc-ishcay junajllapämi. Juc junaj cuyayllapaj waytan. Waranninna capllupäna chaquicäcun. Nircur tullpallaçhu ushyacäcun. Chaypis Tayta Diosninchi cuyayllapaj waytachin. Chaynuy caycaptin, ¿jamcunata Tayta Diosninchi pishïchishunquimanchuraj? Mana. Chaymi sumaj yupachicärinquiman. 31Ama llaquicunquichu: ¿Imataraj micushaj? ¿Imataraj upushaj? ¿Imataraj ushtucushaj? nir. 32Tayta Diosninchiman mana yupachicujcunallam chaycunapaj llaquicun. Jamcunam ichanga Tayta Diosninchiman yupachicunqui. Payga imalla pishïshushayquitapis mayna musyaycan. 33Chaymi maquillançhu cawanquiman. Shungun munashallanta rurar cawanquiman. Maquinçhu purichishushpayqui pishijcunatapis tarichishunquipaj. 34Chaymi: Wara-warantin, ¿imanuyraj cawashaj? nir ama llaquicunquichu. Wara-warantinpis cawashayquinuylla cawanquipaj.

will be added

X\