Mateo 5

1Chay-chicaj runata ricar pataman jigarcur, Jesús jamacuycuran. Purïshijnincuna jutupaycuptin, 2tantiyachicur Jesús niran: 3Pishipacujcuna, cushicärinquiman. Llapan shunguyquiwan yupachicuptiqui, Tayta Diosninchi yanapaycäshunqui. Maquinçhümi cawaycächishunqui. 4Ñacajcuna, cushicärinquiman. Llaquicur wagaptiquisi, Tayta Diosninchi yanapaycäshunqui. Shacyaycächishunqui. 5Çhacraynaj, wasiynaj runacuna, cushicärinquiman. Pampa runa captiquisi, Tayta Diosninchi yanapaycäshunqui. Maquiquimanmi cay pachatapis çhuranga. 6Wañuy-caway Tayta Diosninchipa shungun munashannuy cawayta ashijcuna, cushicärinquiman. Tayta Diosninchi yanapaycäshunqui. Shunguyqui munashantapis tarichishunqui. 7Llaquipäcujcuna, cushicärinquiman. Tayta Diosninchi yanapaycäshunqui. Sumaj llaquipaycäshunquim. 8Shungunçhu juchata mana pacajcuna, cushicärinquiman. Tayta Diosninchi yanapaycäshunqui. Quiquinwanmi tincunquipaj. 9Pï-maytapis amachajcuna, cushicärinquiman. Tayta Diosninchi yanapaycäshunqui. Payga wamrachacushunquim. 10Tayta Diosninchipa shungun munashanta rurajcuna, cushicärinquiman. Runacuna ñacachishuptiquisi, Tayta Diosninchi yanapaycäshunqui. Maquinçhümi puriycächishunqui. 11Wiyacamashayqui-janan ashllishuptiquisi, chiquir ushyashuptiquisi, imapita tumpashuptiquisi, cushicärinquiman. 12Ñacachishushayqui-jina chiqui runacuna Tayta Diosninchipa unay-unay willacujnincunatapis ñacachir ushyaran. Janaj pachaçhümi ichanga Tayta Diosninchi alli cawayta shuyaraycächishunqui. Chaymi sumaj cushicärinquiman. Shunguyquicunapis achicyacärinman. 13Jamcuna caçhi-jina carcaycanqui. Caçhipa puchguynin illariptin, ¿yapay puchguyninman cutichinquimanchuraj? Mana. Puchguynin illariptin, wicaparin. Runacuna lluchcar ushyan. 14Tayta Diosninchipa shiminta wiyacushayquipita achquita alli ricashan-jina jamcunatapis llapan runa alli ricashunquiman. Juc pataçhu marca captinshi, llapan runa rican. 15Achquita ratarcachir, pipis manash manca rurinman çhuranmanchu. Manchäga wasiçhu llapanta achicyänanpaj patacmanshi çhuran. 16Achqui allipaj cashan-jina jamcunapis alli shungu canquiman. Alli shungu cashayquita ricar, janaj pachaçhu tiyaj Tayta Diosninchitapis llapan runa alliman çhuranga. 17Sumaj tantiyacunquiman. Mana Moiséspa shiminta, unay willacujcunapa shiminta ushyacächijchu shamushcä; manchäga llapanta alliman camacächijmi. 18Cay pachawan janaj pacha mana ushyacaptillan, Moiséspa shimin çharcucanga Tayta Diosninchipa shimin cashpan. Mana ichicllapis jungacangachu. 19Chaymi pipis Tayta Diosninchipa shiminta llapanta çharcurpis juc-ishcayllatasi pantaptin, Tayta Diosninchipis mana ricaj-tucungachu. Juc-ishcayllata mana wiyacunanpaj shimiyajcunatapis Tayta Diosninchi mana ricaj-tucungachu. Shiminta wiyacujcunatawan sumaj yaçhachicujcunatam ichanga alli ricar, maquinçhu cawachinga. 20Fariseucunapis, Moiséspa shiminta yaçhajcunapis janan-janallan Tayta Diosninchipa shiminta wiyacun. Tayta Diosninchipa ñaupanman çhayanayquipämi ichanga llapan shunguyquiwanraj wiyacunquiman. 21Mä, wiyamay. Unay auquillunchicunata Moisés niran: Ama wañuchicunquichu. Wañuchicujpa juchan jurgapash canga. 22Canan nuwana willashayqui. Shungullançhu warmijcunapa, ullgujcunapa juchantapis Tayta Diosninchi jurgapanga. Runa-masinta ashllicujcunata mayur Israel runacunapa ñaupanman çhayachinga. Pipis runa-masinta ashllir: Upa. Tacra nir pampaman çhuraptin, chacaj pachaman çhayanga. Ninaçhu Tayta Diosninchi ñacachinga. 23- 24 Chaymi: Tayta Diosninchita cuyachicuynïta jarashaj nir runa-masiquiwan jagayächinacush caycar, ama çhuranquirächu. Manchä juclla ushyacächinquiman. Jinarcurraj cuyachicuyniquita Tayta Diosninchita jaranquiman. 25Pipis dimandashuptiqui jatunman mana çhayallar, juclla ushyacächinquiman. Manchäga juiswan charichishunquipaj. Juisga murucucunawan carsilman apachishunquipaj. 26Carsilpita llap-llapanta pägarraj llucshimunquipaj. Chayta sumaj tantiyacunquiman. 27Moiséspa shiminta musyanqui. Shiminçhu nin: Majayquita ama jananpachinquichu. 28Canan nuwana willashayqui. Pipis juc warmiwan cacuyta yarpar, mayna shungullançhu juchata aparicusha. Majanta jananpachishana. 29Chaymi ñawiqui juchata aparicachishuptiqui ujtirir wicapariptiqui, alli canman. Ñawiyuj caycar chacaj pachaman aywanayquipita ñawiquita wicapariptiqui, alli canman. Manchäga chacaj pachaçhu ñacanquipaj. 30Maquiquipis juchata aparicachishuptiqui muturir wicapariptiqui, alli canman. Maquiyuj caycar ñacayman aywanayquipita maquiquita muturir wicapariptiqui, alli canman. Manchäga chacaj pachaçhu ñacanquipaj. 31Moiséspa shiminta yaçhacushcanqui. Shiminçhu nin: Pipis warminta jaguirir, actaman jamachinman. 32Canan nuwana willashayqui. Juc runa majanta jaguiriycur jucwan jananpachiptillanraj, jaguirinman. Manchäga mana camacanchu. Jaguirirga, jucha aparicuyman warminta çhayachin. Juc runatana çhasquir, juchaman çhayan. Runan jaguirish warmiwan majachacaj runapis juchata aparicun. 33Unay auquillunchicunata Moisés niran: Ama llullacunquichu. Manchäga shimiquita çharcunquiman. Tayta Diosninchipa ñaupançhu aunishcanqui. 34Canan nuwana willashayqui. Imatapis aunir, janaj pachaman ama ricarinquichu. Janaj pachaga Tayta Diosninchipa wasin. 35Çhacrayquitapis ama auninquichu. Çhacracunapis Tayta Diosninchipa maquinçhümi. Jerusalén marcamanpis ama ricarinquichu. Jerusalén marcapis munayniyuj Tayta Diosninchipa maquinçhümi. Paypa marcanmi. 36Mana çharcuptï, wañurachimanqui ama ninquichu. Cawayniquipis Tayta Diosninchipa maquinçhümi. Ajchayqui yana cananpäpis, yuraj cananpäpis quiquin camasha. Jucnayllatasi rucayta mana junquimanchu. 37Rimacuyniquiga juc shimilla cachun. Aunir, ama cutiricunquichu. Mana aunirpis, ama auninquinachu. Ishcay-quimsata rimar, supay yarpashanta rimaycanqui. 38Moiséspa shiminta musyanqui. Shiminçhu nin: Maganacur, iwal cutichinacunqui. Ñawiyquiçhu çhayachishuptiqui, ñawillançhu cutichinqui. Quiruyquiçhu çhayachishuptiqui, quirullançhu cutichinqui. Canan nuwana willashayqui. 39Pipis magashuptiqui, ayninta ama cutichinquichu. Juc-caj jajllayquiçhu lajyashuptiqui, juc-cajlätana camapunqui. 40Camsayquita jiçhushunayqui-cashan dimandashuptiqui, punchuyquitapis jaguipaycunquiman. 41Juc murucu juc lïwacaman jipinta apachishuptiqui, ishcay lïwacaman apaparcunquiman. 42Mañacushuptiqui, tarichinquiman. Challimay nishuptiqui, ama upa-tucunquimanchu. 43Moiséspa shiminta musyanqui. Shiminçhu nin: Yaçhänacushayquita alli ricanqui. Juyucunatam ichanga chiquinqui. 44Canan nuwana willashayqui. Pipis chiquishuptiqui, llaquipanquiman. Juyu ñawinpa ricashuptiquisi, alli ñawiquipa ricanqui. Paycunapaj Tayta Diosninchita mañacunqui alli cawayta tarichinanpaj. 45Chayrämi Tayta Diosninchipa wawan cashayqui musyacanga. Payga alli runacunapäpis, juyu runacunapäpis intita achicyächimun. Chaynuypis shiminta wiyacujcunapäpis, mana wiyacujcunapäpis tamyachimun. 46Yaçhänacushallayquiwan llaquipänacur, ¿rasunpachuraj llaquipayta yaçhanqui? Mana. Aynillanta cutiycächinqui. Chiqui runacunapis yaçhänacushallanwan alli ricanacun. 47Ricsinacushallayquiwan wamayänacur, ¿allitachuraj ruraycanqui? Mana. Aynillanta cutiycächinqui. Tayta Diosninchita mana manchapacujcunapis ricsinacushallanwan wamayänacun. 48Chaymi Tayta Diosninchi llaquipäcuj cashan-jina, allillata ruraj cashan-jina, jamcunapis llapan runa-masiquita llaquipanquiman. Alli ricanquiman.

will be added

X\