Mateo 3

1Chaypita unayllata Judea quinran chunyaj pachaçhu Ushyachicuj Juan ricariran. 2Llapanta willapar niran: Juchayquipita wanacäriy. Tayta Diosninchi jananchiçhünam. Maquinçhünam purichimäshun. 3Juan willacuran willacuj Isaíaspa shimin çharcucänanpaj. Isaíasga unayna niran: Chunyajçhümi juc runa jayacuypa willacuycan: Taytanchi shamunanpaj camaricuy. Caminuta pichay. Wicsu caminucunatapis allchay. 4Juanpa müdanan camïllupa ajchanpita caran. Sinturunninpis jarachapita caran. Chaynuypis chunyajçhu tarishan chucluscunallatawan munti abïjapa mishquillanta micuj. 5Jerusalén marcapita, Judea marcacunapita, Jordán mayu rajra quinranpita runacuna Juanpa shiminta wiyaj aywaran. 6Jucha aparicushanta mana pacaptin, Jordán mayuçhu Juan ushyachiran. 7Fariseu runacunapis, saduceu runacunapis ushyacuyta munar çhayaran. Chaypis Juan niran: Supaypa wawancuna, ushyacurpis juchallaçhu aruptiquiga, Tayta Diosninchi ñacachishunquipämi. Mana jishpinquipächu. 8Wanacushayqui musyacänanpaj Tayta Diosninchita manchapacur allillata rurar caway. 9Ama chapacunquichu: Abrahampa willcan caycanchi. Paypita Tayta Diosninchi alli ricaycämanchi nir. Abrahampa willcan cananpäga Tayta Diosninchi rumitapis ticrarachinman wiyacuj cananpaj. 10Ushyacurpis juchapita mana wanacuptiqui, Tayta Diosninchipis jargurishunquipaj. Yüratapis mana sumaj wayuptin, jächawan muturij-muturijllana shuyaranchi. Muturir, ninaman jaycurinchi. 11Juchapita wanacushayqui musyacänanpaj yacullawan ushyachiycaj. Jucmi ichanga Espíritu Santuwanpis, ninawanpis ushyachishunquipaj. Payga munayniyujmi. Chaymi llanguinta apäshiyllatapis manchapacü. 12Juchapita wanacujcunata alli ñawinwan Tayta Diosninchi ricanga. Juchaçhu arujcunatam ichanga mana upij ninaman jaycuringa. Sumaj tantiyacärinquiman. Rïguta wapyarpis, punshanta ruparachin. Muruntam ichanga wasinman shuntan. 13Chay wichan Jesús aywaran Galilea quinranpita Jordán mayuman Ushyachicuj Juan ushyachinanpaj. 14Ushyachiyta mana munar, Juan niran: Tayta Jesús, mana ushyachijmanchu. Manchäga ushyachimanquiman. 15Jesúsna niran: Ushyachimay. Chayraj Tayta Diosninchipa shungun munashanta çharcushun. Chaymi Jesústa Juan ushyachiran. 16Ushyacuriycur yacupita Jesús llucshiriptin, janaj pachapa puncun quiçhacäcamuran. Espíritu Santuna paluma-jina Jesúsman çhayaran. 17Janaj pachapitana nimuran: Jesúsga cuyay Wawämi. Shungüman tincun.

will be added

X\