Mateo 25

1Tayta Diosninchi maquinçhu purichimashanchipita tincuchiypa tantiyachishayqui. Juc cutiçhüshi çhuncaj jipash achquinwan-caman majachacaj müsuta shuyarpaycaran. 2Pichgaj jipashnash yarpay-sapa caran; pichgajnash pishi-yarpayyuj. 3Pishi-yarpayyuj jipashcuna achquinwan puriptinsi, wira wiñacunanta manash purichiranchu. 4Yarpay-sapa jipashcunash ichanga achquinta, wira wiñacunantinta purichicäriran. 5Majachacaj müsu juclla mana çhayaptinshi, jipashcunata puñunay chariran. Llapanshi puñucäcuran. 6Pullan-pagas çhayamuptinna, juc runash jayacuriran: Majachacaj müsu yaycaycämunna. Çhasquicäriyna nirshi. 7Chayshi jipashcuna achquinta camaricäriran. 8Pishi-yarpayyuj jipashcunanash yarpay-sapa jipashcunata niran: Achquïga upicäcuycannam. Wirayquita challicallämay. 9Yarpay-sapa jipashcunanash niran: Challinacurga, llapanchi pishipacushunpaj. Wirata munar, ranticujcunaman aywariycunquiman. 10Chayshi wira rantij aywashancaman majachacaj müsu çhayaran. Majachacay tünaman achquin rataycajcunallatash yaycuchiran. Jinarcur wasipa puncuntash wiçhgacurcuran. 11Chaypita pishi-yarpay jipashcunanash cutimur, puncupita jayacuran: Taytallau tayta, puncuyquita quiçhapaycallämay, ari nirshi. 12Majachacaj müsunash wasi ruripita nimuran: Mana ricsillajchu. ¿Piraj cacullanquipis? 13Yarpay-sapa jipash-jina jamcunapis camaricushalla cawanquiman. Cutimunäta mana musyanquichu. Mana yarpashpita cutimushaj. 14Sumaj tantiyacunayquipaj tincuchiypa willapäshayqui. Juc runash carupa aywacunanpaj quimsa uywaynincunata jayachiran. Paycunapa maquinmanshi llapan imancunatapis çhuraycuran. 15Callpanta tantiyaycur-tantiyaycur, llapallantash jaguipuran. Juc uywaynintash jaguipuran pichga waranga (5,000) jillayta, juctanash ishcay waranga (2,000) jillayta, juctanash juc waranga (1,000) jillayta. Jinarcur carupash aywacuran. 16Pichga waranga (5,000) jillayta çhasquijnash juclla aruchiran. Aruchiptinshi, wawallan pichga waranga (5,000) llucshiran. 17Chay-jinash ishcay waranga (2,000) jillayta çhasquijpis aruchishanpita wawallanta ishcay warangata (2,000) shuntaran. 18Juc waranga (1,000) jillayta çhasquijnash ichanga pachata uçhcuriycur pacaycuran. Manash aruchiranchu. 19Unayllatanash wasinman runa cutiran. Jinarcur uywaynincunatash jayachiran jillayninta wawantinta shuntananpaj. 20Pichga waranga (5,000) jillayta çhasquijnash niran: Tayta, pichga waranga (5,000) jillayta jaguipamashcanqui. Wawanpis pichga (5,000) warangata mirasha. Wawantintam cutiycächij. Cayllä callan. 21Runanash niran: Allita rurashcanqui. Ichicllatapis alli ricashayquipita achcatana jaguipushayqui. Canan tünashun. Micupacushun. 22Ishcay waranga (2,000) jillayta çhasquijnash niran: Tayta, ishcay waranga (2,000) jillayta jaguipamashcanqui. Wawantapis ishcay warangata (2,000) shuntashcä. Wawantintam cutiycächij. Jillayllä. 23Runanash niran: Allita rurashcanqui. Wallcallatapis alli ricashayquipita achcatana jaguipushayqui. Canan tünashun. Micupacushun. 24Juc waranga (1,000) jillayta çhasquijnash niran: Tayta, manchacuypa runa cashayquita musyä. Jamashalla imatapis çhasquinqui. Mana murupacuycarsi, achca-achcata shuntayta munanqui. Mana arucuycarsi, chay-chicata pallayta munanqui. 25Chaymi manchacurä. Manchacurmi, jillayniquitapis mana yatapashcächu. Manchäga pachata uçhcurcullar pacaycurä. Catay jillayniqui. 26Chayshi runa niran: Juyu runa canqui. Jilla. Jamashalla achca-achcata shuntayta musyaycar, 27jillay mirachijcunallamanpis jillaynïta çhuranquiman caran. Cutimur, wawantinta shuntacüman caran. 28Waquin uywaynincunatanash niran: Waranga jillayninta jiçhurir, çhunca waranga (10,000) charaj-cajta juycuy. 29Sumaj wiyamay. Wiyacamaptin, pitapis yanapäshaj. Paycuna may-mayta charangapaj. Mana wiyacamajcunatam ichanga ichicllata charashantapis jiçhushaj. 30Jilla uywaytaga wajtaman wicapay. Chacajman jaycuriy. Chayçhu atayparaj waganga. Juyupa ñacar, quiruntapis uçhunga. 31Tayta Diosninchipa caçhan car, anjilcunawan-ima cutimushaj. Jatun auturdä-jina achic-achicyaycar mandajpa jamacunançhu jamashaj. 32Llapan marcapita runacuna ñaupäman jutucanga. Llapan jutucaptin, capshicunapa çhaupinpita uyshata raquiycaj-yupay shimïta wiyacujcunata raquicurishaj. 33Wiyacamajcunata alli ricar, dirïcha-caj lädüman raquicurishaj. Mana wiyacamajcunatam ichanga juyu ñawïwan ricar, isquirda-caj lädüman raquirishaj. 34Jatun auturdä carmi, wiyacujcunata nishaj: Papänï alli ricashunqui. Paypa maquinçhüna caway. Cay pachata camashanpita-pacha maquinçhu cawanayquipaj shuyaraycäshunqui. 35Yargaycajta ricaycämar, jaramashcanqui. Yacunaycajta ricaycämarpis, upuchimashcanqui. Jurpay-tucur puriptïpis, pachächimashcanqui. 36Müdanaynajta ricaycämarpis, ushtucunäpaj camaripamashcanqui. Jishyaptïpis, carsilçhu wiçhgaraptïpis, watucallämashcanqui. 37Chaura wiyacuj runacuna tapumanga: Tayta, ¿imaytaj yargaycajta ricar, jarallashcaj? Yacunaycajta ricar, ¿imaytaj upuchillashcaj? 38Jurpay-tucur puriptiqui, ¿imaytaj pachächillashcaj? Müdanaynajta ricar, ¿imaytaj camaripullashcaj? 39Jishyaycaptiqui, carsilçhu wiçhgaraptiqui, ¿imaytaj watucullashcaj? nir. 40Canan sumaj tantiyacunquiman. Wiyacamaj irmänucunata tarichir yanapar, quiquïta yanapämashcanqui. Nuwa-janan paycunata yanapashcanqui runa-masincuna mana alli ricacaptinsi. 41Jinarcur mana wiyacujcunata chapata rurar nishaj: Juyu runacuna, ricaytasi mana munallajchu. Ratataycaj ninaman jaycushayqui. Mana ushyacaj ninata Tayta Diosninchi camarisha supay-masintincunapaj. 42Yargaycaptïsi, mana jaramashcanquichu. Yacunaycaptïsi, mana upuchimashcanquichu. 43Jurpay-tucur puriptïsi, mana pachächimashcanquichu. Müdanaynaj caycaptïsi, ushtucunäpaj mana camaripamashcanquichu. Jishyaycaptïsi, carsilçhu wiçhgaraycaptïsi, mana watucamashcanquichu. 44Chaura mana wiyacujcunapis tapumanga: Tayta, yargaycajta, yacunaycajta, jurpay-tucur puriycajta, müdanaynajta imaypis mana ricashcajchu. Jishyaycashayquitapis, carsilçhu wiçhgaraycashayquitapis mana musyashcächu. Ricar-imarga, yanapajmanmi caran. 45Nuwana nishaj: Sumaj tantiyacunquiman. Wiyacamajcunata mana alli ricashpayqui mana yanaparga, nuwatapis mana yanapämashcanquichu. 46Chaymi mana wiyacamajcuna imaycamanpis ñacangapaj. Wiyacamajcunatam ichanga maquinçhu imaycamanpis Tayta Diosninchi cawachinga.

will be added

X\